القالى جيىندا مەملەكەت باسشىسى ادىلەتتى قازاقستاندى قۇرۋ ءۇشىن قاي باعىتتا قانداي قادامدار جاساۋىمىز قاجەتتىگىنە توقتالدى. اسىرەسە «ادال ازامات» ۇعىمى ماعان ەرەكشە اسەر ەتتى. راسىندا, ەلىمىزدە زاڭ, ءتارتىپ, سەنىم جانە جاۋاپكەرشىلىك ۇستەمدىك قۇرعان جاڭا قوعامدىق ەتيكا قالىپتاسسا, ءاربىر قازاقستاندىق وتانشىلدىق, ادامگەرشىلىك, بىلىمپازدىق, ەڭبەكقورلىق, جاناشىرلىق سياقتى ىزگى قايسەتتەردى بويىنا جيناقتاعان ادال ازامات بولۋعا ۇمتىلسا, ساپالى ۇلت, قۋاتتى ەل بولارىمىز ءسوزسىز. مەملەكەت باسشىسىنىڭ بۇل ويى ءال-فارابي بابامىزدىڭ «قايىرىمدى قالا تۇرعىندارى» تۇجىرىمداماسىمەن ۇشتاسىپ جاتىر.
سونداي-اق قولدانىستاعى وردەندەردى حالىققا قۇرمەتتى تۇلعالاردىڭ ەسىمىمەن الماستىرۋ تۋرالى ۇسىنىس تا وتە ماڭىزدى دەپ ەسەپتەيمىن. بۇل جاس ۇرپاققا ەلگە قىزمەت ەتكەن وعلاندارىمىزدى ناسيحاتتاۋ ءۇشىن قاجەت. پرەزيدەنت وسكەلەڭ ۇرپاقتىڭ تاربيەسىنە ەرەكشە توقتالدى. «بالالار كىتاپحاناسى» اتتى جاڭا جوبانى قولعا الۋ, تاۋلىك بويى جۇمىس ىستەيتىن كىتاپحانا اشۋ تۋرالى يدەيا – عاجاپ يدەيا. ويتكەنى كىتاپ وقىعان بالا جاماندىققا بارمايدى, ادال ازاماتقا ءتان قاسيەتتەردى بويىنا جيناقتايدى. جاڭا قازاقستاننىڭ جاڭا شەجىرەسىن جازۋ, كينويندۋستريانى ەكونوميكانىڭ جەكە تارماعى رەتىندە قاراستىرۋ, اۋىلداردى كوتەرۋ قاجەتتىگىن دە جان-جاقتى تالداپ, ءتۇسىندىردى.
پرەزيدەنت ايتقان تاعى ءبىر ماسەلە – ءداستۇرلى قۇندىلىقتارىمىزدى قازىرگى مادەني ۇردىستەرمەن ۇيلەستىرۋ. بۇل رەتتە, ۇلتتىق سپورتتىڭ يدەولوگيانىڭ مىقتى قۇرالى ەكەنىن ايتقىم كەلەدى. ويتكەنى اتا-بابامىزدان مۇرا بولىپ قالعان ۇلتتىق سپورت جاستاردىڭ باسىن بىرىكتىرەدى, ولاردىڭ جانىن دا, ءتانىن دە شىنىقتىرادى, پاتريوتيزمگە, ۇلتجاندىلىققا تاربيەلەيدى. مەملەكەت باسشىسى كەلەسى جىلى وتەتىن V دۇنيەجۇزىلىك كوشپەندىلەر ويىنىن جوعارى دەڭگەيدە وتكىزۋ تۋرالى تاپسىرما بەردى. كوشپەندىلەر ويىنى جىلدان-جىلعا قارقىن الىپ كەلەدى. ءبىزدىڭ ەلدە وتەتىن بۇل بايراقتى دوداعا الەمنىڭ 100-دەن استام ەلىنەن 5 مىڭعا جۋىق سپورتشى, 15 مىڭنان اسا تۋريست كەلەدى دەپ جوسپارلاپ وتىرمىز.
يسلامبەك سالجانوۆ,
ۇلتتىق سپورت قاۋىمداستىعىنىڭ پرەزيدەنتى
