«حالقىمىزدا «اقىل – جاستان, اسىل – تاستان» دەگەن ناقىل ءسوز بار. جاستار قاشاندا ۇلكەن وزگەرىستەردىڭ باسىندا تۇرعان. كەشەگى قيىن-قىستاۋ زاماندا ەلدىك پەن ەرلىكتىڭ باستاۋىندا بولعان – جاستار. ەركىندىكتىڭ ەرەن رۋحىن پاش ەتىپ, ازاتتىقتىڭ شامىن جاققان دا جاستار. تاۋەلسىزدىگىمىزدى تۇعىرلى ەتكەن دە, قالالار مەن دالالاردى كوركەيتكەن دە – سول جاستار. بۇگىن مىنە, ەلدىكتىڭ جولىن جالعاعان جىگەرلى جاستارىمىز ەگەمەن ەلىمىزدى الەمگە تانىتىپ, مارتەبەمىزدى بيىكتەتىپ, مەرەيىمىزدى اسىرۋدا.
وزدەرىڭىز بىلەتىندەي, «مەملەكەتتىك جاستار ساياساتى تۋرالى» زاڭ قابىلداندى. جاستاردىڭ جاسى 35 جاسقا دەيىن ۇلعايدى, سول ارقىلى جاستاردىڭ سانى 3,7 ملن-نان 6 ملن ادامعا دەيىن ارتتى.
بۇدان باسقا, 2029 جىلعا دەيىنگى مەملەكەتتىك جاستار ساياساتى تۋرالى تۇجىرىمداما قابىلداندى. وندا جاستاردى جۇمىسپەن قامتۋ, كاسىپكەرلىككە باۋلۋ, زاماناۋي قۇندىلىقتار مەن پاتريوتتىق تاربيە, سالاۋاتتى ءومىر سالتى, NEEت ساناتىنداعى جاستار ۇلەسىن تومەندەتۋ, سونداي-اق اۋىل جاستارىن قولداۋ ماسەلەلەرى قاراستىرىلعان.
حالىقارالىق جاستار كۇنى قارساڭىندا «جاستارمەن بىرگە» اتتى اپتالىق باستالعانىن بۇعان دەيىن حابارلاعان ەدىك. 7-12 تامىز ارالىعىندا ەلىمىزدىڭ بۇكىل الاڭدارىندا قايىرىمدىلىق, ۆولونتەرلىك جانە ەكولوگيالىق اكتسيالار, بوس ورىندار جارمەڭكەسى, فەستيۆالدار, سەمينارلار, كونتسەرتتەر جانە ت. ب. ءتۇرلى ءىس-شارالار ۇيىمداستىرىلدى.
جاستاردى قولداۋعا باعىتتالعان جۇمىستار جۇيەلى تۇردە جالعاسا بەرەدى», دەپ جازدى مينيستر.
