«الەۋمەتتىك مەديتسينالىق ساقتاندىرۋ قورى» كەاق مالىمەتى بويىنشا, ءمامس جۇيەسى اياسىندا جاسالعان بۇل وپەراتسيانىڭ قۇنى 5 ملن تەڭگەگە جۋىق سومانى قۇرايدى.
قالا تۇرعىنى گاۋحار احمەتوۆا وتكەن جىلدان بەرى بەلى اۋىرىپ, بارلىق تەكسەرۋدەن وتەدى. قۇيىمشاق تۇسىنداعى شىداتپاس دەرتتەن ايىعۋدىڭ ءتۇرلى امالىن قاراستىرادى. تۇركيا, يزرايل ەلدەرىندەگى دارىگەرلەرگە دە حابارلاسادى. ونداعى دارىگەرلەر وپەراتسيا قۇنى 50 مىڭ ەۋرو تۇراتىنىن, بىراق وپەراتسيادان كەيىن ءجۇرىپ كەتەتىنىنە ەشقانداي كەپىلدىك بەرە المايتىنىن ايتقان. ويلانا كەلە ول مەديتسينالىق كومەك الۋ ءۇشىن ۇلتتىق نەيروحيرۋرگيا ورتالىعىنىڭ دارىگەرلەرىنە جۇگىنەدى.
سودان ناۋقاستى جان-جاقتى تەكسەرۋدەن وتكىزگەن ماماندار وپەراتسيا جاساۋ جولدارىن ويلاستىردى.
«سەگىزكوزدىڭ ىشىندە كىشى-ۇلكەن دارەتتى, اياقتىڭ قيمىل-قوزعالىسىن رەتتەپ تۇراتىن نەرۆ جۇيكەلەرى ورنالاسادى. ال ول تۇگەل الىنسا, ناۋقاسقا وتە اۋىر بولادى. ءبىز جاساعان وپەراتسيانىڭ ەرەكشەلىگى – ىسىكتى سەگىزكوزىمەن الىپ تاستاپ, ىشىندەگى نەرۆ جۇيەلەرىن ساقتاپ قالدىق», دەپ ءتۇسىندىردى نەيروحيرۋرگ-دارىگەر تالعات كەرىمباەۆ.
قۋانىشقا وراي, وپەراتسيا ءساتتى شىعىپ, دەرتىنەن ايىققان ەلوردالىق ازامات اياعىنان دا ءجۇرىپ كەتتى.
«مىقتى ماماندار بىزدە دە بار ەكەنىنە كوزىم جەتتى. شىنىمدى ايتسام, بۇلاي ءجۇرىپ كەتەم دەپ ويلامادىم. ءوزىمىزدىڭ وتاندىق دارىگەرلەردىڭ ەپتىلىگىنە, بىلىكتىلىگىنە باس ءيدىم. ايتار العىسىم شەكسىز!» دەيدى جاعدايىنىڭ جاقسى ەكەنىن جەتكىزگەن گ.احمەتوۆا.
دارىگەرلەردىڭ ايتۋىنشا, بۇل ەرەكشە وپەراتسيادان كەيىن ناۋقاس ەمىن-ەركىن ءجۇرىپ-تۇرا الادى. بۇرىن مۇنداي جاعدايدا سەگىزكوزدى نەرۆ جۇيەلەرىمەن قوسا كەسىپ تاستايتىن. ياعني ىسىكتى الۋدىڭ جالعىز جولى وسى بولعان. الايدا ونداي وپەراتسيادان كەيىن ناۋقاس ارباعا تاڭىلىپ قالاتىن.
ۇلتتىق نەيروحيرۋرگيا ورتالىعىنىڭ دارىگەرلەرى بۇل وپەراتسيانى تاعى بىرنەشە ادامعا جاساپ, اياعىنان تۇرعىزعان. ەندى عىلىمي ماقالالار جازىپ جاريالاۋ ارقىلى بۇل وپەراتسيا جاساۋ ءادىسىن الەمدىك دەڭگەيگە جەتكىزۋدى كوزدەپ وتىر. جالپى, ورتالىقتا جىلىنا 4 مىڭنان اسا وپەراتسيا جاسالادى, ونىڭ ىشىندە ومىرتقاعا جاسالاتىن ەڭ كۇردەلى وپەراتسيالار دا بار.
