فوتو: ۇكىمەتتىڭ ءباسپاسوز قىزمەتى
ءوز سوزىندە پرەمەر-مينيستر ءاليحان سمايىلوۆ جاقىندا ەۋرازيالىق ەكونوميكالىق وداقتىڭ قۇرىلعانىنا ون جىل تولاتىنىن ەسكە سالدى. وسى ۋاقىت ىشىندە قۇقىقتىق بازانى, سىرتقى ساۋدا-ساتتىقتى رەتتەۋدىڭ بىرىڭعاي رەجيمدەرىن قالىپتاستىرۋ جانە كەدەرگىسىز ىشكى ساۋدا-ساتتىقتى قۇرۋ بويىنشا كۇردەلى جۇمىستار اتقارىلدى.
ۇكىمەت باسشىسىنىڭ ايتۋىنشا, ورتاق كۇش-جىگەردىڭ ارقاسىندا وداقتىڭ الەۋەتى كەڭەيىپ كەلەدى, بۇل – ەۋرازيالىق ينتەگراتسيانىڭ تيىمدىلىگىنىڭ دالەلى.
ء«بىزدىڭ ەلدەرىمىز اراسىنداعى كوپتەگەن ماسەلە بويىنشا قارىم-قاتىناس ءوزارا قۇرمەت پەن قولداۋعا نەگىزدەلىپ, قارقىندى دامىپ كەلەدى. وعان ەكونوميكالىق ىنتىماقتاستىق تىرەك بولىپ وتىر», دەدى پرەمەر-مينيستر.
سونىمەن قاتار ءاليحان سمايىلوۆ وداق قۇرۋ كەزىندە قويىلعان ماقساتتار مەن مىندەتتەردى مۇلتىكسىز ورىنداۋ قاجەتتىگىن اتاپ ءوتتى. ەاەو ەلدەرىنىڭ حالىقتارى مەن بيزنەس-قاۋىمداستىقتارى ينتەگراتسيانىڭ ناقتى پايداسىن سەزىنۋگە ءتيىس.
وسى سەبەپتى قازاقستان پرەزيدەنتى قاسىم-جومارت توقاەۆ بيىل مامىر ايىندا جوعارى ەۋرازيالىق ەكونوميكالىق كەڭەستىڭ وتىرىسىندا ەاەو قۇقىعىنا كەشەندى تالداۋ جۇرگىزۋ قاجەتتىگى تۋرالى ايتقان ەدى.
«ول وداق جۇمىسىنىڭ نەگىزگى قورىتىندىلارى مەن جەتىستىكتەرىن, سونداي-اق ودان ءارى ينتەگراتسيالىق دامۋ بويىنشا ناقتى ۇسىنىمداردى كورسەتەدى. كوميسسيا قازىردىڭ وزىندە باياندامانى دايىنداي باستادى. وندا جەكەلەگەن كەلىسىمدەردىڭ جۇزەگە اسپاۋىنىڭ ناقتى سەبەپتەرى كورسەتىلە وتىرىپ, تولىققاندى جانە وبەكتيۆتى بولادى دەپ ۇمىتتەنەمىز», دەدى ءاليحان سمايىلوۆ.
سونىمەن قاتار پرەمەر-مينيستر ينتەگراتسيانىڭ جاڭا مۇمكىندىكتەرىن جوسپارلاۋ ءۇشىن قازىرگى احۋالدى ناقتى ءتۇسىنۋ قاجەتتىگىن ايتتى.
«ەۋرازيالىق ەكونوميكالىق وداق جەتىلۋ كەزەڭىنەن وتۋدە. ينتەگراتسيا ۇردىسىنە جاڭا سالالاردى ارالىستىرۋدا مۇقيات بولۋ قاجەت دەپ سانايمىز. بۇل تاجىريبە وداقتىڭ جۇمىسىنا كەرى اسەر ەتۋى مۇمكىن. وسى بايانداما بىزگە وداقتاعى قازىرگى احۋالدى باعالاپ, قاتەلىكتەر بويىنشا جۇمىس جۇرگىزۋگە جانە الداعى ۋاقىتتاعى ەكونوميكالىق ينتەگراتسيانىڭ دامۋ كونتۋرىن انىقتاۋعا مۇمكىندىك بەرەدى», دەدى ول.
ءاليحان سمايىلوۆتىڭ ايتۋىنشا, قازاقستان ەۋرازيالىق ەكونوميكالىق جوبانىڭ دامۋى ەكونوميكالىق پراگماتيزمگە نەگىزدەلۋى كەرەك دەپ سانايدى. وسىعان بايلانىستى رەسپۋبليكا ەۋرازيالىق ەكونوميكالىق وداقتىڭ ودان ءارى دامۋ جولدارىن كورسەتەتىن دەكلاراتسيا جوباسىن ازىرلەدى.
وسىلاي, قازاقستان ءوزارا ءتيىمدى كووپەراتسيالىق جوبالاردى ىسكە اسىرۋ, كولىك-لوگيستيكالىق ىنتىماقتاستىقتى كۇشەيتۋ جانە ورتاق قارجى نارىعىن قۇرۋ ارقىلى ونەركاسىپ پەن اگروونەركاسىپ كەشەنىن نىعايتۋعا مۇددەلى. وعان قوسا قازاقستان ەۋرازيالىق ەكونوميكالىق كوميسسيا مەن باقىلاۋشى ەلدەر ينستيتۋتىن دامىتۋ, سونداي-اق مۇددەلى شەت مەملەكەتتەرمەن ىنتىماقتاستىق قۇرۋدىڭ ماڭىزدىلىعىن العا تارتتى.
قورىتىندىلاي كەلە, پرەمەر-مينيستر ساپالى ەكونوميكالىق سەرپىلىس جاساۋ ءۇشىن تۇراقتى نەگىز قاجەت ەكەنىن اتاپ ءوتتى.
«قازاقستان جاڭا دامۋ مۇمكىندىكتەرىن ىزدەۋدە, ءوزارا قارىم-قاتىناستاردى نىعايتۋدا جانە ورتاق ەكونوميكالىق سىن-تەگەۋرىندەردى شەشۋدە بەلسەندى جۇمىس ىستەۋگە نيەتتى. بىرلەسكەن كۇش-جىگەردىڭ ارقاسىندا ەۋرازيالىق ەكونوميكالىق وداقتى ساپالى دامۋدىڭ اسا جوعارى دەڭگەيىنە شىعاراتىنىمىزعا سەنىمدىمىن», دەپ تۇيىندەدى ءاليحان سمايىلوۆ.
