جول سالۋدى قارجىعا قول سالۋ دەپ تۇسىنەتىن قايسىبىر مەردىگەرلەر مەن پىسىقاي شەنەۋنىكتەردىڭ جىمىسقى ارەكەتى مەملەكەت باسشىسىنىڭ دا نازارىنان تىس قالعان جوق. «ادىلەتتى قازاقستاننىڭ ەكونوميكالىق باعدارى» اتتى قازاقستان حالقىنا ارناعان جولداۋىندا قاسىم-جومارت توقاەۆ جول سالۋ جۇمىسىنا قاداعالاۋدى كۇشەيتۋدى شەگەلەپ تاپسىردى. ءتىپتى, پرەزيدەنت ەلدەگى جولداردىڭ جايى جۇرتتىڭ جۇيكەسىن شىمىرلاتاتىنىن دا قاداپ ايتتى.
«اۆتوكولىك جولدارىنىڭ قۇرىلىسى ماسەلەسى شەشىمىن تابۋى ءتيىس. قازىر ونىڭ ساپاسى سىن كوتەرمەيدى. ءتيىستى جۇمىستار ۋاقتىلى جانە ساپالى جاسالمايدى. جەمقورلىق بەلەڭ الىپ تۇر, باسەكە دە جوقتىڭ قاسى. مۇنىڭ ءبارى - وسى سالادا تامىر جايعان كەمشىلىكتەر. سوندىقتان جىل سوڭىنا دەيىن ناقتى شارالار قابىلداۋ قاجەت. مىندەتىن ادال اتقارماعان كومپانيالار زاڭ بويىنشا جاۋاپقا تارتىلادى. بۇل ماسەلەگە باسا نازار اۋدارامىن. باقىلاۋدى كۇشەيتىپ, جاڭا نورماتيۆتىك قۇجاتتار قابىلداۋ كەرەك», دەگەن پرەزيدەنت ءسوزىنىڭ جانى بار.
مەملەكەتىمىزدە جول سالۋ, قايتا قۇرۋ, جوندەۋ جانە كۇتىپ ۇستاۋ, سونداي-اق جول اكتيۆتەرىن باسقارۋ سالاسىنداعى جۇمىستار مەن ماتەريالداردىڭ ساپاسىن سارالاۋ جۇمىستارى «جول اكتيۆتەرى ۇلتتىق ساپا ورتالىعىنىڭ» نەگىزگى مىندەتى رەتىندە بەلگىلەنگەن.
كاسىپورىننىڭ وڭىرلىك فيليالى جىل ىشىندە از جۇمىس اتقارماعان. ساپا جانە ەسەپ ءبولىمىنىڭ ينجەنەرى تويشىباي الياحمەتوۆ كەلتىرگەن دەرەككە جۇگىنسەك, «جول اكتيۆتەرى ۇلتتىق ساپا ورتالىعىنىڭ» جامبىل وبلىستىق فيليالى از ۋاقىت ىشىندە 211 نىسانعا ارنايى ات باسىن بۇرىپ, 431 رەت ىسساپارمەن بارعان. ناتيجەسىندە جول-قۇرىلىسىنا قاجەتتى ماتەريالداردان 1253 دانا ۇلگى الىنعان. البەتتە, از ەمەس, بىراق ساپا جاعى ءماز ەمەس. نەگە دەيسىز عوي؟ سىناقتان وتكىزىلگەن 123 دانا ماتەريالدىڭ تالاپقا ساي كەلمەيتىنى ناقتىلانىپتى.
«ماماندار انىقتاعان كەمشىلىكتەر بويىنشا تاپسىرىس بەرۋشى تاراپ پەن مەردىگەر ۇيىمدارعا ءتيىستى حات جولداندى. مەردىگەر كومپانيالار جاۋاپكەرشىلىك جۇگىن سەزىنىپ, جۇمىستىڭ ساپالى اتقارىلۋىنا دەن قويسا دەيمىز. اسىرەسە, اسفالت بەتون جابىندىسىن ورناتۋ تەحنولوگياسىنا ايرىقشا نازار اۋدارسا دەگەن تىلەك بار. ساپاسىز سالىنعان جول تالاي وقيعانىڭ سەبەبىنە اينالۋى ىقتيمال. وكىنىشكە قاراي, بۇگىندە ەل ىشىندەگى تاس جولداردىڭ ساپاسى سىن كوتەرمەي تۇر. بۇل ماسەلەگە مەملەكەت باسشىسى دا ايرىقشا دەن قويدى. الداعى ۋاقىتتا مەردىگەرلەردىڭ جۇمىسىنا باقىلاۋدى كۇشەيتۋ كەرەك», دەيدى ت. الياحمەتوۆ ماسەلەنىڭ مانىسىنە ءۇڭىلىپ.
باسقانى بىلاي قويعاندا جول سالۋ جۇمىستارىنا ميللياردتاعان قاراجات قاراستىرىلاتىنى انىق. قىرۋار قارجى جۇمسالسا دا جول ماسەلەسى ءالى كۇنگە دەيىن شەشىمىن تاپپاي تۇر. اقىلى جولعا اقشا تولەپ جۇرگەن اقىلدى كولىك جۇرگىزۋشىلەرىنىڭ دە ايتارى از ەمەس. حالىقتان تۇسكەن سالىق ەسەبىنەن سالىنعان جولدىڭ ساپالى بولعانىن قالايدى ولار. الايدا سالادا قالىپتاسقان ولقىلىق تىيىلار ەمەس.
«جول اكتيۆتەرى ۇلتتىق ساپا ورتالىعى» وڭىرلىك فيليالىنىڭ قىزمەتكەرلەرى بيىلعى جىلدىڭ 9 ايىندا 309 نىسانعا 559 رەت ءىسساپارلاتىپ ارنايى بارعان. جۇمىس پروتسەسىندە جول-قۇرىلىس ماتەريالدارىنىڭ 1736 داناسىنان ۇلگى الىنىپ, ونىڭ 266-سى نورماتيۆتىك تالاپتارعا ساي كەلمەيتىنىن انىقتاعان. جۇرگىزىلگەن جۇمىستاردىڭ ناتيجەسىندە ءتيىستى تاراپتارعا 121 حات جولداپتى. مامانداردىڭ ايتۋىنشا, جۇمىس پروتسەسى بارىسىندا اسفالت-بەتون جامىلعىسىن ءتيىستى دەڭگەيدە تىعىزداماۋ ماسەلەسى كوزگە ۇرىپ تۇر ەكەن.
وڭىرلىك فيليالداعى ماماندار ومىرلىك ماسەلەنى العا تارتىپ وتىر. قىسقاسى جول قۇرىلىسىنا جاۋاپتى بارلىق تاراپ جول سالۋدى قارجىعا قول سالۋمەن شاتاستىرماۋى كەرەك. سوندا عانا پرەزيدەنت تاپسىرماسى تولىقتاي ورىندالماق.
