بۇل باستاما مەملەكەت باسشىسى قاسىم-جومارت توقاەۆتىڭ ءۇش جوعارى وقۋ ورنىنىڭ بازاسىندا جاساندى ينتەللەكت سالاسىنداعى كادرلار دايارلاۋ جانە وسى سالادا زەرتتەۋ جۇرگىزەتىن ورتالىقتار اشۋ جونىندەگى تاپسىرماسى شەڭبەرىندە ىسكە اسىرىلدى. جوعارى مەكتەپ جاساندى ينتەللەكت, كيبەرقاۋىپسىزدىك جانە ينفورماتيكا سالاسىندا كادرلار دايارلايتىن بولادى. ستۋدەنتتەر سەۋل ۇلتتىق عىلىم جانە تەحنولوگيالار ۋنيۆەرسيتەتىمەن (سەۋلتەح) بىرلەسكەن باعدارلامالار بويىنشا ءبىلىم الادى, بۇل الەمدىك IT تەحنولوگيالارعا قولجەتىمدىلىكتى قامتاماسىز ەتەدى. جوبا اياسىندا وقۋ ورنى كورەيانىڭ زاماناۋي زەرتحانالىق قۇرىلعىلارىمەن جابدىقتالادى, ال ستۋدەنتتەر بىرنەشە ءتىلدى مەڭگەرىپ, ورىس جانە قازاق تىلدەرىنەن بولەك, اعىلشىن, كورەي تىلدەرىندە ءبىلىم الادى.
جيىندا ساياسات نۇربەك جوبانىڭ ماڭىزىنا توقتالدى.
– پرەزيدەنت قاسىم-جومارت توقاەۆ جاساندى ينتەللەكت تەحنولوگيالارىنىڭ دامۋى ەل بولاشاعى ءۇشىن ستراتەگيالىق ماڭىزدى باعىت ەكەنىن اتاپ ءوتتى. جاساندى ينتەللەكت تەحنولوگيالارىن قولدانىسقا ەنگىزۋ ەرەكشە نازار اۋدارۋدى قاجەت ەتەدى. سوندىقتان عىلىم جانە جوعارى ءبىلىم مينيسترلىگى وسى باعىت بويىنشا ءبىلىم بەرۋ باعدارلامالارىن ىسكە اسىرۋعا كىرىستى. قورقىت اتا ۋنيۆەرسيتەتىندە سەۋلتەحتىڭ جوعارى جاساندى ينتەللەكت مەكتەبىنىڭ اشىلۋى IT تەحنولوگيالار سالاسىندا ادامي كاپيتالدى قالىپتاستىرۋعا, عىلىمي زەرتتەۋ ناتيجەلەرى جانە ءوزارا تاجىريبە الماسۋعا, سونداي-اق كورەيا مەن قازاقستان اراسىنداعى جوعارى ءبىلىم بەرۋ سالاسىنداعى ەكىجاقتى ىنتىماقتاستىقتى ودان ءارى ىلگەرىلەتۋگە سەرپىن بەرەدى. سونداي-اق الداعى ۋاقىتتا شەتەلدىك ۋنيۆەرسيتەتتىڭ فيليالى مەن قوس ديپلومدى باعدارلاما اشۋ جوسپارلانىپ وتىرعانىن حابارلاعىم كەلەدى. سونىڭ ناتيجەسىندە تۇلەكتەر سەۋلتەحتىڭ جانە قورقىت اتا اتىنداعى قىزىلوردا ۋنيۆەرسيتەتىنىڭ ديپلومىن الا الادى, – دەدى مينيستر.
