وبلىس باسشىلىعى ءوڭىر ەكونوميكاسىنا جاڭا لەپ اكەلەتىن جوبالاردى قولداۋعا دايىن. بىراق سونىڭ جولىن تابۋدىڭ وڭايعا تۇسپەي جاتقانى دا راس. دەگەنمەن ايماققا وبلىس قۇرىلعاننان بەرگى العاشقى شەتەلدىك ينۆەستورلار دا كەلە باستادى. ولاردىڭ ۇسىنعان جوباسى حالىقتىڭ دا كوڭىلىنەن شىقتى.
مىسالى, جەزدى كەنتىندە كرەمني زاۋىتىن سالۋعا قىتايلىق كاسىپكەرلەر شاو حانمينگ پەن مي رونگ قاتىسۋعا نيەت تانىتتى. مۇنداعى جوبانىڭ جالپى قۇنى 7,5 ملرد تەڭگەنى قۇرايتىن بولسا, قىتايلىق كومپانيا وسىنىڭ 20 پايىزىن قۇيۋدى كوزدەپ وتىر. قالعان قاراجاتتى ءوزىمىزدىڭ كاسىپكەرلەر كوتەرەدى. جاڭا زاۋىت ىسكە قوسىلعاندا 200 جۇمىس ورنى اشىلماق. قىتاي جاعىنان 40 شاقتى مامان شاقىرىلادى. ولار – وسى زامانعى تەحنولوگيانىڭ ءتىلىن مەڭگەرگەن ماماندار.
ەكىجاقتى ارىپتەستىك اياسىندا اشىلاتىن زاۋىت ەكولوگياعا دا باسا ءمان بەرمەك.
– ءبىز جەرگىلىكتى حالىقتىڭ الاڭداۋشىلىعىن جاقسى تۇسىنەمىز. سوندىقتان زاۋىتتا سۇزگىلەۋ, ياعني فيلترلەۋ جۇيەسى ورناتىلادى, شاڭ, توزاڭ سىرتقا شىقپايدى,– دەپ سەندىردى قىتايلىق كومپانيا وكىلدەرى كەنت تۇرعىندارىنا زاۋىتتى تانىستىرۋ بارىسىندا. زاۋىت جوسپار بويىنشا 2024 جىلدىڭ تامىزىندا پايدالانۋعا بەرىلەدى.
وتاندىق «تەحنوگرۋپپسەرۆيس» جشس مەن قىتايلىق «Sinohydro Engineering Bureau Machinery and Equipment Co.Ltd» كومپانياسىنىڭ بىرلەسكەن ەكى جوباسى ۇلىتاۋ وبلىسىنداعى جاسىل ەنەرگيا وندىرىسىنە باعىتتالعان.
جۋىردا وبلىس اكىمى بەرىك ابدىعالي ۇلى اتالعان ەكى كومپانيا باسشىسىمەن ۇشجاقتى مەموراندۋمعا سالتاناتتى تۇردە قول قويدى.
جالپى قۇنى 489 ملرد تەڭگە كولەمىندەگى ينۆەستيتسيالىق جوبالاردىڭ ءبىرى – جەل ەنەرگياسىن وندىرەتىن ستانسا بولسا, ال ەكىنشىسى – وسىنداي ستانسالارعا قاجەتتى مۇنارا وندىرەتىن زاۋىت بولماق.
– ءبىز ەكى جوبانى دا تولىق قولداپ, قۋاتتاپ وتىرمىز. سوندىقتان ستانسا ورناتۋ ءۇشىن وبلىستىڭ جاڭاارقا اۋدانىنان 20 مىڭ گەكتار, ال زاۋىت سالۋ ءۇشىن جەزقازعان ماڭىنان 20 گەكتار جەر بولدىك. ستانسا 3,4 ملرد كيلوۆات ەنەرگيا وندىرەدى. بۇل ءبىزدىڭ قاجەتىمىزدى تولىقتاي قامتاماسىز ەتەدى. ارزان ەنەرگياعا قول جەتكىزەمىز. ەگەر مۇمكىندىگى كەلىپ جاتسا, ارتىق ەنەرگيانى ەلىمىزدىڭ باسقا وڭىرلەرىنە جەتكىزبەكپىز, – دەدى وبلىس اكىمى ۇشجاقتى مەموراندۋمعا قول قويۋ ءراسىمى كەزىندە.
«Sinohydro Deputy» كومپانياسىنىڭ ديرەكتورى جي جەن ۆەي جەل ستانساسى مەن زاۋىتتىڭ ۇلىتاۋ وبلىسىنىڭ ەكونوميكاسىن كوتەرۋگە وزىندىك ۇلەسى بار جوبالار ەكەنىن اتاپ ءوتتى. سەرىكتەسىنىڭ ءسوزىن «تەحنوگرۋپپسەرۆيس» كومپانياسىنىڭ جەتەكشىسى جومارت مومىنباەۆ ودان ءارى ناقتىلاي ءتۇستى.
– «Sinohydro Deputy» كومپانياسى – الەمدىك نارىقتا جاسىل ەنەرگيا سالاسىنداعى ايگىلى كومپانيا, تاجىريبەسى مول.سوندىقتان مۇنداي كومپانيامەن سەرىكتەسكە اينالۋ, بىرلەسكەن جوبانى جۇزەگە اسىرۋ مۇمكىندىگى تۋعانىنا قۋانىشتىمىز. جەزقازعاندا سالىناتىن زاۋىتتىڭ ەلىمىزدە بالاماسى جوق. جوبا بويىنشا زاۋىت جىلىنا 100 مۇنارا شىعارادى. ال ونىڭ قۋاتى 500-600 مەگاۆاتقا جەتەدى, – دەدى ول.
اۋقىمدى جوبالاردى ىسكە اسىرۋ 2024 جىلدان باستالادى. جوبالار تولىقتاي پايدالانۋعا بەرىلىپ, ىسكە اسقان كەزدە وبلىستا جاڭادان 300 تۇراقتى جۇمىس ورنى پايدا بولماق.
ۇلىتاۋ وبلىسى
