ەسكى مەكتەپتەن ەسەيىپ شىعىپ, ازامات اتانعاندار كوپتەپ سانالادى. دەگەنمەن شاكىرتتەردىڭ بويىنا ۇلت رۋحىنىڭ ورەلى ونەگەسىن ۇيالاتقان ەسكى مەكتەپ ۋاقىت ءمۇجىپ الاساردى ءارى وقۋ-تاربيە جۇمىسىن زامان تالابىنا ساي وتكەرۋگە تارلىق ەتتى. وسىنى ەسكەرگەن اۋىل ازاماتتارىنىڭ باستاماسىمەن جەكەمەنشىك تۇرعىن ءۇي قۇرىلىسى رەتىندە سالىنعان بۇل ءۇيدى باستاپقىدا-اق مەكتەپ تەڭگەرىمىنە بەرۋ جوسپارلانعان ەدى.
ءۇش جىل بۇرىن تاسقۇدىق تۇرعىندارىنىڭ باستاماسىن قۇپ كورگەن سول كەزدەگى اۋدان اكىمى تالعات قايناربەكوۆ مەكتەپ ىرگەتاسىن كوتەرۋگە شۇعىل تۇردە قارجى قاراستىرعان بولاتىن. يگى باستاماعا سول جىلدارى كوپشىلىكتى ۇيىستىرا بىلگەن «بابالار رۋحى» قورى كومەككە كەلدى. قور توراعاسى جانات مۇقاشەۆتىڭ ايتۋىنشا, اۋدانداعى قالتالى كاسىپكەرلەردەن تۇسكەن قوماقتى قارجى مەكتەپ قۇرىلىسىنا باعىتتالدى دا قۇرىلىس ماتەريالدارى قولدارىنا تيگەن باستاماشىل تۇرعىندار ىسكە كىرىستى. دەگەنمەن پاندەميا زاردابىنان جۇمىس بىرەر جىل توقىراپ, بىلتىردان بەرى اۋىل تۇرعىندارىنىڭ ۇيىسۋىمەن زاماناۋي مەكتەپ جەتكىنشەكتەردىڭ يگىلىگىنە ۇسىنىلدى.
50 ورىنعا ارنالعان مەكتەپتىڭ 3 سىنىپ كابينەتى, اسحانا, مۇعالىمدەر بولمەسى بار جانە دە وقۋشىلاردىڭ قاۋىپسىزدىگىن قامتاماسىز ەتۋ ماقساتىندا ىشكى دارەتحانالارمەن, بەينەباقىلاۋلارمەن تولىق قامتاماسىز ەتىلگەن.
شاكىرتتەرىنىڭ بويىنا ۇلت رۋحىنىڭ ورەلى ونەگەسىن ۇيالاتىپ, تاربيە مەن بىلىكتىلىكتى ۇشتاستىرا بىلەتىن ۇستازدار قاۋىمى ورتاق ىسكە ىنتىماق-بىرلىكپەن ۇجىمداسقان اۋىلداستارىنىڭ قارەكەتىنە ءدان ريزا. ونەگەلى ءىس وسىنداي شالعايدا ورنالاسقان وزگە دە اۋىلدارعا ۇلگى بولارىنا سەنەدى. كوپتىڭ تىلەگى ورىندالعان كۇن مەرەكەمەن پارا-پار.
«مىناداي زاماناۋي جابدىقتالعان مەكتەپتە ءبىلىم ساپاسى دا ويداعىداي بولماق. جاڭا شاڭىراقتىڭ ىرگەسى كوتەرىلگەلى وقۋشىلاردىڭ دا كوڭىلى كوتەرىلدى. ەندى شاعىن اۋىلدىڭ شىرايى كىرمەك. كىشكەنتاي بالدىرعانداردىڭ بولاشاعىنا جولاشار اياۋلى مەكەننىڭ ءار كىرپىشى وسىنداعى ازاماتتاردىڭ ارقاسىندا قالاندى. ءبىر جەڭنەن قول, ءبىر جاعادان باس شىعارعان جەرلەستەرىمە ريزامىن», دەيدى باستاۋىش مەكتەپ مەڭگەرۋشىسى قۇرالاي ايتوۆا.
مەكتەپكە دەيىنگى دايارلىق سىنىبىنىڭ مۇعالىمى ءلايلا توقمۋرزينا دا وسىنداي مۇمكىندىكتى قامتاماسىز ەتكەن ازاماتتارعا ارنايى العىسىن ءبىلدىردى. اۋىلداستارىن ورتاق ىسكە جۇمىلدىرعان اسلان قۇسايىنوۆ, ەرمەك توقمۋرزين, سوۆەتحان مامىرباەۆتار الىستان كوز تارتاتىن جاڭا مەكتەپ اينالاسىندا بولاشاقتا سپورت الاڭدارى سالىنسا دەگەن ىزگى ماقساتتىڭ ورىندالۋىن اسىعا توسادى.
جاڭا مەكتەپتىڭ اشىلۋ سالتاناتىندا سارقان اۋدانى اكىمىنىڭ مىندەتىن اتقارۋشى اسقات قالياسقاروۆ, اۋداننىڭ قۇرمەتتى ازاماتتارى جومارت يگىمان, جانات مۇقاشەۆ, باقالى اۋىلدىق وكرۋگىنىڭ اكىمى اسەت قاناپيانوۆ, ك.قازىباەۆ اتىنداعى ورتا مەكتەپتىڭ ۇستازى رايحان قياحمەتوۆا, اۋىل ازاماتتارى اتىنان اسلان قۇسايىنوۆ ىنتىماق-بەرەكەنىڭ ارقاسىندا قولدانىسقا بەرىلگەن ءبىلىم وشاعى ۇجىمىنىڭ, جەتكىنشەكتەرىنەن ءۇمىت كۇتەتىن اتا-انالاردىڭ قۋانىشىن ءبولىستى. باستاۋىش مەكتەپ سالتاناتتى تۇردە اشىلىپ, جيىنعا قاتىسۋشىلار جاڭا نىساننىڭ جابدىقتالعان كابينەتتەرىن ارالاپ كوردى.
جيىن سوڭىندا اۋىلدىق مادەنيەت ءۇيى ونەرپازدارى مەن وقۋشىلار دايىنداعان شاعىن كونتسەرت كورەرمەن نازارىنا ۇسىنىلدى.
جەتىسۋ وبلىسى