سونداي-اق س.نۇربەك مەملەكەت باسشىسىنىڭ تاپسىرماسىن ورىنداۋ ماقساتىندا ەلىمىزدە كەيىنگى ەكى جىلدا م.قوزىباەۆ اتىنداعى سولتۇستىك قازاقستان ۋنيۆەرسيتەتىنىڭ بازاسىندا اريزونا ۋنيۆەرسيتەتى, ق.جۇبانوۆ اتىنداعى اقتوبە وڭىرلىك ۋنيۆەرسيتەتى بازاسىندا حەريوت-ۋوتت ۋنيۆەرسيتەتى (شوتلانديا), ەسەنوۆ ۋنيۆەرسيتەتىنىڭ بازاسىندا نەمىس جوعارى وقۋ ورىندارىنىڭ كونسورتسيۋمى جانە باسقا دا جەتەكشى شەتەلدىك جوعارى وقۋ ورىندارىنىڭ 8 فيليالى اشىلعانىن اتاپ ءوتتى. ءمينيستردىڭ ايتۋىنشا, شەتەلدىك ۋنيۆەرسيتەتتەردىڭ فيليالدارىن اشۋ ءبىلىم بەرۋ سالاسىن دامىتۋعا جانە حالىقارالىق ارەنادا جوعارى ءبىلىم سالاسى بويىنشا كوشباسشى اتانۋعا ماڭىزدى قادام بولماق.
LUPIC جوباسىنىڭ ەلىمىزدەگى ورتالىعىنىڭ ديرەكتورى, سەۋل ۇلتتىق عىلىم جانە تەحنولوگيالار ۋنيۆەرسيتەتىنىڭ كۆانتتىق جاساندى ينتەللەكت قاۋىپسىزدىگى جاھاندىق ورتالىعىنىڭ ديرەكتورى دجەسۋ كيم جوبا اياسىندا جوعارى مەكتەپ اشۋ عانا ەمەس, قورقىت اتا ۋنيۆەرسيتەتىنىڭ بازاسىندا بيزنەس-ينكۋباتور قۇرۋ كوزدەلىپ وتىرعانىن اتاپ ءوتتى. «بيزنەس-ينكۋباتور اياسىندا ستۋدەنتتەر ءوز تالانتتارىن شىڭداپ, ستارتاپتار ازىرلەپ, العان بىلىمدەرىن بۇكىل الەم بويىنشا جاساندى ينتەللەكتتى دامىتۋ ءۇشىن پايدالاناتىنىنا سەنىمدىمىن», دەدى دجەسۋ كيم.
وسى جىلدىڭ قىركۇيەگىنەن باستاپ قورقىت اتا اتىنداعى قىزىلوردا ۋنيۆەرسيتەتىندە IT ماماندىققا تۇسكەن جانە سەۋلتەحتىڭ باعدارلاماسى بويىنشا وقۋعا ىرىكتەلگەن 1-كۋرس ستۋدەنتتەرى ءۇشىن تىلدىك دايارلاۋ جۇمىستارى باستالدى. قازىر ولار جالپى ءبىلىم بەرەتىن پاندەردى وقىپ, جەدەلدەتىلگەن تىلدىك كۋرستاردان ءوتىپ جاتىر. بولاشاقتا ستۋدەنتتەر مەن پروفەسسور-وقىتۋشىلار قۇرامى اكادەميالىق ۇتقىرلىق جانە بىرلەسكەن ءبىلىم بەرۋ باعدارلامالارى بويىنشا سەۋلدە وقۋعا جانە عىلىمي تاعىلىمدامادان وتۋگە بارا الادى. ال سەۋلدەن وقىتۋشىلار ءوز تاجىريبەسىمەن ءبولىسۋ ءۇشىن قىزىلورداعا شاقىرىلادى.
سەۋل ۇلتتىق عىلىم جانە تەحنولوگيالار ۋنيۆەرسيتەتى – كورەيادا 1910 جىلى نەگىزى قالانعان ۇلتتىق ۋنيۆەرسيتەت. وقۋ ورنىندا 23 فاكۋلتەت, 15 مىڭعا جۋىق ستۋدەنت بار. سەۋلتەح جوعارى مەكتەبىنىڭ اشىلۋىنا قىزىلوردادا ءومىر سۇرگەن كورەيانىڭ ۇلتتىق باتىرى, گەنەرال حون بوم دو سۇيەگىنىڭ تاريحي وتانىنا قايتارىلۋى ىقپال ەتتى. قايتا جەرلەۋ راسىمىنە حون بوم دونى ەسكە الۋ قوعامى بەلسەندى قاتىستى.
