جيروۆتىڭ ەسىمى – الەمدىك داڭق تورىندە

راسىندا ۆاسيا ونداي قۇرمەتكە لايىق. سپورتتىق مانسابىن بالقاش قا­لاسىندا ايگىلى باپكەر الەكساندر اپاچينسكيدىڭ قول استىندا باستاعان جەر­­لەسىمىز ۋاقىت وزا ءوز ءداۋىرىنىڭ ەڭ مىقتى بوكسشىلارىنىڭ ءبىرى ءارى بىرە­­گەيىنە اينالدى. اۋەسقوي رينگتە ول جاستار اراسىندا كسرو جانە ەۋرو­پا چەمپيونى اتاندى. ەرەسەكتەر دۋىنا قو­سىلعاننان كەيىن دە جيروۆتىڭ جەڭىستى جولى جالعاستى. اۋەلى ول تمد بىرىن­شىلىگىندە توپ جارىپ، ازيا ويىندارىندا ءۇشىنشى ورىنعا تابان تىرەدى. ازيا چەمپيوناتىندا التىن مەن كۇمىس مەدال­دەردى ەنشىلەدى.1993 جانە 1995 جىل­دارداعى الەم چەمپيوناتتارىندا قولا مەدالدى قورجىنعا سالدى. 1996 جىلى ات­لانتادا الاۋى تۇتانعان وليم­پيادا ويىن­دارىندا باس جۇلدەنى ولجالاپ قانا قويماي، ەڭ ۇزدىك بوكسشىعا تيەسىلى ۆەل باركەر كۋبوگىن دە توبەسىنە كوتەردى.

اتلانتاداعى دودا اياقتالعاننان كەيىن ۆاسيلي جيروۆ كاسىپقوي رينگتە كۇش سىناستى. 1997-2009 جىلدار ارا­لىعىندا 42 مارتە شارشى الاڭعا شىققان ول 38 رەت جەڭىس تويى­ن توي­لادى. 32 قارسىلاسىن نوكاۋتقا جىبەردى. 1999 جىلدىڭ 5 ماۋسىمىندا اقش-تىڭ ميسسيسيپي شتاتىنداعى بيلوسكي قالاسىندا «بالقاشتىڭ بارىسى» IBF نۇسقاسى بويىنشا ءبىرىنشى اۋىر سالماقتىڭ چەمپيوندىق بەلبەۋى ءۇشىن تالاسىپ، جەرگىلىكتى بوكسشى ارتۋر ۋيليامستى جەتىنشى راۋندتا ۇرىپ جىقتى. سودان كەيىن ول نەبىر دۇلەي كۇش يەلەرىن ەسىنەن تاندىرىپ، ءوز اتاعىن التى مارتە ءساتتى قورعادى.

2001 جىلدىڭ 6 اقپانىندا ۆاسيا ءوزىنىڭ كەزەكتى كەزدەسۋىن الاتاۋ باۋ­رايىندا وتكىزدى. سول كەزدە الما­تى­داعى با­لۋان شولاق اتىنداعى سپورت سارايىندا ينەشانشار ورىن بولمادى. ەلىمىزدىڭ ءار ايماعىنان كەلگەن جان­كۇيەرلەر قازاقستاننىڭ كاسىپقوي بوكس تاريحىنداعى تۇڭعىش الەم چەمپيونىنا بارىنشا قولداۋ كورسەتتى. جيروۆ ەل سەنىمىن اقتادى. پۋەرتو-ريكودان كەلگەن الەكس گونسالەستى سول قولىمەن يەكتىڭ استىنان ۇرىپ، ءبىرىنشى راۋندتا-اق سۇلاتىپ سالعانى ەسىمىزدە.

2003 جىلى جيروۆ العاش رەت جەڭىلىستىڭ كەرمەك ءدامىن تاتتى. ول اقش-تىڭ الىبى دجەيمس توۋنيدەن ۇپاي سانىمەن ۇتىلىپ، التىن بەلبەۋدەن ايىرىلدى. سول جىلدىڭ كۇزىندە ۋگاندالىق دجوزەف كيۆانۋكيدى قاپى قالدىرعاننان كەيىن ۆاسيلي اۋىر سالماققا اۋىسۋدى ءجون كوردى. بۇل ونىڭ قاتەلىگى بولدى. الىپتارمەن توعىز رەت اي­قاسقان ول التى رەت جەڭىسكە جەتسە، ءۇش جەكپە-جەكتە سان سوعىپ قالدى. اتاپ ايتساق، جەرلەسىمىز دجو مەسي مەن مايكل مۋرەرگە ەسە جىبەرىپ، ورلين نورريسپەن تەڭ ءتۇستى. ءبىر ايتا كەتەرلىگى، مۋرەردەن ول نوكاۋتپەن جەڭىلدى. ءوزىنىڭ سوڭعى كەزدەسۋىن جيروۆ 2009 جىلدىڭ 17 قازانىندا دجوناتان ۋيليامسكە قارسى وتكىزىپ، بۇل باسەكەدە ايقىن باسىمدىق تانىتتى. سودان كەيىن جەرلەسىمىز بىل­عارى قولعابىن شەگەگە ءىلدى.

ۆاسيلي جيروۆ ەلىمىزدىڭ عانا ەمەس، الەمدىك بوكس تاريحىندا دا اي­تار­­لىقتاي ءىز قالدىرعانى انىق. ول – قازاقستاننان شىققان تۇڭعىش وليمپيادا چەمپيونى، باركەر كۋ­بوگىنىڭ يەگەرى جانە كاسىپقوي بوكستان ال­عاشقى الەم چەمپيونى. سوندىقتان دا «بالقاش بارىسىنىڭ» ەسىمى جەكپە-جەك ونەرىنىڭ «داڭق زالى» مەن الەمدىك سپورت تاريحىندا التىن ارىپتەرمەن جازىلۋعا ابدەن لايىق.