اتالمىش جول ۋچاسكەسىنىڭ جوندەۋ جۇمىسى 2017 جىلى باستالعان ەدى. الايدا جۇمىسىنا سالعىرتتىق تانىتقان مەردىگەرلەر مەن ۇزاققا سوزىلعان سوت پروتسەسى سالدارىنان توقتاپ قالعان. بيىل بۇل جۇمىستار جالعاسىن تاپتى.
مەردىگەرلىك قىزمەتتى «قازسترويتەحنيك» جشس جۇزەگە اسىرىپ جاتىر. مامليۋتتان «جاڭا جول» بەكەتىنە دەيىن قايتا جاڭارتىلاتىن ۋچاسكەنىڭ جالپى ۇزىندىعى – 56 شاقىرىمدى قۇرايدى, وعان رەسپۋبليكالىق بيۋدجەتتەن شامامەن 10 ملرد تەڭگە ءبولىنىپ, ونىڭ 3,5 ملرد تەڭگەسىن بيىل يگەرۋ جوسپارلانعان.
ايتا كەتسەك, رەسپۋبليكالىق سايلاۋالدى شتابتىڭ 1 ناۋرىزدا سقو-عا ساپارى بارىسىندا پارتيا توراعاسى ەرلان قوشانوۆتىڭ بەرگەن تاپسىرماسىنا سايكەس, اتالعان وبلىستاعى جولداردى جوندەۋ, ونىڭ ىشىندە رەسپۋبليكالىق ماڭىزى بار جولداردى قايتا جاڭارتۋ بويىنشا مونيتورينگتى «AMANAT» پارتياسىنىڭ مۇشەلەرى جۇرگىزەدى. ايماقتا پارتيالىق باقىلاۋ كوميسسيالارى جانىنان 15 مونيتورينگتىك توپ جۇمىس ىستەيدى.
«بۇگىندە 14 شاقىرىم جولعا جابىننىڭ تومەنگى قاباتىن توسەۋ بويىنشا جۇمىستار جۇرگىزىلدى. تاعى 16 شاقىرىم جولعا توسەلۋ كەرەك. قازىرگى ۋاقىتتا نەگىزگى جولدىڭ توسەمى جانە اينالما جولدى جوندەۋ جۇمىستارى جۇرگىزىلىپ جاتىر. جوندەۋ جۇمىسى ەكى جىلعا جوسپارلانعان. ۇيىمداستىرۋشى – «قازاۆتوجول» ۇق» اق. بارلىق جۇمىستار كەلەسى جىلى اياقتالۋى ءتيىس. ءبىز جۇمىستىڭ ۋاقىتىلى جۇرگىزىلۋىن قاداعالايمىز», دەدى «AMANAT» پارتياسى مامليۋت اۋداندىق فيليالىنىڭ توراعاسى التىن ساعيتوۆا.
اماناتتىقتار چەليابى–نوۆوسىبىر جول ۋچاسكەسىن عانا ەمەس, وبلىستاعى باسقا دا بىرنەشە جولداردىڭ جوندەۋ جۇمىستارىن باقىلايدى.
