وسى ۋاقىتقا دەيىن «ارسەلورميتتال تەمىرتاۋعا» قاراستى كەن ورىندارىندا بولعان اپاتتان 100-دەن اسا ادام قازا تاپقان, 150-دەن اسا ادام ءتۇرلى دەڭگەيدەگى جاراقات العان. ونىڭ ىشىندە جاراقاتىنىڭ اۋىرلىعىنان مۇگەدەك بولىپ قالىپ, ەڭبەككە جارامدىلىق قابىلەتىنەن ايىرىلعاندارى دا بار. بىلتىر ءبىر اپتانىڭ ىشىندە بەس جۇمىسشىنىڭ قازا بولعانى ەسىمىزدە. بيىل تامىز ايىندا «كازاحستانسكايا» شاحتاسىندا بولعان ءورت سالدارىنان 4 ادام باقيلىق بولدى.
ساراپشىلاردىڭ ايتۋىنشا, بۇل اپاتتاردىڭ بارلىعى وندىرىستىك قاۋىپسىزدىك ەرەجەلەرىن ساقتاماۋدان تۋىنداعان. بۇل تۋرالى كومپانياعا مەملەكەت تاراپىنان تالاي اۋديت جۇرگىزىلىپ, مونيتورينگ جاسالدى, كومپانيا باسشىلىعىنا تالاي ەسكەرتۋ جاسالدى, ايىپپۇلدار سالىندى.
تامىز ايىنداعى اپاتتان سوڭ پرەزيدەنت قاسىم-جومارت توقاەۆ اتىشۋلى كومپانيانىڭ ورنىنا باسقا ينۆەستور تابۋ تۋرالى ۇكىمەتكە تاپسىرما بەرگەن ەدى. وسى جولعى اپاتتان سوڭ «ارسەلورميتتال تەمىرتاۋ» كومپانياسىمەن ينۆەستيتسيالىق كەلىسىمدى بۇزۋ تۋرالى شەشىم قابىلداندى. بۇل كوپتىڭ ءبىراز ۋاقىتتان بەرى كۇتكەن جاڭالىعى بولعانىمەن, مۇنداي شەشىم ءبىر كۇندە قابىلدانبايدى, سەبەبى ونىڭ قۇقىقتىق استارى كوپ. شاماسى, بىلتىردان بەرى جۇرگىزىلگەن تەكسەرۋلەر مەن بىرنەشە ايدان بەرگى كەلىسسوزدەردىڭ قورىتىندىسى وسىعان اكەلدى.
وسى تۇستا ەسكەرەتىن بىرنەشە ماسەلە بار. «ارسەلورميتتالدىڭ» ورنىنا كىم كەلەدى؟ وتاندىق ينۆەستور بولسا, قۇبا-قۇپ. ەكىنشى ماسەلە – كومپانياعا قاراستى كەن ورىندارىنا تولىق تەكسەرۋ جۇرگىزىپ, ەڭبەك قاۋىپسىزدىگىن قامتاماسىز ەتۋ كەرەك. مەملەكەت ءۇشىن ازاماتتاردىڭ ءومىرى مەن قاۋىپسىزدىگى – ەڭ ءبىرىنشى كەزەكتە تۇرعان ماسەلە. بۇل رەتتە پرەزيدەنتتىڭ اپات ورنىنا دەرەۋ جەتىپ, بار جاعدايعا ءوزى قانىعىپ, ناقتى اقپاراتتى الۋى, شۇعىل شەشىم قابىلداۋى – قۇپتارلىق ءىس.
تاعى ءبىر ماسەلە – مەملەكەتتىڭ حالىقارالىق بيزنەس-قاۋىمداستىق الدىنداعى ينۆەستيتسيالىق بەت-بەينەسىن ساقتاپ قالۋ, قازاقستاننىڭ ەكونوميكاسىنا قارجىسىن سالۋعا دايىن, ءوز ىسىنە ادال شەتەلدىك ينۆەستورلاردى تارتۋ. بۇعان دەيىن «ارسەلورميتتال» كەن ورىندارىنداعى ءوندىرىس قاۋىپسىزدىگىن ساقتاۋعا قاتىستى, جەرگىلىكتى حالىقتىڭ دەنساۋلىعىنا تيگىزگەن زيانى مەن قورشاعان ورتانى لاستاۋدى ازايتۋعا قاتىستى بەرىلگەن شاعىمدار مەن ەسكەرتۋلەردى دۇرىس ورىنداعان جوق. مۇنى دالەلدەيتىن ايعاق جەتكىلىكتى. سوندا دا كومپانيامەن كەلىسىمشارتتى بىرجاقتى تۇردە بۇزۋ حالىقارالىق دەڭگەيدەگى جانجالعا اپارماۋىن قاداعالاۋ كەرەك. ياعني مەملەكەت مۇددەسىن كىم قالاي قورعايدى دەگەن ماسەلەنى ءجىتى قاراۋ كەرەك. بۇل ورايدا, پرەزيدەنتتىڭ كاسىبي بيلىكتىلىگى, حالىقارالىق ارەناداعى تاجىريبەسى مەن بەدەلى كومەك بولارى ءسوزسىز.
ابزال قۇسپان,
ءماجىلىس دەپۋتاتى
