بۇگىندە جاسوسپىرىمدەر اراسىنداعى بۋللينگ ماسەلەسى قوعامدى ابىگەرگە سالدى. وقۋشىلار اراسىنداعى تۇسىنىسپەۋشىلىك, ءبىر-بىرىنە ءجابىر كورسەتۋى الەۋمەتتىك جەلىنىڭ اسەرىنەن بولۋى مۇمكىن. بۇگىندە پسيحولوگتەر سوعان ساي جۇمىس ىستەپ جاتىر. مەملەكەت باسشىسى قاسىم-جومارت توقاەۆ جاقىندا جولداۋىندا: «مەن مەملەكەت باسشىسى رەتىندە كامەلەتكە تولماعاندارعا جاسالعان زورلىق-زومبىلىقتىڭ كەز كەلگەن تۇرىنە قاتىستى جازانى كۇشەيتۋدى تالاپ ەتەمىن. جول, عيمارات, كيىم-كەشەك, ازىق-ت ۇلىك, ياعني بارلىعى بالالار ءۇشىن قاۋىپسىز بولۋى كەرەك. سونداي-اق وسكەلەڭ ۇرپاقتىڭ پسيحيكالىق ساۋلىعى – وتە ماڭىزدى ماسەلە.ءبىلىم بەرۋ مەكەمەلەرىندەگى پسيحولوگيالىق قولداۋ قىزمەتىن ينستيتۋتسيونالدى تۇردە كۇشەيتۋ قاجەت. بىرىڭعاي سەنىم تەلەفونىن ۇيىمداستىرعان ءجون. زورلىق-زومبىلىققا جانە قىسىمعا, ياعني بۋللينگكە تاپ بولعاندارعا كومەك كورسەتۋگە ارنالعان باعدارلاما ازىرلەۋ كەرەك», دەپ اتاپ وتكەن ەدى.
بۇل رەتتە رەسمي مالىمەتتەر كوڭىلگە قاياۋ سالادى. قاراڭىز, ەلىمىزدە 11-15 جاستاعى ءاربىر بەسىنشى ءجاسوسپىرىم اي سايىن بۋللينگ قۇربانى نەمەسە قاتىسۋشىسى بولادى. ياكي دەگبىرسىز دەرت جاستار اراسىندا ءورشىپ تۇر دەگەن ءسوز. سوندىقتان ءبىلىم وشاقتارىندا وقۋشىلاردىڭ تاربيەسىنە كوبىرەك كوڭىل ءبولىپ, اتا-انالارىمەن دە جۇمىس ىستەۋ ماڭىزدى. مەملەكەت باسشىسى بۇل سالاداعى ماسەلەلەردى شەشۋدە مۇعالىمدەردىڭ بىلىكتىلىگىن ارتتىرۋ اۋاداي قاجەتتىگىن ايتقان بولاتىن. وسى ورايدا ءوڭىر باسشىسى بەيبىت يساباەۆتىڭ باستاماسىمەن «ادەپ-تاربيە جونىندەگى مەنتور» جوباسى جۇزەگە استى. بيىلعى وقۋ جىلىنان باستاپ مەكتەپ قابىرعاسىندا ارنايى ماماندار قىزمەت كورسەتەدى.
«زورلىق-زومبىلىق ۇلدار اراسىندا كوبىرەك تارالعان جانە بۇل – وتە الاڭداتارلىق ماسەلە. بۇل رەتتە «جاستار رۋحى» جاستار قاناتى جۇيەلى تۇردە جۇمىس ىستەپ كەلەدى. مىسالى, پرەزيدەنت جولداۋدا بالالارىمىزعا جول, عيمارات, كيىم-كەشەك, ازىق-تۇلىك, ياعني بارلىعى بالالار ءۇشىن قاۋىپسىز بولۋى كەرەكتىگىن اتاپ ءوتىپ, بۇل باعىتتا ءبىزدىڭ تاراپتان «قاۋىپسىز قالا», «تۇنگى قالاداعى بالالار» سىندى شارالار ۇيىمداستىرىلىپ كەلەدى», دەيدى وبلىستىق ءماسليحات دەپۋتاتى ەركەبۇلان اقبولاتوۆ.
اتالعان جوبا قاناتقاقتى رەجىمدە تالدىقورعان قالاسىندا جۇيەلى تۇردە جۇمىس ىستەمەك. ازىرگە جوبالىق كەڭسەنىڭ باسشىسى ءمادينا اتايباەۆا جانە قوسىمشا 2 مامان قىزمەت اتقارادى. ولاردىڭ نەگىزگى مىندەتى – ءبىلىم بەرۋ ۇردىسىندە ەتيكالىق تاربيە, زاڭ ۇستەمدىگى قاعيداتتارىن ىسكە اسىرۋعا ىقپال ەتۋ. سونداي-اق كەمسىتۋشىلىك, زورلىق-زومبىلىق جانە قۇقىققا قارسى مىنەز-ق ۇلىقتىڭ بارلىق ءتۇرىنىڭ الدىن الۋ ماسەلەلەرى بويىنشا ءىس-شارالار ۇيىمداستىرۋ. قازىر ماماندار وڭىردەگى مەكتەپتەرمەن بىرلەسە جۇمىس ىستەپ, تاربيە ساعاتتارىن وتكىزەدى.
