وڭىردە ون اۋدان بار بولسا, ونىڭ التاۋىنداعى جاعداي ءماز ەمەس. ال شارۋانىڭ مۇڭى از ەمەس. اسىرەسە قورداي, مەركى, بايزاق, تالاس, جامبىل اۋدانىنداعى اعايىن بيىل قاتتى قامىعىپ وتىر. ال وڭىردەگى قانت قىزىلشاسىنىڭ لوكوموتيۆىنە اينالعان مەركى اۋدانىندا مىڭ گەكتارعا جەتەقابىل القاپ قۋراپ قالعان.
اعىن سۋدىڭ ماسەلەسى جىلدا كوتەرىلگەنىمەن, كەيىنگى كەزدە شارۋالار ءدال بيىلعىداي دابىل قاقپاعان بولاتىن. ال بيىل شىعىنعا باتقان جۇرتتىڭ شىدامى تاۋسىلدى. مەركىلىك ازاماتتار ورتالىق ستاديونعا جينالىپ, ماسەلەنى شەشۋ ءۇشىن بارماعان جەر, باسپاعان تاۋى قالماعانىن ايتىپ, كوكەيكەستى پروبلەمانى جايىپ سالدى. قۇرعاقشىلىق قىسپاققا العانىن ايتقان ولار سۋسىز سولعان قانت قىزىلشاسىن وزدەرىمەن الا كەلگەن.
راسىندا دا بيىلعى قۇرعاقشىلىق جامبىلدىق ديقانداردى تىعىرىققا تىرەدى. ايتسە دە سول قۇرعاقشىلىقتان قۇتىلۋدىڭ توتە جولىن ىزدەگەن مەركىلىك شارۋالار قول قۋسىرىپ قاراپ وتىرماعان. بارىنشا قامدانىپ باققان. ءتىپتى قىلشا ءتۇبىرىن ءبىر ەمەس, ءۇش مارتە ەگىپ كورىپتى. تىرشىلىك ءنارى تاپشى بولعاندىقتان بۇل ارەكەتتەرىنەن دە تۇك ونبەگەن.
كوكتەمدە ۇسىكپەن, جازدا زيانكەسپەن كۇرەسكەن ولار كەشىككەن سۋبسيديا دا تىرشىلىكتى تىكتەۋگە كەرى اسەرىن تيگىزگەنىن كۇيىنە ايتىپ وتىر. قىسقاسى, قارا جەرگە ۇمىتپەن قاراعان قاراپايىم حالىق تابىس تابامىز دەپ, تاقىرعا وتىرۋعا شاق تۇرعاندارىنا قاتتى كۇيىنەدى. ارينە, نەسيەگە كىرىپ, تاۋەكەلگە بەل بايلاعان ازاماتتاردىڭ اشىناتىن ءجونى بار.
«شىنىن ايتقاندا, وڭىردە توتەنشە جاعداي جاريالانۋى كەرەك دەپ ەسەپتەيمىز. ويتكەنى ەڭسەسىن تىكتەۋ, تىرشىلىگىن دۇرىستاۋ ءۇشىن نەسيە العاندار بارشىلىق. توتەنشە جاعداي جاريالانسا, قولعا العان ىسىمىزگە قولداۋ بولار ەدى. ويتكەنى قارجى ماسەلەسى قاي-قايسىمىزعا دا وڭاي ءتيىپ تۇرعان جوق. جاعداي قيىن», دەيدى ديقانداردىڭ ءبىرى ارنۇر ءسابيت ماسەلەنىڭ ۋشىعىپ تۇرعانىن مەڭزەپ.
جالپى, جامبىلدىق شارۋالاردىڭ كۇنى الاتاۋدىڭ ار جاعىن قونىس ەتكەن قۇدايى كورشىمىز قىرعىز اعايىنعا قاراپ تۇرعانى جاسىرىن ەمەس. اعىن سۋدىڭ تاپشىلىعىن العا تارتقان كورشىلەردىڭ بىزگە جانى اشي قويۋى دا ەكىتالاي. ءوز قوتىرىڭدى ءوزىڭ قاسى دەپ وتىرعانى بەلگىلى. سالدارىنان وڭىردەگى قۋاڭشىلىق شارۋالاردىڭ شىمبايىنا باتىپ-اق تۇر.
