قامبار اتا ت ۇلىگىن ءوسىرىپ, كاسىبىنەن ءناسىبىن ايىرامىن دەگەندەردىڭ اراسىندا نەسيە الىپ, اتا كاسىپكە دەن قويعاندار دا بار. جىلقىلاردىڭ جاپپاي سۇلاعانىن كورگەن ولاردىڭ «ەندى قايتتىك؟» دەپ ابدەن مازاسى قاشتى. نەسيە ءۇشىن شارۋا قوجالىعى مەن ءۇيىن كەپىلدىككە قويعان اۋىل ازاماتىنىڭ جۇيكەسى سىر بەرمەگەندە قايتسىن؟
«تاۋداعى فازەندامدى, ءۇيىمدى كەپىلدىككە قويدىم. قاراجات ازداۋ بولعان سوڭ اۋىلداعى كىشىگىرىم باسپانامدى دا تىركەدىم. قىسقاسى, كاسىبىمدى باستاۋ ءۇشىن بارىمدى باسكە تىكتىم. جۇگىرىپ ءجۇرىپ قولىم جەتكەن قارجىعا العان جىلقىلار ەدى. تابيعات توسىن مىنەز تانىتتى, جىلقىلارىمدى جاسىن جايپاپ كەتتى. بەس ميلليون تەڭگە شىعىنعا ۇشىراپ وتىرمىن», دەگەن تەرەڭوزەك اۋىلىنىڭ تۇرعىنى نۇربولات مىرزاقۇلوۆتىڭ جۇزىنەن وكىنىشتىڭ تابى سەزىلدى.
جابىققان جۇرتتىڭ قامىققان كوڭىلىنە قارلىعاشتىڭ قاناتىمەن سۋ سەپكەندەي بولسا دا, پايداسىن تيگىزەر شەندى تابىلار ما ەكەن دەپ وتىرعانبىز؟! سۋىت حاباردى ەستىگەن ءوڭىر باسشىسى نۇرجان نۇرجىگىتوۆ جەدەل قيمىلداپ, وقيعا ورىن العان اۋىلعا ات باسىن بۇردى.
«نايزاعاي ءتۇسىپ, جيىرما التى جىلقىنى جايراتقان جاعدايدى ءبارىمىز ەستىدىك. ۇكىمەت تاراپىنان وتەماقى بەرۋ ماسەلەسى ەشقانداي نورماتيۆتىك اكتىلەرگە ساي كەلمەيدى ەكەن. جىلقى العانداردىڭ ءبىرازى نەسيەگە كىرىپ كەتكەنىن ەستىدىك. وڭاي ەمەس. شىعىنعا باتقان شارۋالارعا «قازپرومليت» جشس كومەكتەسەتىن بولادى», دەيدى ن.نۇرجىگىتوۆ.
ءوڭىر باسشىسىنىڭ سوزىنە سەنسەك, شىعىنعا باتقان شارۋالارعا «قازپرومليت» جشس 10 ميلليون تەڭگە قاراجات بەرمەك. ال كىمنىڭ قانشا شىعىنعا باتقانىن اۋىلدىڭ قوعامدىق كەڭەسى زەردەلەپ, قاراجاتتى تەڭدەي ۇلەستىرمەك.
