سەنات توراعاسىنىڭ ورىنباسارى سەرگەي گروموۆ ءوزىنىڭ كىرىسپە سوزىندە مەملەكەت باسشىسى ن.ءا.نازارباەۆتىڭ بەس ينستيتۋتتىق رەفورماسىن ىسكە اسىرۋ جونىندەگى «100 ناقتى قادام» ۇلت جوسپارىندا جاڭا اۋديت پەن مەملەكەتتىك اپپارات جۇمىسىن باعالاۋ جۇيەسىن ەنگىزۋ كوزدەلگەنىن اتاپ ءوتتى.
س. گروموۆتىڭ ايتۋىنشا, باقىلاۋدىڭ بۇرىنعى جۇيەسى مەملەكەتتىك باسقارۋدىڭ ءتيىمدىلىگىن ارتتىرۋدىڭ تالاپتارىنا ساي كەلمەدى, مەملەكەتتىك ورگاندار قىزمەتىنىڭ تيىمدىلىگىن تاۋەلسىز باعالاۋ بولعان جوق.
توراعا ورىنباسارى جاڭا زاڭدا مەملەكەتتىك اۋديت جانە قارجىلىق باقىلاۋ ۇعىمدارىن, ونىڭ قاعيداتتارىن, مىندەتتەرى مەن قۇرالدارى ايقىندالعانىن, بۇرىنعى جۇيەدەگى كەدەرگىلەر جويىلعانىن اتاپ ءوتتى.
سەناتور ولگا پەرەپەچينا ءوزىنىڭ بايانداماسىندا «مەملەكەتتىك اۋديت جانە قارجىلىق باقىلاۋ تۋرالى» زاڭدى جوعارى دەڭگەيدە ىسكە اسىرۋعا كەدەرگى كەلتىرىپ وتىرعان ماسەلەلەر مەن وسى سالاداعى زاڭنامانى كەلەشەكتە ودان ءارى جەتىلدىرۋگە جان-جاقتى توقتالدى.
سەناتور قىزمەت جانە كاسىبي ەتيكا بۇزىلعان جاعدايدا, دايەكسىز اۋديتورلىق ەسەپ ازىرلەۋ نەمەسە ءتارتىپ بۇزۋشىلىق دەرەكتەرىن جاسىرۋ, سونداي-اق, مەملەكەتتىك اۋديت جانە قارجىلىق باقىلاۋ ستاندارتتارىن بىرنەشە مارتە بۇزۋ ورىن العان بولسا, مەملەكەتتىك اۋديتوردىڭ سەرتيفيكاتىن ۇلتتىق سەرتيفيكاتتاۋ كوميسسياسىنان الدىرۋ ءراسىمىن رەتتەيتىن ەرەجەنى زاڭعا ەنگىزۋ قاجەت دەپ سانايدى.
ايماقتارداعى رەۆيزيالىق كوميسسيالاردىڭ قىزمەتى تۋرالى رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ مۇشەسى الەكساندر گورياينوۆ پەن قاراعاندى وبلىسىنىڭ رەۆيزيالىق كوميسسياسىنىڭ توراعاسى سەرىك وتەشوۆ حاباردار ەتتى. پارلامەنت سەناتىنىڭ دەپۋتاتتارى راشيت احمەتوۆ, سەرىك اقىلباي, تولەۋبەك مۇقاشەۆ, اسحات كۇزەكوۆ, بەكمىرزا ەلامانوۆ, سونداي-اق, وبلىستىق رەۆيزيا كوميسسيالارىنىڭ وكىلدەرى پىكىرسايىسقا قاتىستى.
