فوتو: اشىق دەرەككوز
«بۇل 2019 جىلى جازىلعان ءان. 2021 جىلى ءانشى عازيزحان شەكەربەك ورىنداپ شىققان ەدى. ءاندى ستۋديادا ارلەپ, وڭدەپ جازعان سوڭ مەيرامبەك بەسباەۆ اعامىزعا ۇسىندىم. ول كىسى بۇدان باسقا تاعى ءبىر ءانىمدى دە قابىل الىپ ورىندايتىنىن ايتتى. ارادا 2020 جىلى كارانتيندىك شەكتەۋدەن شىعارماشىلىق بايلانىس بىلاي تۇرسىن, «بايتال تۇگىل باس قايعى» بولدى عوي. كەيىن مەيرامبەك اعامىز عازيزحان شەكەربەككە ۇسىنىپ, سول ءانشى ورىنداپ شىقتى.
ەندى مىنە, ءفيلمنىڭ ءىزاشارى (ساۋندترەك) رەتىندە جازىلىپ, تىڭداۋشى قاۋىمنىڭ ىستىق ىقىلاسىنا بولەندى. ءاننىڭ بەينەبايانى دا عالامتوردا كوپ قارالىپتى.
«سەزىم ءۇشىن» ءانىنىڭ و باستاعى ءماتىنىن اقىن قالقامان ساريننىڭ كىتابىنان العان ەدىم. بەرتىندە اقبەرەن ەلگەزەككە مەيرامبەك بەسباەۆ ء اندى تىڭداتىپ, قايتا ءسوز جازساڭ دەگەن ۇسىنىس ايتقان ەكەن. وسىلايشا اقىن اقبەرەن مەن سازگەر تالعات اراسىنداعى تۇتاسىپ كەتكەن بايلانىستان اسەم ءان تۋدى دەپ ويلايمىن. عازيزحان باۋىرىمىزدىڭ ورىنداۋىندا دا تىڭداۋشىنىڭ جۇرەگىنەن جول تاپتى دەپ سانايمىن. داريعا بادىقوۆا تۇسىرگەن ءفيلمنىڭ ساۋندترەگى رەتىندە جازىلىپ, تىڭداۋشى مەن كورەرمەننىڭ مەرەيىن وسىرگەنىنە قۋانىشتىمىن. ءتىپتى بەرتىنگە دەيىن كوپ ادام «سەزىم ءۇشىن» ءانىنىڭ سازىن جازعان تالعات لەس ەكەنىنەن دە بەيحابار بولدى. مەنىڭ ۇعىمىمدا ءان سازگەردىڭ قۇشاعىنان قالىقتاپ شىققان سوڭ حالىققا تيەسىلى بولۋى ءتيىس. تىڭدارمان جوعارى باعالاسا, مەن ءۇشىن ودان اسقان باعا دا, اقشا دا ءتىپتى ماراپات تا جوق. سوندىقتان دا ءان ساتىپ قوماقتى پايدا تابۋ دەگەن مەنىڭ تابيعاتىما جات. اقبەرەن ەلگەزەك اقىنمەن دە شىعارماشىلىق بايلانىسىمىزدى دامىتا ءتۇسىپ, الداعى ۋاقىتتا باسقا دا ولەڭدەرىنە ءان جازۋدى كوزدەپ ءجۇرمىن», دەدى سازگەر.