«بيىل 27 ماۋسىمنان 4 تامىزعا دەيىن مەنتورلاردى تارتۋ ماقساتىندا بىلىكتىلىك تالاپتارىن ەسكەرە وتىرىپ, ۇمىتكەرلەردى ىرىكتەۋدىڭ 4 لەگى جۇرگىزىلدى. ىرىكتەۋدىڭ 4 لەگىنىڭ قورىتىندىسىندا 43 ۇمىتكەر وڭ باعا الدى جانە جوبا ماقساتى بويىنشا وقىتۋدان ءوتتى. الايدا ونىڭ 12-ءسى ءوز ەركىمەن قاتىسۋدان باس تارتتى. ال 31-ءى كوميسسيا قاراۋىنىڭ قورىتىندى وتىرىسىنا قاتىسىپ, «ادەپ-تاربيە جونىندەگى مەنتور» لاۋازىمىنا تاعايىندالدى. وسىلايشا, مەنتورلاردىڭ بىلىكتىلىك قابىلەتتەرىنە ساي قالا مەكتەپتەرىنىڭ كونتينگەنتىن ەسكەرە وتىرىپ بەكىتىلدى», دەيدى م.اتايباەۆا.
ونىڭ ايتۋىنشا, 7-11 تامىز ارالىعىندا تالدىقورعان قالاسىنىڭ مەنتورلارى, تاربيە ءىسى جونىندەگى ديرەكتور ورىنباسارلارى, پەداگوگ-پسيوحولوگتەرى جانە الەۋمەتتىك پەداگوگتەرىنىڭ قاتىسۋىمەن ارنايى «El Umiti» قورى» كق ۇيىمداستىرۋىمەن «Smart ustaz» جوباسىنىڭ ترەنينگتەرى وتكەن. جالپى, وقۋ ترەنينگىنە 90 ادام قاتىسقان. ناتيجە جامان ەمەس.
«جاقىندا تالدىقورعان قالاسىنىڭ مەكتەپ ديرەكتورلارىمەن مەنتورلاردىڭ كەزدەسۋى ءوتىپ, بەكىتىلگەن مەكتەپتەر بويىنشا مەكتەپ باسشىلىقتارى مەن مەنتورلار ءوزارا تانىسىپ, ءبىلىم كۇنىنە وراي وتكىزىلەتىن سالتاناتتى جيىن جايلى تالقىلاۋ جۇرگىزىلدى. 1 قىركۇيەكتەن باستاپ مەنتورلار سالتاناتتى جيىندا وزدەرىن تانىستىرىپ, مەنتورلىق جايىندا باياندامالارىن وقىپ, جۇمىستارىنا كىرىسكەن», دەيدى م.اتايباەۆا.
جوبا بويىنشا 2023-2024 وقۋ جىلىنا ارنالعان جۇمىس جوسپارى مەن جول كارتاسى قۇرىلعان. جوسپار بويىنشا قۇقىق قورعاۋ ورگاندارى وكىلدەرىنىڭ قاۋىپسىزدىك قاعيدالارىن ءتۇسىندىرۋ جانە قۇقىق بۇزۋشىلىقتاردىڭ الدىن الۋ ماقساتىندا ءبىلىم الۋشىلارمەن كەزدەسۋ ويلاستىرىلىپ وتىر. الداعى ۋاقىتتا ەلىمىزدىڭ ۇزدىك جوعارى وقۋ ورىندارىنا ەكسكۋرسيا جانە ت.ب. ءىس-شارالار وتكىزىلەدى.
الەۋمەتتىك زەرتتەۋ جۇرگىزۋ ماقساتىندا وبلىستىق دەنساۋلىق ساقتاۋ باسقارماسى, وبلىستىق پسيحيكالىق دەنساۋلىق ورتالىعى, پوليتسيا دەپارتامەنتى, پروكۋراتۋرا جانە جەرگىلىكتى پوليتسيا قىزمەتى باسقارماسىنان مەكتەپ وقۋشىلارى اراسىندا تىركەلگەن قۇقىق بۇزۋشىلىقتار تۋرالى سۇراۋ حات جولداعان. سول ارقىلى ماماندار ناشاقورلىق پەن لۋدومانيا فاكتىلەرى, جىنىستىق قول سۇعىلماۋشىلىق, سۋيتسيد, بۋللينگ جانە كيبەربۋللينگ, زورلىق-زومبىلىق سەكىلدى قىلمىستاردىڭ سەبەبىنە ۇڭىلمەك.
جەتىسۋ وبلىسى
