وسىعان دەيىنگى جولداۋلاردا دا ءجيى كوتەرىلگەن مەملەكەت باسشىسىنىڭ تاپسىرماسىن ورىنداۋ ماقساتىندا «Inter Press BK» جشس شىرايلى شاھارعا زاماناۋي جاتاقحانا سالىپ بەردى. قارقىندى ەڭبەكتىڭ ناتيجەسىندە اتالعان نىسان قۇرىلىسىن 10 ايدىڭ ىشىندە اياقتاپ ۇلگەردى.
جۋىردا ستۋدەنتتەرگە ارنالعان قوناق ءۇي تيپتەگى وسى جاتاقحانانىڭ اشىلۋ سالتاناتى ءوتتى. اشىلۋ سالتاناتىندا ءسوز سويلەگەن مارتەبەلى قوناقتار جاڭا جاتاقحانانىڭ زامان تالابىنا ساي ەكەندىگىنە ەرەكشە توقتالىپ, ريزاشىلىقتارىن ءبىلدىردى.
مەملەكەت-جەكەمەنشىك سەرىكتەستىك اياسىندا سالىنعان عيمارات 7 قاباتتان تۇرادى. ستۋدەنتتەر ۇيىندە 2, 3 جانە 4 ادامدىق 160 جاتىن بولمەسى قاراستىرىلعان. جالپى سىيىمدىلىعى 500 ادامدى قۇرايدى. سونىمەن قاتار ءار بولمە سانيتارلىق توراپپەن, ياعني دۋش, دارەتحانامەن قامتىلعان. جاتاقحانانىڭ ءىشى تولىعىمەن قاجەتتى جيھازدارمەن جابدىقتالعان. سونداي-اق 14 بولمەنىڭ ىشىندە كىر جۋاتىن ماشينالار قويىلعان. بۇل – ستۋدەنتتەرگە ىڭعايلى بولۋ ءۇشىن جاسالىپ وتىرعان قادام. بۇعان قوسا تاعى 14 اس دايىندايتىن بولمە, 2 ترەناجەر زالى, دەمالىس جانە وقۋ بولمەلەرى بار. جاتاقحانادا ليفت جۇمىس ىستەيدى. قوعامدىق قاۋىپسىزدىكتى قامتاماسىز ەتۋ ماقساتىندا عيمارات ىشىندە بەينەباقىلاۋ جۇرگىزىلەدى.
بۇل جوبا بەلگىلى كاسىپكەر, مەتسەنات باتىربەك كوشەربايدىڭ باستاماسىمەن ىسكە اسىپ وتىر. كەلەشەكتە عيمارات ستۋدەنتتىك جاتاقحانالاردىڭ جارقىن ۇلگىسىنە اينالارى ءسوزسىز. زاماناۋي ستاندارتتارعا ساي عيماراتتا شىمكەنتتەگى ىرگەلى وقۋ ورنى – ءو.جانىبەكوۆ اتىنداعى وقمپۋ ستۋدەنتتەرى تۇراتىن بولادى.
شىمكەنت
