وتىرىسقا پارلامەنتتىك كوميسسيانىڭ مۇشەلەرى, مەملەكەتتىك ورگانداردىڭ وكىلدەرى, ونىڭ ىشىندە شىعىس قازاقستان وبلىسى اكىمدىگىنىڭ باسشىلىعى مەن ءماسليحات دەپۋتاتتارى, حالىقارالىق ۇيىمدار مەن ساراپشىلار قاۋىمداستىعىنىڭ وكىلدەرى قاتىسىپ, بۇۇ-نىڭ قازاقستانداعى دامۋ باعدارلاماسى مەن ەكونوميكالىق زەرتتەۋلەر ينستيتۋتىنىڭ ساراپشىلارى ءسوز سويلەدى.
پالاتا توراعاسىنىڭ ورىنباسارى ءوز سوزىندە اۋانىڭ لاستانۋىنان تۋىندايتىن پروبلەمالاردىڭ قاۋپىنە نازار اۋداردى جانە كوميسسيانىڭ الداعى جۇمىسىنداعى بىرقاتار نەگىزگى مىندەتتى بەلگىلەدى.
«ورنىقتى دامۋ ماقساتتارىندا 2030 جىلعا قاراي قالالارداعى تەرىس ەكولوگيالىق اسەردى ازايتۋ, ونىڭ ىشىندە اۋا ساپاسىنا ەرەكشە نازار اۋدارۋ جانە قورشاعان ورتاعا تەرىس اسەردى تومەندەتۋ مىندەتى بەلگىلەندى. 2022 جىلى قازاقستاندا اۋانىڭ لاستانۋىنا مونيتورينگ جۇرگىزىلگەن 69 ەلدى مەكەننىڭ 30-ى جوعارى جانە وتە جوعارى لاستانۋ دارەجەسىنە جاتادى. بۇل اسىرەسە ونەركاسىپ سەكتورىنداعى ينفراقۇرىلىمى دامىعان جانە كولىك ماگيسترالى بار وڭىرلەرگە قاتىستى. ولاردىڭ قاتارىنا وسكەمەن قالاسى دا كىرەدى», دەپ اتاپ ءوتتى ولگا پەرەپەچينا.
سەناتور اتاپ وتكەندەي, وسىعان بايلانىستى ءبىرىنشى كەزەكتەگى مىندەت – تاۋ-كەن جانە مەتاللۋرگيا سالاسى كاسىپورىندارىنىڭ قىزمەتىنە مونيتورينگ جۇرگىزۋ. ءوندىرىس قالدىقتارىنىڭ شىعارىندىلارى مەن كادەگە جاراتۋ دەڭگەيىن تومەندەتۋ جونىندەگى تەتىكتى مۇقيات پىسىقتاۋ قاجەت.
سەنات توراعاسىنىڭ ورىنباسارى جەرگىلىكتى اتقارۋشى ورگانداردى تاعى ءبىر ماڭىزدى باعىتقا – جەكە سەكتورعا گاز جەتكىزۋ, قولدانىستاعى جىلۋ ەلەكتر ورتالىقتارىن جاڭعىرتۋ مەن جەتىلدىرۋگە نازار اۋدارۋعا شاقىردى.
ەكولوگيا جانە تابيعي رەسۋرستار ءمينيسترىنىڭ ورىنباسارى مانسۇر وشۋرباەۆ ءوز كەزەگىندە ارىپتەستەرىن سالا بويىنشا ودم-ءنىڭ مىندەتتەرىن ىسكە اسىرۋ بارىسىمەن تانىستىرىپ, وسى باعىتتاعى بىرلەسكەن جۇمىسقا قاتىستى ۇسىنىستارىن ايتتى.
وبلىستىڭ مامانداندىرىلعان تابيعات قورعاۋ پروكۋرورى الەكساندر اكۋلوۆ شقو-دا تابيعاتتى قورعاۋ زاڭناماسىنىڭ قانداي بۇزۋشىلىقتارى ءجيى كەزدەسەتىنى جانە ولاردى ازايتۋ ءۇشىن قانداي شارالار قولدانۋ كەرەكتىگى تۋرالى باياندادى.
ەكونوميكالىق زەرتتەۋلەر ينستيتۋتىنىڭ باسقارما توراعاسى رۋسلان سۇلتانوۆ جۇرگىزىلگەن ساراپتامالار مەن عىلىمي-تاجىريبەلىك زەرتتەۋلەردىڭ ناتيجەلەرىنە توقتالا كەلىپ, ستراتەگيالىق سيپاتتاعى ۇردىستەردى اتاپ ءوتتى. ساراپشىنىڭ پىكىرىنشە, ماسەلەنى شەشۋ بارلىق مۇددەلى تاراپتاردىڭ كەشەندى شارالاردى ۋاقتىلى قابىلداۋىنا بايلانىستى.
جۇمىس كەڭەسىنىڭ قورىتىندىسى بويىنشا پارلامەنتتىك كوميسسيانىڭ كەزەكتى وتىرىسىنا دايىندىق اياسىندا جۇمىسقا قابىلداناتىن وزەكتى ماسەلەلەر مەن ۇسىنىمدار بارىسى ايقىندالدى.
