سۋرەتتى تۇسىرگەن ەرلان ومار, «EQ»
جالپى العاندا, جاسوسپىرىمدەر اراسىنداعى قىلمىس 2021 جىلمەن سالىستىرعاندا, وتكەن جىلى 45 دەرەككە ارتقان ەكەن. ءبىر ايتا كەتەرلىگى قىلمىستىق جاۋاپكەرشىلىككە قاتىسى بار 131 جەتكىنشەكتىڭ 46-سى ەش جەردە وقىمايتىن بولىپ شىققان. قالعاندارى – جوعارى وقۋ ورىندارى, كوللەدجدەر مەن مەكتەپ وقۋشىلارى. جاسوسپىرىمدەر اراسىنداعى قىلمىس بويىنشا جۇرگىزىلگەن تەكسەرۋلەردىڭ ناتيجەسىندە 11 جاۋاپتى تۇلعا تارتىپتىك جاۋاپكەرشىلىككە تارتىلعان. ال 128 دەرەكتىڭ 77-ءسى ۇرلىقپەن بايلانىستى بولىپ وتىر. بۋىنى قاتپاعان جاستاردىڭ ۇلكەن ومىرگە جاساعان العاشقى قادامىنىڭ قىلمىسپەن بايلانىستى بولۋى ارينە كىمدى دە بولسىن تولعاندىرادى. جىل وتكەن سايىن ەلىمىزدە قىلمىستىڭ ءتۇرلى ساناتى بويىنشا جاعا ۇستاتارلىق تسيفرلاردان كوز سۇرىنەدى. ال جول-كولىك وقيعالارى سالدارىنان باقيعا اتتانعان جەتكىنشەكتەردىڭ قاراسى جىل وتكەن سايىن ارتا تۇسكەنى دە كوڭىلگە قاياۋ تۇسىرەتىنى داۋسىز.
ىشكى ىستەر ورگاندارىندا كادر تاپشىلىعى وتكىر ماسەلەگە اينالعانى ون جىلدان استام ۋاقىت بۇرىن ايتىلىپ جۇرگەن. سالاداعى پروبلەما ءالى كۇنگە دەيىن وڭ شەشىمىن تاپپاي وتىر. راس, ءتارتىپ ساقشىلارى قىلمىسپەن كۇرەستە ايانىپ جاتقان جوق. الايدا كادر تاپشىلىعى جۇمىستىڭ العا باسۋىنا كەرى اسەر ەتەتىنى داۋسىز.
ءبىراز ۋاقىت بۇرىن وبلىستىق پوليتسيا دەپارتامەنتى باسشىسىنىڭ ءبىرىنشى ورىنباسارى قۇرمەت ماجىكەنوۆ وڭىردە 544 پاترۋلدىك پوليتسيا قىزمەتكەرىنىڭ تاپشىلىعى بار ەكەنىن ايتقان بولاتىن. سالاداعى كادر تاپشىلىعى مۇنىمەن شەكتەلمەيدى.
دەپارتامەنت باسشىسىنىڭ ءبىرىنشى ورىنباسارى ىشكى ىستەر ورگاندارىنىڭ ماتەريالدىق-تەحنيكالىق بازاسىنىڭ جاراقتاندىرىلۋىنا قاتىستى ماسەلەنى دە جايىپ سالعان. دەپارتامەنت وكىلى كەلتىرگەن دەرەكتەرگە زەر سالساق, وڭىردەگى ۋچاسكەلىك پوليتسيا پۋنكتتەرىنىڭ 163-ءى جىلۋمەن قامتاماسىز ەتىلگەن. الايدا 18-ىندە جىلۋ جۇيەسى مۇلدە جوق. وسى ءبىر وتكىر ماسەلە جۋىق ارادا شەشىمىن تابا ما, كىم ءبىلسىن؟ «وبلىستىق پوليتسيا دەپارتامەنتىندە ۋچاسكەلىك پوليتسيا ينسپەكتورلارىنىڭ شتاتتىق سانى – 439, ولاردىڭ كومەكشىلەرى – 85. بۇگىندە 39 ۋچاسكەلىك ينسپەكتوردىڭ ءوز اۋماعىندا تۇرۋىنا مۇمكىندىگى بولماي وتىر. سەبەبى تۇرعىلىقتى باسپانالارى جوق», دەگەن دەپارتامەنت باسشىسىنىڭ ءبىرىنشى ورىنباسارى وتە وزەكتى ماسەلەنى قوزعاعان ەدى.
