72 وتباسىنىڭ ماسەلەسى شەشىلدى
مەملەكەت باسشىسى قاسىم-جومارت توقاەۆ بىرەر جىل بۇرىن ەلىمىزدەگى ءىرى ءارى الەۋەتتى كومپانيالار مەن الىپ سەرىكتەستىك باسشىلارىنا الەۋمەتتىك جوبالاردى جۇزەگە اسىرۋدى شەگەلەپ تاپسىرعانى بەلگىلى. پرەزيدەنت پارمەنىن «قازفوسفات» جشس-ءنىڭ جاڭادان تاعايىندالعان باسشىلارى دا نازاردان تىس قالدىرعان جوق. ولار ءبىرىنشى كەزەكتە جۇمىسشىلاردىڭ جاعدايىن جاساۋعا بىلەك ءتۇرىپ كىرىسكەن سىڭايلى. باسشىلىق الدىمەن قىزمەتكەرلەردىڭ الەۋمەتتىك ماسەلەلەرىن شەشۋگە ايرىقشا دەن قويعان. وسى ورايدا سەرىكتەستىك باسشىلارىمەن جۇزدەسىپ, بىرقاتار تىرلىكتىڭ تياناقتى اتقارىلعانىنا كوز جەتكىزگەندەي بولدىق.
«قازفوسفات» جشس-ءنىڭ باس ديرەكتورى عاني توقسانباەۆتىڭ ايتۋىنشا, كەيىنگى ۋاقىتتا كاسىپورىن باسشىلىعى سەرىكتەستىك قىزمەتكەرلەرىن تۇرعىن ۇيمەن قامتۋ, جۇمىسشىلاردىڭ جالاقىسىن مۇمكىندىگىنشە ارتتىرۋ, وڭىردەگى اباتتاندىرۋ جۇمىستارىنا اتسالىسۋ سەكىلدى وزگە دە ماسەلەلەردى نازارعا الىپ وتىر.
«كەيىنگى ۋاقىتتا سەرىكتەستىكتە ەڭبەك ەتەتىن قىزمەتكەرلەردى باسپانامەن قامتاماسىز ەتۋ ماسەلەسىن شەشۋگە ايرىقشا دەن قويدىق. وتكەن جىلى كاسىپورىن قىزمەتكەرلەرىنە قاراتاۋ قالاسىنان 72 پاتەردىڭ كىلتى تابىستالدى. قونىس تويىن تويلاعانداردىڭ قاتارىندا كوپبالالى وتباسىلار, ارداگەرلەر مەن مۇگەدەكتەر, سونداي-اق «شولاقتاۋ» تاۋ-كەن وڭدەۋ كەشەنىنىڭ قىزمەتكەرلەرى بار. جاڭا پاتەرگە قونىستانعان ازاماتتاردىڭ جۇزىنەن شاتتىقتىڭ لەبى ايقىن اڭعارىلىپ تۇردى. بۇل ازاماتتار وسىعان دەيىن قاجەتتى تۇرعىن ۇيمەن قامتىلماعان. باسشىلىق تۇرعىن ءۇي ماسەلەسىنەن بولەك, بالالارعا ارنالعان ويىن جانە سپورت الاڭدارى, ۆوركاۋت ايماعى بار جاڭا ساياباق سالعانىن ايتا كەتكەن ءلازىم دەپ ويلايمىن. كومپانيا قىزمەتكەرلەرىنىڭ بالالارى بوس ۋاقىتىن پايدالى وتكىزۋى ءۇشىن تۇرعىن ءۇي جانىنان فۋتبول مەن باسكەتبول الاڭدارى سالىندى. وسىلايشا, ۋاقىتىندا يەسىز جاتقان القاپ قازىر ادام تانىماستاي بولىپ وزگەردى. جارىقتاندىرۋ جۇمىستارى جۇرگىزىلگەننەن كەيىن اۋلادا وتىرعىزىلعان اعاشتار مەن كوگالداردىڭ كوشەتتەرى ادام جانىنا جايلى اتموسفەرا سىيلاپ تۇر», دەيدى ع.توقسانباەۆ
جۇمىسشىلار 226 پاتەرمەن قامتىلادى
كاسىپورىن باسشىسى كەلتىرگەن دەرەككە زەر سالساق, جۇمىسشىلاردى تۇرعىن ۇيمەن قامتاماسىز ەتۋ باعدارلاماسى بيىل دا قارقىندى تۇردە ءجۇرىپ جاتىر. جاڭاتاس قالاسىنداعى ء«ۇش بي» تۇرعىن ءۇي كەشەنىنىڭ قۇرىلىسى اياقتالعاننان كەيىن سەرىكتەستىك قىزمەتكەرلەرى, جاس ماماندار جانە از قامتىلعان 226 وتباسى پاتەرلى بولماق. بۇگىندە بۇل ەلىمىزدەگى ءىرى كاسىپورىندار اراسىنداعى رەكوردتىق كورسەتكىش بولىپ تۇر. تۇرعىن ءۇي كەشەنىنە تيەسىلى سپورت زال دا ۇزدىكسىز جۇمىس ىستەيدى, ال تۇرعىنداردىڭ بوس ۋاقىتىن ءتيىمدى پايدالانۋى ءۇشىن جاسىل جەلەكپەن كومكەرىلگەن اللەياعا جاڭعىرتۋ جۇمىستارى جۇرگىزىلەدى.
