دەرەكتەرگە زەر سالساق, جوبالىق قۇنى 256,9 ميلليون تەڭگەنى قۇراعان جاڭا عيماراتتىڭ قۇرىلىس جۇمىسىن «تاراز ينۆەست قۇرىلىس» جشس جۇرگىزىپتى. ال مادەنيەت ءۇيى 100 ورىنعا ارنالعان. زاماناۋي ۇلگىدە سالىنعان جاڭا مەكەمەنى ارالاپ كورگەن جەرگىلىكتى جۇرت بىرەر جىل بويى ايتىلعان باستى ماسەلەنىڭ وڭىنان شەشىلگەنىنە ءدان ريزا.
«مەملەكەتتىڭ وركەندەۋى جولىندا مادەنيەت پەن ونەر سالاسىنىڭ الاتىن ءرولى زور. ويتكەنى – مادەنيەت ونەر مايەگى. سوندىقتان ۇلتتىق قۇندىلىقتارىمىز بەن ءداستۇرىمىزدى, بابالاردان ميراس بولىپ قالعان ونەرىمىزدى ورگە شىعارامىز دەسەك, مادەنيەت سالاسىن دامىتۋعا ايرىقشا دەن قويعانىمىز ابزال. بۇگىنگى تاڭدا وڭىرىمىزدە 500-دەن اسا مادەنيەت نىسانى حالىققا قىزمەت كورسەتىپ وتىر. سوڭعى جىلدارى ءوڭىرىمىزدىڭ مادەني-رۋحاني ومىرىندە ايتارلىقتاي وزگەرىس بار. ماڭىزى زور نىساندار دەر كەزىندە سالىنىپ, پايدالانۋعا بەرىلىپ جاتىر. باستىسى بوي كوتەرگەن عيماراتتاردا ەڭبەك ەتەتىن ازاماتتار جەرگىلىكتى حالىقپەن بىتە قايناسىپ, ەلدىڭ ەرتەڭى ءۇشىن ايانباي جۇمىس ىستەۋى كەرەك», دەدى ءوڭىر باسشىسى.
وڭىردە وتكەن جىلى 4 نىساننىڭ قۇرىلىسى قولعا الىنسا, 32 مادەني نىسانعا كۇردەلى جانە اعىمداعى جوندەۋ جۇمىستارى ءجۇرگىزىلگەن. ال وسى جىلى 18 مادەني نىساننىڭ قۇرىلىسىن جۇرگىزۋ ءۇشىن قازىنادان قاراجات قاراستىرىلعان. ونىڭ 9-ى جىل سوڭىنا دەيىن پايدالانۋعا بەرىلمەك.
جامبىل وبلىسى,
شۋ اۋدانى
