فوتو: gov.kz
نۇرجان نۇرجىگىتوۆ 2024 جىلدىڭ 1 قاڭتارىنان باستاپ قازاقستان حالىقارالىق ارالدى قۇتقارۋ قورىنا توراعالىق ەتەتىنىن, سوندىقتان ەلىمىز ورتالىق ازيا مەملەكەتتەرىمەن, سونداي-اق باسقا دا حالىقارالىق ۇيىمدار مەن قارجى ينستيتۋتتارىمەن ىنتىماقتاستىقتى ارتتىرۋعا دايىن ەكەنىن مالىمدەدى. مينيستر قازاقستان مەملەكەت باسشىسىنىڭ وڭىردە ورتالىق ازيانىڭ بارلىق ەلدەرىنىڭ مۇددەلەرىن ەسكەرەتىن حالىقارالىق سۋ-ەنەرگەتيكالىق كونسورتسيۋم قۇرۋ جونىندەگى باستامالارىن ىسكە اسىرۋعا نيەتتى ەكەنىن اتاپ ءوتتى.
ەلشى BPCA-نىڭ ءبىرىنشى كەزەڭى اياقتالۋعا جاقىن ەكەنىن ايتتى, سوندىقتان قازىرگى ۋاقىتتا باعدارلاما وكىلدەرى ەكىنشى كەزەڭدە قانداي باعىتتاردى قامتۋ كەرەكتىگىن انىقتاۋ ءۇشىن ورتالىق ازيا ەلدەرىنە بارادى. سونىمەن قاتار قازاقستان, قىرعىزستان, تاجىكستان, تۇرىكمەنستان, وزبەكستان قاتىساتىن گيدروگەولوگيالىق بولجاۋ باعدارلاماسى وزبەكستاندا ىسكە قوسىلىپ جاتىر. اتالعان باعدارلاما ورتالىق ازيا ەلدەرى اراسىنداعى سۋ اعىندارى مەن سۋ شىعىنىن باقىلاۋعا مۇمكىندىك بەرەدى.
Blue Peace Central Asia وكىلدەرى ولاردىڭ جوباسى بىرنەشە باعىتتى قامتيتىنىن اتاپ ءوتتى. اتالعان جوبا, مىسالى حالىقارالىق ارالدى قۇتقارۋ قورى جانە دۇنيەجۇزىلىك بانك ىسكە اسىرىپ جاتقان ورتالىق ازيا ءۇشىن سۋ-ەنەرگەتيكالىق باعدارلاماسى (Cawep) شەڭبەرىندە سۋ رەسۋرستارىن باسقارۋدىڭ وڭىرلىك ينستيتۋتتارىن نىعايتۋ, ساراپشىلاردى تارتۋ جانە تاجىريبە الماسۋ, ترانسشەكارالىق گيدروتەحنيكالىق قۇرىلىستاردى جاڭعىرتۋ جانە رەكونسترۋكتسيالاۋ, سونداي-اق ءارتۇرلى كۋرستار مەن ترەنينگتەر ارقىلى كادرلار دايارلاۋ جانە ولاردىڭ بىلىكتىلىگىن ارتتىرۋ سەكىلدى بىرنەشە باعىتتاردى قامتيدى.
«كەلەسى جىلى ءبىز دۇنيەجۇزىلىك بانكپەن بىرگە جۇزەگە اسىرىپ جاتقان كىشى ارالدى ساقتاۋ جوباسىنىڭ ەكىنشى كەزەڭىن باستاۋدى جوسپارلاپ وتىرمىز. سوندىقتان ءبىز Blue Peace-پەن بىرلەسىپ ورتالىق ازيا ەلدەرىنىڭ سۋ-ەنەرگەتيكا سالاسىنداعى ءوزارا ءىس-قيمىلى ماسەلەلەرىمەن جۇمىس ىستەگىمىز كەلەدى. سونداي-اق ءبىز جاڭا كادرلار دايارلاۋعا جانە سۋ سالاسىندا جۇمىس ىستەپ جۇرگەن مامانداردىڭ بىلىكتىلىگىن ارتتىرۋعا مۇددەلىمىز. ءبىزدىڭ ىنتىماقتاستىعىمىز تىعىز ءارى جەمىستى بولادى دەپ سەنەمىن», دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.
