فوتو: اشىق دەرەككوز
ەڭ تومەنگى جالاقى – قاتارداعى, بىلىكتىلىگى جوق جۇمىسشىعا اقشالاي تولەمدەردى انىقتاۋعا ارنالعان ەڭ تومەنگى ەڭبەك ستاندارتى. بۇل رەتتە جۇمىسكەردىڭ جالاقىسى ونىڭ بىلىكتىلىگىنە, ورىندالاتىن جۇمىستىڭ كۇردەلىلىگىنە, سانى مەن ساپاسىنا قاراي قالىپتاستىرىلادى.
ايتا كەتسەك, قازاقستاندا ەتج مولشەرى 2022 جىلدان باستاپ جىل سايىن ءوسىپ جاتىر. 2024 جىلدىڭ 1 قاڭتارىنان باستاپ 85 مىڭ تەڭگەگە دەيىنگى كەزەكتى ءوسىمدى ەسكەرەتىن بولساق, ءۇش جىل ىشىندە ەتج مولشەرى 2 ەسە ۇلعايتىلادى.
ەڭ ءبىرىنشى كەزەكتە ەتج-نىڭ ءوسۋى «جالاقىسى تومەن» جۇمىسكەرلەرگە اسەر ەتەدى. ەكىنشىدەن, جالاقى دەڭگەيىن بەلگىلەۋ كەزىندە ەتج كورسەتكىشىن پايدالاناتىن جۇمىس بەرۋشىلەر, سونداي-اق رازرياد ارالىق بىلىكتىلىك جۇيەسىن ەسكەرە وتىرىپ, قىزمەتكەرلەردىڭ باسقا ساناتتارىنىڭ جالاقىسىن قايتا قارايتىن بولادى.
وسىنىڭ ناتيجەسىندە بارلىق سالالاردا ءارتۇرلى مەنشىك نىساندارىنداعى كاسىپورىنداردا جۇمىس ىستەيتىن 1,8 ملن-عا جۋىق جالدامالى جۇمىسكەردىڭ, ونىڭ ىشىندە 350 مىڭعا جۋىق بيۋدجەت قىزمەتكەرلەرىنىڭ اقشالاي تابىسى وسەدى.
بۇدان باسقا مەملەكەت باسشىسىنىڭ تاپسىرماسىنا سايكەس قر ەڭبەك جانە حالىقتى الەۋمەتتىك قورعاۋ مينيسترلىگى دۇنيەجۇزىلىك بانكتىڭ ساراپشىلارىمەن بىرلەسىپ ەڭ تومەنگى جالاقى مولشەرىن ايقىنداۋ ادىستەمەسىن ازىرلەدى, وعان سايكەس ەتج مولشەرى مەديانالىق جالاقى مەن ەڭبەك ونىمدىلىگىنە قاراي ايقىندالادى.
سونىمەن قاتار, 2020 جىلدان باستاپ قازاقستاندا ازاماتتىق قىزمەتشىلەردىڭ جالاقى دەڭگەيىن ارتتىرۋ بويىنشا دايەكتى شارالار قابىلدانۋدا.
ماسەلەن, 2020 جىلدىڭ 1 قاڭتارىنان باستاپ 2020-2023 جىلدار ارالىعىندا جىل سايىن شامامەن 600 مىڭ پەداگوگتىڭ جالاقىسىن 25%-عا كەزەڭ-كەزەڭىمەن ارتتىرۋ باستالدى. ناتيجەسىندە ولاردىڭ جالاقىسى 2 ەسە ارتادى.
2021-2023 جىلدار ارالىعىندا مەملەكەتتىك مەكەمەلەردە جانە كوممۋنالدىق كاسىپورىنداردا جۇمىس ىستەيتىن 6 مىڭعا جۋىق مەديتسينا قىزمەتكەرلەرىنىڭ, ونىڭ ىشىندە دارىگەرلەردىڭ جالاقىسى 30%-عا, ورتا مەديتسينالىق پەرسونالدىڭ جالاقىسى جىل سايىن 20% - عا كوتەرىلەدى.
2021 جىلى الەۋمەتتىك قامسىزداندىرۋ سالاسىنداعى 38 مىڭ قىزمەتكەردىڭ جالاقىسىن كەزەڭ-كەزەڭىمەن ارتتىرۋ باستالدى, ناتيجەسىندە ءۇش جىل ىشىندە (2021 جىلدان 2023 جىلعا دەيىن) ولاردىڭ جالاقىسى 2 ەسەگە ۇلعايادى.
2022 جىلعى 1 قاڭتاردان باستاپ ازاماتتىق قىزمەتشىلەردىڭ جەكەلەگەن ساناتتارىنىڭ (شامامەن 600 مىڭ) جالاقىسىن 2022-2025 جىلدار كەزەڭىندە جىل سايىن ورتا ەسەپپەن 20% - عا كەزەڭ-كەزەڭىمەن ارتتىرۋ باستالدى. ناتيجەسىندە 4 جىل ىشىندە ولاردىڭ جالاقىسى 2 ەسە ارتادى.
سونداي-اق ەڭبەكمينى جۇمىسكەرلەردىڭ جالاقىسىن كوتەرۋ بويىنشا جەكە كاسىپورىندارمەن ءتۇسىندىرۋ جۇمىستارىن جۇرگىزۋدە. ناتيجەسىندە وسى جىلدىڭ باسىنان باستاپ 8 مىڭ جۇمىس بەرۋشى 2,8 ملن قىزمەتكەردىڭ جالاقىسىن 5-تەن 50% - عا دەيىن ارتتىرۋ تۋرالى شەشىم قابىلدادى.