«ىشكى ىستەر مينيسترلىگىنىڭ 2015 جىلعى №222 بۇيرىعىنا سايكەس, جامبىل وبلىسىنداعى حالىق سانى 1 ملن 219 مىڭ 437 ادام ەكەنىن ەسكەرسەك, وبلىس بويىنشا قوسىمشا 154 ۋچاسكەلىك پوليتسيا ينسپەكتورى جانە 288 كومەكشى قاجەت. سونىمەن قاتار وسى بۇيرىققا سايكەس, قوعامدىق ءتارتىپتى ساقتاۋ جانە جول ءجۇرۋ قاۋىپسىزدىگىن قامتاماسىز ەتۋ بويىنشا پاترۋلدىك پوليتسيا قىزمەتكەرلەرىنىڭ شتات سانى جەتىسپەي وتىر. ءتيىمدى جۇمىس ىستەۋ ءۇشىن قوسىمشا تاعى 544 پاترۋلدىك پوليتسيا قىزمەتكەرى قاجەت», دەيدى ق.ماجىكەنوۆ.
دەرەكتەرگە سەنسەك, وبلىستىق پوليتسيا دەپارتامەنتىنىڭ اتتەستاتتالعان قۇرامى 2 814 بىرلىكتى قۇراسا, بۇگىندە ونىڭ ون پايىزدان استامى بوس تۇر. ال شالعايداعى مويىنقۇم اۋدانىندا بىرنەشە جىل بويى يەسىن تاپپاعان جۇمىس ورىندارى بار. وبلىستاعى اۋماعى ەڭ ۇلكەن اۋدانعا بارعان كادرلار جاعدايدىڭ جاسالمايتىنىن العا تارتىپ, كەيبىرى اۋا رايىنىڭ قاتالدىعىنا شىداس بەرمەي كەتىپ قالاتىن كورىنەدى.
وڭىردە ۇزاق جىلدار بويى شەشىمىن تاپپاي كەلە جاتقان كادر ماسەلەسىنىڭ ءتۇيىنى قاشان تارقايدى؟ زەر سالىپ قاراساق, وڭىردە جۇمىسسىز جۇرگەن جاستار جەتىپ ارتىلادى. ءتىپتى پوليتسيا قىزمەتكەرى اتانۋ ماقساتىمەن اسكەرگە اتتانىپ, وتان الدىنداعى بورىشىن وتەپ كەلگەن جاستار دا جەتكىلىكتى. الايدا سالاداعى ولقىلىق ءالى كۇنگە دەيىن جويىلار ەمەس. سوندا سوقتالداي جاستارىمىز جىگەرسىز بە؟ الدە, ولاردىڭ جاۋاپتى ورگاندا جۇمىس ىستەۋگە قابىلەتى جەتپەي مە؟ بىلەتىندەردىڭ ايتۋىنشا, قىزمەتكە تۇرعىسى كەلەتىن جاستار اڭگىمەلەسۋ بارىسىندا زاڭ تالاپتارىن بىلمەي ءسۇرىنىپ جاتادى ەكەن. ارينە, پوليتسيا بولۋ, مويىنعا جۇكتەلگەن جاۋاپكەرشىلىك جۇگىن ارقالاپ ءجۇرۋ وڭاي ەمەس.
ءوڭىر باسشىسى نۇرجان نۇرجىگىتوۆتىڭ ايتۋىنشا, سالاعا بيىل 5 ميلليارد تەڭگە قارجى ارتىق ءبولىنىپتى. ارينە, ىشكى ىستەر ورگاندارىنا جاعداي جاسالىپ جاتقانى دا قۋانتادى. ويتكەنى قوعام تىنىشتىعىنىڭ كۇزەتشىسىنە اينالعان سالا قىزمەتكەرلەرىنە ەڭ الدىمەن الەۋمەتتىك قولداۋ قاجەت.
پوليتسيا قىزمەتكەرلەرىنىڭ تاپشىلىعى ماسەلەسى ءبىراز ۋاقىتتان بەرى كوتەرىلىپ ءجۇر. الايدا ىلگەرىلەۋشىلىك بايقالمايدى. ارينە, ۇنەمدەلگەن قاراجات ەڭبەگىنە ادال قىزمەتكەرلەرگە سىياقى رەتىندە ۇلەستىرىلگەنى جاقسى. ايتكەنمەن, پوليتسيا قۇرامى تولىق جاساقتالعاندا عانا قىلمىس دەڭگەيى ايتارلىقتاي تومەندەيتىنى تالاس تۋدىرمايدى.
جامبىل وبلىسى
