بۇل باعدارلامادا كەيىپكەرمەن تەك سۇحبات قۇرىلىپ قانا قويماي, كەلگەن قوناقتىڭ ارمانداعان دۇنيەسىنە قول جەتكىزىپ, ءبىر ءسات سەزىنۋىنە مۇمكىندىك بەرىلەدى.
ءتۇسىرىلىم بارىسىندا روزا قۋانىشقىزى الماتى-2 جانە الماتى-1 ستانتسيالارى ارالىعىندا جولسەرىك ءرولىن اتقاردى. بۇل از عانا ساپار كەزىندە جولسەرىك رولىندەگى سۇيىكتى انشىلەرىن كورگەن جولاۋشىلاردىڭ قۋانىشىندا دا شەك بولماعان. ءوزى دە تەمىرجولشىنىڭ قىزى بولعان ءانشىنىڭ بۇل ماماندىقتى ارمانداۋى تەگىننەن تەگىن بولماسا كەرەك.
ايتا كەتەيىك, روزا رىمباەۆا بۇرىنعى سەمەي وبلىسى جارما اۋدانى جاڭعىزتوبە ستانتسياسىندا تەمىرجولشى وتباسىندا دۇنيەگە كەلگەن. كۇنى-ءتۇنى جولاۋشىلار جانە جۇك پويىزدارى ەرسىلى-قارسىلى وتەتىن ستانتسيادا توقتاعان ۆاگونداردى, ايالداعان جولسەرىكتەردى كورىپ, فورما كيگەن تەمىرجول قىزمەتكەرلەرىنە قىزىعۋى زاڭدى دا. ونىڭ ۇستىنە ۇنەمى جۇمىستا بولاتىن اكەسىن ۇيگە كەلگەندە قۋانا قارسى الىپ, تەمىردەي تارتىپكە نەگىزدەلگەن قىزمەتىنىڭ اۋىرلىعى دا, جاۋاپكەرشىلىگى دە زور ەكەنىن سەزىنىپ وسەدى. دەگەنمەن تەمىرجولشى قۋانىش رىمباەۆتىڭ 8 بالاسىنىڭ كوبى ونەرگە جاقىن بولىپ, سونىڭ ىشىندە روزا قازاق ءان ونەرىندە جۇلدىز بولىپ جارقىرادى.
باعدارلامانىڭ ءساتتى شىعۋى ءۇشىن تەلەارنا ۇجىمى «قتج» ۇك» اق-دان پويىزداعى ءتۇسىرىلىمدى ۇيىمداستىرۋعا كومەك سۇراعان. وسىلايشا الماتى-شامالعان نەمەسە الماتى-قاپشاعاي باعىتىنداعى جولاۋشىلار پويىزىنا رۇقسات العان ءتۇسىرىلىم توبىنا قتج, ياعني «جولاۋشىلار تاسىمالى» اق تاراپىنان ءانشىنىڭ دەنە ولشەمىنە سايكەس جولسەرىك كيىمى ۇسىنىلعان. سونىمەن قاتار تەمىرجولشىلار انشىگە جولسەرىكتىڭ جۇمىسىن تۇسىندىرەتىن نۇسقاۋلىق بەرگەن. وسىلايشا بالا كۇنگى ارمانى تەمىرجولشىلاردىڭ قولداۋىمەن ءبىر ساتكە ورىندالىپ قۋانىشقا بولەنگەن ءانشى بولات جولداعى بارلىق قىزمەتكەرلەرگە العىسىن ءبىلدىردى.
