قاراتال اۋدانىنا قاراستى ك.توقاەۆ ورتا مەكتەبى مەن كالپە ورتا مەكتەبى كۇردەلى جوندەۋ جۇمىستارىنان كەيىن وقۋشىلارمەن قايتا تابىسىپ وتىر. بىرنەشە اي ەسىگى جابىق تۇرعان وقۋ ورداسى ءبىلىم كۇنىندە شاكىرتتەرىنە قۋانىش سىيلادى. ودان كەيىن گۋمانيتارلىق كوللەدج اشىلىپ, جاس تالاپكەرلەردى قابىلدادى.
ك.توقاەۆ ورتا مەكتەبىنىڭ جوبالىق قۋاتتىلىعى 640 ورىندىق, 900 بالا ءبىلىم الادى. 2022 جىلى 200 ورىندىق قوسىمشا عيمارات سالىنعان. بيىل ك.توقاەۆ قورى ارقىلى «BI Group» كومپانياسى نەگىزگى عيماراتقا تولىق جوندەۋ جۇمىستارىن جۇرگىزىپ, ماتەريالدىق-تەحنيكالىق تۇرعىدان تولىق جاڭارتىلدى. زامانۋي پاندىك كابينەتتەر, اسحانا, كونتسەرتتىك زال جانە سپورت زالى جاساقتالدى. سونىمەن قاتار كىتاپحانا, ترەناجەر زالى, مۋلتيمەديالىق كابينەت, IT كابينەت, مەدياتەكا كابينەتتەرىمەن جابدىقتالدى. جاڭا وقۋ جىلىندا 905 وقۋشى, ونىڭ ىشىندە 1-سىنىپقا 74 ءبۇلدىرشىن مەكتەپ تابالدىرىعىن اتتادى.
ال كوللەدج قۇرىلىسى وتكەن قاراشا ايىنان باستاپ جۇرگىزىلگەن. 100 تالاپكەرگە ارنالعان ءبىلىم مەكەمەسىنىڭ 30 ورىندىق جاتاقحاناسى بار. قۇرىلىستىڭ جالپى قۇنى 1,641 ملرد تەڭگەنى قۇرادى. كوللەدج ءىشى كىتاپحانا, ترەناجەر, سپورت جانە كونتسەرتتىك زالدارمەن جابدىقتالعان. بيىلعى وقۋ جىلىندا «مەكتەپكە دەيىنگى تاربيە جانە وقىتۋ», «باستاۋىش ءبىلىم بەرۋ پەداگوگيكاسى مەن ادىستەمەسى» ماماندىقتارى بويىنشا 50 ءبىلىم الۋشى, قابىلداندى.
ال كالپە اۋىلىنداعى مەكتەپتىڭ كۇردەلى جوندەۋ جۇمىستارىنا 1,6 ملرد تەڭگەگە جۋىق قارجى جۇمسالعان. مەكتەپتە 234 وقۋشى, 30 مۇعالىم بار. وتكەن وقۋ جىلىنداعى ءبىلىم ساپاسىن باقىلاۋ كورسەتكىشى 65 پايىزدى قۇراعان. جوندەۋ جۇمىستارى كەزىندە بالالار كورشى اۋىلداعى مەكتەپتە ءبىلىم الدى. كۇردەلى جوندەۋ اياسىندا ماتەريالدىق-تەحنيكالىق بازاسىن جاڭارتۋعا بيۋدجەتتەن 101 ملن تەڭگە قاراستىرىلىپ, قاجەتتى زاتتار تولىق ساتىپ الىنعان.
جالپى, كالپە ورتا مەكتەبىنىڭ ىرگەسى 1970 جىلى قالانعان, جوبالىق قۋاتتىلىعى – 960 ورىن. مەكتەپ عيماراتىن ءتيىمدى پايدالانۋ, بالالاردىڭ بوس ۋاقىتىن دۇرىس ۇيىمداستىرۋ ماقساتىندا قوسىمشا 50 ورىندىق شاعىن ورتالىق (تولىق مەرزىمدىك) جانە 640 بالاعا ارنالعان بالالار شىعارماشىلىق ورتالىعى اشىلدى. ورتالىق مۋزىكا, سۋرەت جانە كومپيۋتەرلىك گرافيكا ساباقتارىنا قاجەت زاتتارمەن تولىق جابدىقتالعان. مەكتەپتە اسحانا, سپورت جانە اكت زالدارى, جەكە سپورت الاڭدارى بار ستاديون ورنالاسقان. سونىمەن قاتار مەكتەپ اۋماعىندا 50 ورىندىق بالاباقشا دا پايدالانۋعا بەرىلدى. وتكەن وقۋ جىلىندا جاڭا موديفيكاتسيالى فيزيكا, حيميا, بيولوگيا كابينەتتەرى ساتىپ الىنىپ, مەكتەپ كىتاپحاناسى مودەرنيزاتسيادان وتكەن ەكەن.