«انىعىراق ايتساق, بىزگە ەك دەگەننەن كەيىن قارا جەرگە ءونىم ورنالاستىردىق. ول جۇمىستارعا قوماقتى قاراجات سالعانىمىز دا بەلگىلى. ونىمىز ءۇشىن ءبىز ارزۋ ايتىپ, ارتىق قاراجات سۇراپ وتىرعانىمىز جوق. ۇكىمەت جاعدايعا دەن قويىپ, شارۋالارعا سۋبسيديانى بەرە مە؟ وسى جاعى قالاي بولادى دەپ الاڭداپ وتىرعان جايىمىز بار», دەيدى مەركىلىك ديقان سانسىزباي يمانبەتوۆ ارىپتەستەرىنىڭ جاعدايىن ءتۇسىندىرىپ.
راسىندا دا شىعىنعا باتۋدىڭ الدىندا تۇرعان شارۋالاردىڭ شىرىلدايتىنداي ءجونى بار. سالعان قارجى مەن ەككەن ءونىم قاتار جەلگە ۇشقالى تۇر. ولار ءۇشىن بۇدان اسقان تراگەديا جوق ەكەنى الىمساقتان ايان. ال بۇل ماسەلە دەر كەزىندە شەشىمىن تابا ما؟
اۋدان اكىمى جورابەك باۋبەكوۆ قىرعىز تاۋىنداعى مۇزدىقتاردىڭ ەرىمەي جاتقانىن العا تارتىپ وتىر. اعىن سۋدان تارىققان بارلىق اۋدانداعى شارۋالاردىڭ جايى ءماز ەمەس ەكەنىن تىلگە تيەك ەتكەن ول كەمەدەگىنىڭ جانى ءبىر ەكەنىن بىلەدى. ال بىرەر كۇن بۇرىن وڭىرگە كەلگەن جاۋاپتى مينيسترلىكتىڭ ماماندارى جاعدايدى قال-قادىرىنشە زەردەلەپ كورگەن. شارۋانىڭ جايىنا قانىققان ولار شىعىن كولەمىن اۋقىمدى دەپ تاني ما؟ ول جاعى ازىرگە بەلگىسىز. كوميسسيا مۇشەلەرى شارۋالاردىڭ جانايقايىن ۇكىمەتكە دۇرىستاپ جەتكىزسە عانا توتەنشە جاعداي جاريالانۋى ىقتيمال.
«اعىن سۋ قىرعىزدار جاعىنان كەلۋى ءتيىس. شارت بويىنشا ولار 1,5 كۋب سۋ بەرۋى كەرەك. بۇگىنگى تاڭدا ول جاقتان ءبىر تامشى سۋ جوق. جۇت, قۇرعاقشىلىق, تاپشىلىق جىلى دەگەن بار عوي. سونداي جىلدىڭ ءبىرى بولعالى تۇر. ۇكىمەت تاراپىنان شەشىم قابىلدانىپ, توتەنشە جاعداي جاريالانسا عانا جاعداي دۇرىستالادى», دەيدى مەركى اۋدانىنىڭ اكىمى جورابەك باۋبەكوۆ.
كەرەك دەرەككە كوز جۇگىرتسەك, اۋدان بويىنشا ەگىلگەن قانت قىزىلشاسىنىڭ كولەمى ءۇش مىڭ گەكتارعا جۋىقتايدى. قانت قىزىلشاسى القابىنىڭ جارتىسىنا عانا سۋ بەرىلگەن. «شارۋالاردىڭ جارتىسى «قازسۋشار» مەكەمەسىمەن شارت جاساسپاي, ءوز بەتىنشە ەگىپ تاستاعان» دەيدى اۋدان بيلىگى. شىعىنعا باتتىق دەپ شىر-پىر بولعان ديقاندار ەندى ۇزىلۋگە شاق قالعان ءۇمىتتى ۇكىمەت جالعايدى دەپ سەنىپ وتىر.
