سونىمەن قاتار دەلەگاتسيا قۇرامىندا اكادەميانىڭ ۆيتسە-پرەزيدەنتى, اكادەميك اسقار جۇمادىلداەۆ, عىلىم دەپارتامەنتىنىڭ ديرەكتورى رۋسلان نۇرلىباەۆ, اكادەميانىڭ باسقارما باسشىسى ماقسات بولەنباەۆ جانە كەڭەسشى-ساراپشى داۋرەن نۇعىمانوۆ بولدى. ولار عىلىم سالاسىمەن بەلسەنە اينالىسىپ وتىرعان وقۋ ورنىنا ەكسكۋرسيا جاساپ, ستۋدەنتتەرمەن, وقىتۋشىلارمەن تىلدەستى. وقۋ ورنىنىڭ عىلىمي جەتىستىكتەرىن, ماتەريالدىق-تەحنيكالىق بازاسىن كوردى, عىلىمي جوبالار كورمەسىن تاماشالادى. بۇدان كەيىن «شقو جوعارى وقۋ ورىندارى مەن كاسىپورىندارىنىڭ عىلىمي ىنتىماقتاستىعى: ماسەلەلەرى مەن بولاشاعى» تاقىرىبىندا القالى جيىن ءوتتى.
دەلەگاتسيا قۇرامى وڭىرلىك جوعارى وقۋ ورىندارىنىڭ تىنىس-تىرشىلىگىمەن تانىسۋدى شىعىستان باستاۋدى ءجون كورگەن.
ۇلتتىق عىلىم اكادەمياسى – پرەزيدەنت جانىنداعى جوعارى عىلىمي ۇيىم. ول عىلىمدى دامىتۋدىڭ وزەكتى ماسەلەلەرىن شەشۋ جانە عىلىمي ناتيجەلەر دەڭگەيىن ارتتىرۋ ءۇشىن وڭىرلەردىڭ عىلىمي الەۋەتىن ءتيىمدى پايدالانۋعا مۇمكىندىك بەرەدى.
مارتەبەلى مەيماندارمەن قاتار ونەركاسىپتىك كاسىپورىنداردىڭ, عىلىمي-زەرتتەۋ ينستيتۋتتارىنىڭ وكىلدەرى قاتىسقان دوڭگەلەك ۇستەل جۇمىسىنىڭ بارىسىندا ۋنيۆەرسيتەت عالىمدارىنىڭ عىلىمي جوبالارى تالقىلانىپ, عىلىم سالاسىنداعى تۇيتكىلدى ماسەلەلەردى شەشۋ تەتىكتەرىن ازىرلەۋ ماسەلەسى قارالدى.
كۇنسۇلۋ زاكاريانىڭ ايتۋىنشا, وڭىرلەردە عىلىمدى دامىتۋدى بۇدان دا جوعارى دەڭگەيگە كوتەرۋ قاجەت. سەبەبى وسكەمەن – وندىرىستىك قالا. عىلىمنىڭ ناعىز داميتىن ورتاسى.
– وڭىرلەردەگى عىلىمدى دامىتۋ ماڭىزدى. شىعىس وڭىرىندە ءىرى ونەركاسىپ ورىندارىنىڭ شوعىرلانۋىنا بايلانىستى مۇندا عىلىمدى دامىتۋدىڭ الەۋەتى جوعارى. سوندىقتان عىلىم, ونەركاسىپ جانە بيزنەس يندۋسترياسى جوبالاردى جۇزەگە اسىرۋ كەزىندە قاتار ءجۇرۋى كەرەك, – دەدى ك.زاكاريا.
ۋنيۆەرسيتەت رەكتورى ساۋلە راحمەتۋللينا جيىندا ايتىلعان بارلىق ماسەلە ناقتى شەشىمىن تاۋىپ, جوبا تۇرىندە كورىنىس تاباتىنىن ايتتى.
مەملەكەت باسشىسى قاسىم-جومارت توقاەۆ ەل دامۋىنىڭ ستراتەگيالىق باعىتى رەتىندە عىلىمنىڭ دامۋىنا ايرىقشا نازار اۋدارىپ, قولدانبالى زەرتتەۋلەردىڭ ماڭىزدىلىعىن, وسى باعىتتا بيزنەس پەن ۋنيۆەرسيتەتتەردى شوعىرلاندىرۋ قاجەتىن اتاپ وتكەن ەدى.
رەكتوردىڭ ايتۋىنشا, شىعىس قازاقستان تەحنيكالىق ۋنيۆەرسيتەتى بۇگىندە ءۇش الەۋمەتتىك ماڭىزدى فۋنكتسيانى اتقارادى. ولار – جوعارى بىلىكتى ماماندار دايارلاۋ, جاڭا ءبىلىم بەرۋ جانە قوعامعا قىزمەت كورسەتۋ.
بۇل جوعارعى وقۋ ورىن وبلىستىڭ ينجەنەرلىك كادرلارعا دەگەن نەگىزگى قاجەتتىلىگىن قامتاماسىز ەتەدى. ستۋدەنتتەر وبلىستاعى 290 كاسىپورىندا وندىرىستىك تاجىريبەدەن ءوتىپ, ولاردا جىل سايىن مىڭنان استام جاس مامان جۇمىسقا ورنالاسادى.
ۋنيۆەرسيتەتتىڭ «ۇشتىك سپيرال: ۋنيۆەرسيتەت, بيزنەس, بيلىك» ۇلگىسىن ەنگىزۋدىڭ بىرەگەي تاجىريبەسى بار. سونىمەن قاتار بىرلەسكەن زەرتتەۋلەردىڭ ناتيجەلەرى بويىنشا تەحنولوگيالار ازىرلەنىپ, تاجىريبەلىك ۇلگىلەر الىنعان. كوممەرتسيالاندىرۋعا دايىن ونىمدەردىڭ ۇلگىلەرىن وندىرىسكە ەنگىزۋ جۇمىستارى جۇرگىزىلىپ جاتقانى ايتىلدى.
شارا بارىسىندا قازاقستان-امەريكا ەركىن ۋنيۆەرسيتەتىنىڭ پرەزيدەنتى ەرەجەپ مامبەتقازيەۆ, س.امانجولوۆ ۋنيۆەرسيتەتىنىڭ رەكتورى مۇحتار تولەگەن, «ماشزاۆود» جشس مەن «وسكەمەن ونەركاسىپتىك ارماتۋرا زاۆودى» اق باسشىلارى وڭىردەگى عىلىم سالاسىن دامىتۋعا, جوعارى وقۋ ورىندارى مەن كاسىپورىنداردىڭ عىلىمي ىنتىماقتاستىعىن نىعايتۋعا قاتىستى مازمۇندى باياندامالار جاساپ, ءوز ۇسىنىستارىن جەتكىزدى.
شىعىس قازاقستان وبلىسى