ال كوكسۋ اۋدانىنا قاراستى بەسقاينار ورتا مەكتەبى جۇزدەن استام وقۋشى قابىلداي الادى. مەكتەپكە دەيىنگى شاعىن ورتالىعى بار جاڭا وقۋ ورداسى زاماناۋي جيھازدارمەن, ينتەراكتيۆتى پانەلدەرمەن قامتاماسىز ەتىلگەن. ودان بولەك, وقۋ كابينەتتەرى بارلىق قاجەتتى قۇرال-جابدىقتارمەن جابدىقتالعان. مەكتەپ اۋماعى اباتتاندىرىلعان, فۋتبول ستاديونى, حوككەي الاڭى, ۆوركاۋت الاڭى, بالالارعا ارنالعان ويىن الاڭى بار. قاۋىپسىزدىك ماقساتىندا بەينەباقىلاۋ ورناتىلعان. ءبىلىم ورداسىنداعى 12 سىنىپتىق جيناقتا 140 وقۋشى وقيدى.
قازاقستاننىڭ 10 جىلدىعى اۋىلىندا 25 ورىندىق شاعىن ورتالىعى بار 120 ورىندىق ورتا مەكتەپتىڭ قۇرىلىسى اياقتالىپ, قولدانىسقا بەرىلدى. مەكتەپتىڭ ەسكى عيماراتىندا نەبارى 7 وقۋ كابينەتى بولعان ەدى. مەرەكەلىك ءىس-شارالار وتەتىن اكت جانە سپورت زالدارى بولماعان. قازىر بۇل ماسەلە شەشىمىن تاۋىپ, ماتەريالدىق-تەحنيكالىق بازاسى تولىعىمەن جاڭارتىلدى. عيمارات سىرتى تولىق اباتتاندىرىلىپ, فۋتبول ستاديونىمەن, جاتتىعۋ الاڭدارىمەن جانە ويىن بولمەسىمەن تولىقتى. مەكتەپتە 81 وقۋشى وقيدى.
سونىمەن قاتار كەربۇلاق اۋدانىنا قاراستى سارىوزەك اۋىلىنداعى №49 مەكتەپ كۇردەلى جوندەۋدەن ءوتتى. قۇرىلىسى وتكەن جىلدىڭ ماۋسىم ايىندا باستالعان 780 ورىندىق مەكتەپكە 727 ملن تەڭگەگە جۋىق قاراجات بولىنگەن ەدى. مەكتەپتە 1-11-سىنىپ ارالىعىندا 878 وقۋشى ءبىلىم الادى, 48 سىنىپ جيناعى قۇرىلعان.
ايتا كەتەيىك, بيىل جەتىسۋ وڭىرىندە 16 ءبىلىم بەرۋ نىسانىنىڭ قۇرىلىسى جۇرگىزىلىپ جاتىر. 10 نىساندى پايدالانۋعا بەرۋ جوسپارلانسا, قالعانى ەل يگىلىگىنە بەرىلدى. بۇگىندە ونىڭ ۇشەۋى مەرزىمىنەن بۇرىن اشىلدى. وبلىس بويىنشا 69 ەلدى مەكەننەن 1766 وقۋشى تاسىمالدانادى. بيىل 604,2 ملن تەڭگەگە قوسىمشا 12 اۆتوبۋس ساتىپ الۋ جوسپارلانسا, ونىڭ 7 اۆتوبۋسى جۋىردا ءبىلىم بەرۋ ۇيىمدارىنا بەرىلدى. قالعان 5 اۆتوبۋس جىل سوڭىنا دەيىن جەتكىزىلەدى.
وبلىستىق ءبىلىم باسقارماسىنىڭ مالىمەتىنشە, جالپىعا بىردەي ءبىلىم بەرۋ قورىنان جەكەلەگەن ساناتتاعى 23 486 وقۋشىنى مەكتەپ فورماسىمەن جانە وقۋ-ادىستەمەلىك قۇرالدارمەن قامتاماسىز ەتۋگە 1 ملرد تەڭگەگە جۋىق قاراجات بولىنگەن. سونداي-اق جاڭا وقۋ جىلىندا 52 مىڭ باستاۋىش سىنىپ وقۋشىسى تەگىن ىستىق تاماقپەن قامتىلادى. بۇل ماقساتقا جەرگىلىكتى بيۋدجەتتەن 1,7 ملرد تەڭگە قاراستىرىلىپ وتىر. وڭىردە 130 مىڭ وقۋشى وقيدى. ال ءبىرىنشى سىنىپقا 13 500 وقۋشى قادام باستى.
جەتىسۋ وبلىسى
