ماۋسىمنىڭ 19-ى كۇنى الماتى-اتىراۋ باعىتىنداعى №29/30 جولاۋشىلار پويىزىنىڭ نوعايلى ستانساسىنا جەتكەنشە پويىز بريگاداسىنىڭ مۇشەلەرى جولاۋشىنى شۇعىل بوساندىرۋعا ءماجبۇر بولعان.
جولسەرىكتەر بوسانعان ايەلگە كومەكتەسۋ ءۇشىن بارلىق قاجەتتى شارالاردى قولدانعان. وقيعا تۋرالى پويىز ماشينيسىنە حابارلانىپ, جاقىن ماڭداعى ستانتسياعا جەدەل جاردەم شاقىرىلعان. بالانىڭ دۇنيەگە كەلۋىنە جولسەرىكتەر مەن جولاۋشىلار كومەكتەسكەن.
«جولاۋشىلارىمىز كارينا بالعانىم مەن اقمامىق بەكەنوۆاعا العىس ايتامىز. پويىز بريگاداسى مەن جولاۋشىلاردىڭ ۇيلەسىمدى جۇمىسىنىڭ ارقاسىندا پويىزدا ۇل بالا امان-ەسەن دۇنيەگە كەلدى», دەيدى پويىز جولسەرىگى مارال ادىلبەكوۆا.
مارال ادىلبەكوۆا تەمىرجولدا 15 جىل ەڭبەك ەتسە, ونىڭ 12 جىلىندا اتىراۋ ۋچاسكەسىندە جولاۋشىلار پويىزدارىنىڭ جولسەرىگى بولىپ قىزمەت اتقارعان.
ساعىز ستانساسىنا كەلگەن سوڭ جاڭا تۋعان نارەستەمەن اناسى جەدەل جاردەم دارىگەرلەرىنە تاپسىرىلدى.