«اشىعىن ايتساق, كومپانيانىڭ ەكى جىلدا جۇرگىزگەن جۇمىستارىنىڭ ناتيجەسىندە تۇرعىن ۇيگە مۇقتاج ءۇش جۇزدەن اسا وتباسىنىڭ ماسەلەسى وڭ شەشىم تاۋىپ وتىر. بۇل جۇمىسشىلارعا كورسەتىلگەن ۇلكەن قولداۋ ەكەنىنە ەشكىم كۇمان كەلتىرە المايدى. بۇدان بولەك, ءبىز «وتباسى بانك» اق-مەن بىرلەسىپ, كومپانيا قىزمەتكەرلەرىنە جەڭىلدەتىلگەن نەسيە ماسەلەسىن قاراستىرىپ وتىرمىز. ناتيجەسىندە, سەرىكتەستىك قىزمەتكەرلەرى ءۇشىن ءتيىمدى قارىز بەرۋ ماسەلەسى شەشىمىن تابادى», دەيدى «قازفوسفات» جشس باس ديرەكتورى.
كومپانيا باسشىلىعى قولعا العان جۇمىستار مۇنىمەن تولاستامايدى. «قازفوسفات» جشس-نە قاراستى بارلىق جۇمىس ىستەيتىن بولىمشەلەر ورنالاسقان وڭىرلەردى اباتتاندىرۋ ماسەلەسى دە نازاردان تىس قالعان ەمەس. ناقتىراق ايتار بولساق, 2021 جىلى كاسىپورىن جەتەكشىلەرى تاراز قالاسىنداعى «ۇشبۇلاق» جاعالاۋىن تولىقتاي قالىپقا كەلتىردى. جاعالاۋ بويىنداعى اۋماق اباتتاندىرىلىپ, اعاشتار مەن كوگالدار وتىرعىزىلدى. سونداي-اق دەمالۋعا ىڭعايلى ورىندىقتار ورناتىلدى, بالالارعا ارنالعان ويىن الاڭى دا ۋاقىت تالابىنا ساي جابدىقتالدى. وزەنگە قاۋىپسىز پيرس سالىنعانىن دا ايتا كەتكەن ءجون. سونىمەن قاتار ۇزاق جىلدار بويى جۇمىس ىستەمەي تۇرعان جاياۋ جۇرگىنشىلەر كوپىرىن تولىعىمەن جوندەدى. مۇنداعى سەرۋەندەۋگە ارنالعان جاساندى ايماق تا قالا تۇرعىندارىنىڭ سۇيىكتى ورنىنا اينالدى.
شايقورىقتا ساياباق سالىنادى
كومپانيا باسشىلارى بۇعان دەيىن قولعا الىنعان ىلكىمدى ىستەردى ودان ارمەن قاراي ساتىمەن جالعاستىرۋ ماسەلەسىن دە ويلاستىرىپ وتىر. ويتكەنى وڭىردە اتقارىلاتىن جۇمىستار از ەمەس.
