سۋرەتتى تۇسىرگەن – دميتري ەروفەەۆ
ايتۋلى ءىس-شارانىڭ بەتاشار ءسوزىن العان وبلىس اكىمىنىڭ ورىنباسارى رۋستام ءالي اۋەلى ءوڭىر باسشىسىنىڭ ىستىق سالەمىن جەتكىزىپ, رۋحانيات ءۇشىن, ءتۇبى ءبىر تۇركى حالىقتارىنىڭ ونەرىن ورىستەتۋ ءۇشىن وسىنداي فەستيۆال كەرەك ەكەنىن اتاپ ءوتتى. ونەرى وركەندەگەن ەلدىڭ وركەنيەتى ءتۇزۋ, كەلەشەگى كەمەل بولاتىنىن اتادى. «Biken» I حالىقارالىق تەاتر فەستيۆالىنە قاتىسقان بارشا ونەر ۇجىمىنا وبلىس اكىمىنىڭ العىس حاتىن تابىستادى. سونداي-اق بياپا تەاترىندا ەسەلى ەڭبەك ەتىپ, ونەردىڭ دامۋىنا ۇلەس قوسىپ جۇرگەن امان قوجابەكوۆ, ايگەرىم بەكتەمىروۆا, نۇرگۇل كەمەرباەۆا, دۋلات جارباسوۆ, ۇلدار وڭعاربەكقىزى, ۇلجالعاس ءجۇمادىلوۆا, سالتانات اسحانباەۆا سىندى تەاتر قىزمەتكەرلەرىنە مادەنيەت جانە اقپارات مينيسترلىگىنىڭ العىس حاتىن تابىستادى.
تۇركسوي حالىقارالىق ۇيىمىنىڭ باس حاتشىسى سۇلتان راەۆ ب.ريموۆا اتىنداعى دراما تەاترىندا ەڭبەك ەتىپ, ونەرى مەن ءومىرىن كوپكە ارناعان دينا نۇرعاليەۆاعا «قۇرمەت» وردەنىن تابىستاسا, الماحان كەنجەبەكوۆا, ەرلىك جۋاسبەك, ۇلان احمەتوۆ, داستان پىشانوۆ, روزا قاپاشەۆانى تۇركسوي ۇيىمىنىڭ 30 جىلدىعىنا ارنالعان مەرەكەلىك مەدالمەن ماراپاتتادى. ءوز كەزەگىندە فەستيۆالعا قاتىسقان 5 مەملەكەت جانە ەلىمىزدىڭ تۇكپىر-تۇكپىرىنەن كەلگەن تەاترلار تۇركسوي حالىقارالىق ۇيىمىنىڭ العىس حاتىمەن مەرەيلەندى.
ساحنا ساڭلاعىنىڭ عاسىر تويىنا وراي العاش رەت وتكەن حالىقارالىق فەستيۆال قورىتىندىسى بويىنشا «اmanat» پارتياسى تاعايىنداعان ارنايى جۇلدەنى (300 مىڭ تەڭگە) ج.ايماۋىتوۆ اتىنداعى پاۆلودار وبلىستىق قازاق مۋزىكا-دراما تەاترى ەنشىلەدى. ال عاجايىپ تۇلعا شولپان جانداربەكوۆادان ءدارىس العان شاكىرتتەرى ش.جانداربەكوۆا اتىنداعى ارنايى جۇلدە تاعايىنداپ, وعان ورالحان بوكەيدىڭ «اتاۋ-كەرە» قويىلىمىندا كەلىن ءرولىن سومداعان س.سەيفۋللين اتىنداعى قاراعاندى وبلىستىق اكادەميالىق دراما تەاترىنىڭ ءارتىسى انەل ساعىندىقوۆانى لايىقتى دەپ تاپتى. بياپا تەاترىنىڭ ىرگەتاسىن قالاعان جەتىسۋلىق ونەر وشاعىنىڭ ارداگەر بۋىنى تاعايىنداعان ب.ريموۆا اتىنداعى ارنايى جۇلدەنى ع.مۇسىرەپوۆ اتىنداعى قازاق مەملەكەتتىك بالالار مەن جاسوسپىرىمدەر تەاترىنىڭ اكتريساسى اقبوتا راحات يەلەندى.
سول سەكىلدى, ء«ۇمىت» اتالىمى بويىنشا الماتىلىق «جاڭا عاسىر» تەاترىنىڭ ءارتىسى ماقپال قاسەنوۆا, «ۇزدىك رەجيسسەرلىك شەشىم» اتالىمى بويىنشا س.سەيفۋللين اتىنداعى قاراعاندى وبلىستىق اكادەميالىق تەاترىنىڭ رەجيسسەرى ايبىن سالبان, «ۇزدىك 2 پلانداعى ەر ادام بەينەسى» اتالىمى بويىنشا ب.ريموۆا اتىنداعى تالدىقورعان دراما تەاترىنىڭ اكتەرى ساعىندىق ءجۇمادىل, «ۇزدىك ەكىنشى پلانداعى ايەل ادام بەينەسى» ازەربايجان مەملەكەتتىك يۋح تەاترىنىڭ ءارتىسى مەگديزادە گيۋنەش ماراپاتتالدى. ال «ۇزدىك ەر ادام بەينەسى» اتالىمى بويىنشا ن.ءجانتورين اتىنداعى ماڭعىستاۋ وبلىستىق مۋزىكالىق دراما تەاترىنىڭ اكتەرى جانعازى رىسقۇل, «ۇزدىك ايەل ادام بەينەسى» اتالىمى بويىنشا مۋزىكالىق جاس كورەرمەن تەاترىنىڭ ءارتىسى شىنار قالدىباي مەرەيلەندى.
كۇللى ەلدى شاتتىققا بولەگەن شىرايى بولەك دودادا ارنايى تاعايىندالعان بيكەن ريموۆا اتىنداعى جۇلدەنى ج.ايماۋىتوۆ اتىنداعى پاۆلودار قازاق مۋزىكالىق-دراما تەاترى «ۇجدان» قويىلىمى ءۇشىن (700 مىڭ تەڭگە) ەنشىلەدى. ال تۇركسوي ۇيىمىنىڭ ارنايى جۇلدەسىن تالدىقورعاندىق ب.ريموۆا اتىنداعى دراما تەاترى (1 مىڭ دوللار) ۇتىپ الدى. وسىلايشا, كوپتىڭ كوڭىلىن شالقىتقان, كورەرمەنگە رۋحاني ازىق سىيلاعان عاجايىپ فەستيۆالدىڭ العاشقى جەڭىمپازى ءارى «ەڭ ۇزدىك قويىلىم» اتالىمىنىڭ يەگەرى – ع.مۇسىرەپوۆ اتىنداعى قازاق مەملەكەتتىك بالالار مەن جاسوسپىرىمدەر تەاترى دەپ تانىلىپ, وبلىس اكىمىنىڭ ورىنباسارى رۋستام ءاليدىڭ قولىنان 1 ميلليون تەڭگەلىك سەرتيفيكات الدى. ايتا كەتەرلىگى, فەستيۆال جەڭىمپازدارى دودا بارىسىندا فەدەريكو گارسيا لوركانىڭ «بەرناردا البانىڭ ءۇيى» قويىلىمىن ساحنالاعان ەدى.
جەتىسۋ وبلىسى