«وبلىس ورتالىعى تاراز قالاسىنىڭ ماڭىنداعى شايقورىق اۋىلىنان دەمالىس ساياباعىن سالۋدى قولعا الماقپىز. تۇرعىندار بوس ۋاقىتىن تەككە وتكىزبەۋى كەرەك. ولاردىڭ سپورتپەن شۇعىلدانۋى ءۇشىن مۇندا زاماناۋي سپورتتىق قۇرىلعىلار ورناتىلىپ, قاجەتتى قۇرال-جابدىقتار ورنالاستىرىلادى. بالالار ءۇشىن ارنايى جەكە ويىن الاڭدارى سالىناتىنىن دا اتاپ وتكەن ءجون. كومپانيا جەتەكشىلەرى مۇنداي يگىلىكتى باستامانى تەك جامبىل وبلىسىندا عانا ەمەس, «قازفوسفات» جشس بولىمشەلەرى ورنالاسقان باسقا وڭىرلەردە دە ىسكە اسىرادى. تۇركىستان وبلىسىنىڭ قۇمكەنت اۋىلىندا كاسىپورىن كوشەلەردى جارىقتاندىرۋ جوباسىن قارجىلاندىرۋدى جوسپارلاپ وتىر. مۇنداي ءىس-شارا اۋىل كوشەلەرىندەگى قاۋىپسىزدىكتى قامتاماسىز ەتۋگە ايتارلىقتاي ىقپال ەتەتىنى اقيقات. بۇعان قوسا قامقورلىققا ءزارۋ ادامدارعا, ارداگەرلەرگە جانە بالالار ۇيلەرىنە كومەكتەسەتىن قوعامدىق ۇيىمداردى قولداۋعا ەرەكشە نازار اۋدارامىز. جامبىل وبلىسىندا قايىرىمدىلىق ءىس-شارالارىنا 2022 جىلى 1,2 ملرد تەڭگە بولدىك. مۇنداي بەلسەندى قايىرىمدىلىق جۇمىستارى الداعى ۋاقىتتا دا جالعاسادى», دەيدى ع.توقسانباەۆ.
ەلىمىزدەگى ەڭ ءىرى كومپانيالاردىڭ ءبىرى كەيىنگى جىلدارى جۇمىسشىلاردى تەگىن تاعاممەن قامتاماسىز ەتۋ ماسەلەسىن شەشتى. قازىرگى ۋاقىتتا تاۋلىگىنە 6 مىڭعا جۋىق جۇمىسشى ىستىق تاماقپەن قامتىلعان. سونداي-اق قاراتاۋ قالاسىنىڭ ماڭىندا ورنالاسقان «كوكتال» ەمدەۋ-ساۋىقتىرۋ كەشەنىن كۇردەلۋى جوندەۋدەن وتكىزدى. ناتيجەسىندە, ەمدەۋ بلوگى جاڭارتىلىپ, بەس عيمارات جوندەلدى. اتقارىلعان جۇمىستاردىڭ ناتيجەسىندە مۇندا دەمالۋشىلاردىڭ سانى ەكى ەسەگە دەيىن ارتىپ وتىر.
بىرنەشە جىلدىڭ بەدەرىندە كومپانيا قىزمەتكەرلەرى جالاقىنى كوتەرۋ ماسەلەسىن العا تارتىپ جۇرگەن. قىزمەتكەرلەردىڭ ورىندى تالابى دا كومپانيا باسشىلارىنىڭ نازارىنان تىس قالماعانى قۋانتادى. ايتۋىنشا, جۇمىسشىلاردىڭ ەڭبەكاقىسى قاڭتار ايىندا 50 مىڭ تەڭگەگە ارتسا, 1 ماۋسىمنان باستاپ تاعى 30 مىڭعا كوبەيتىلمەك. بۇل, ارينە, قاراپايىم ەڭبەككەرلەر ءۇشىن ۇلكەن قولداۋ ەكەنى داۋسىز. قىزمەتكەرلەرگە كورسەتىلىپ جاتقان وزگە دە الەۋمەتتىك كومەكتەر جەتكىلىكتى. از كۇندە جۇمىسشىلاردىڭ بالالارى دەمالاتىن جازعى لاگەر ىسكە قوسىلادى.
«قازفوسفات» جشس باسشىلىعى ءبىرىنشى كەزەكتە قىزمەتكەرلەردىڭ الەۋمەتتىك جاعدايىن تۇزەتۋگە ايرىقشا دەن قويعانى راسىمەن دە كوپتەگەن ءىرى كومپانياعا ۇلگى دەسەك بولادى. بۇل باعىتتاعى جۇمىستاردىڭ الداعى ۋاقىتتا نازاردان تىس قالمايتىنى ءسوزسىز.
جامبىل وبلىسى
