«Astana Hub»-تىڭ حابارلاۋىنشا, جاس IT-كومپانيالار «Hero Training» باعدارلاماسىنىڭ ەكىنشى كەزەڭىنە ءساتتى ءوتتى. باعدارلامانى «Draper University» مەن «Draper Fisher Jurvetson» ۆەنچۋرلىق كومپانياسىنىڭ نەگىزىن قالاۋشى تيم درەيپەر اشتى.
باستاپقىدا باعدارلاماعا 199 ستارتاپتان ءوتىنىم تۇسكەن. سونىڭ 80-ءى پرەاكسەلەراتسيادان ءوتىپ, ناتيجەسىندە 15 ۇزدىك جوبا تاڭدالعان. ولار – «Flowsell.me», «ozen», «CITIX», «SpaceLab», «Smartestprep», «BEEP», «Beyne.ai», «Sqm-invest», «Connected Home Ltd.», «Med365», «Big Dream Lab», «Alaqan Technologies» (بارلىعى – قازاقستان), «Smart Technologies» (قىرعىزستان), «FIBO CLOUD» (موڭعوليا), «Medixbot» (تۇركيا).
سونداي-اق ءتورت ستارتاپ («Beyne.ai», «GoDays», «BEEP» جانە «Smartestprep») ارقايسىسى 30 مىڭ دوللار تۇراتىن «my ventures» باعدارلاماسىنىڭ سەرىكتەسىنەن ينۆەستيتسيا الدى.
«بۇل – ءبىزدىڭ ستارتاپتارىمىزعا العاش رەت ۇسىنىلىپ جاتقان بىرەگەي مۇمكىندىك. قاتىسۋشىلاردىڭ قۇرامى ءارتۇرلى بولعانىنا قۋانىشتىمىز. وتاندىق ستارتاپتارمەن قاتار قىرعىزستان مەن موڭعوليادان كەلگەن ستارتاپتارعا كرەمني القابىندا وقۋعا مۇمكىندىك بەردىك. سونداي-اق ءبىزدىڭ باعدارلاماعا العاش رەت تۇركيا ستارتاپى قاتىسىپ جاتىر. سونىمەن قاتار ەكى اپتالىق پرەاكسەلەراتسيا ناتيجەسى بويىنشا «Draper University Ventures» كومانداسى 15 فيناليستەن باسقا «follow-up meeting»-كە تاعى دا بىرقاتار جوبانى شاقىرۋ تۋرالى شەشىم قابىلدادى. بۇل قاتىسۋشىلارعا «Draper University's dedicated alumni fund» اتىنان 100 مىڭ دوللارعا دەيىن قارجىلاندىرۋدى تارتۋعا قوسىمشا مۇمكىندىك بەرىلەدى», دەدى «Astana Hub» باس ديرەكتورى ماعجان ماديەۆ.
«Astana Hub» جانە «Draper University» سەرىكتەستىگى اياسىندا كرەمني القابىندا ستارتاپتار قارقىندى اكسەلەراتسيا باعدارلاماسىنان وتەدى جانە ءوز جوبالارىن الەمدىك نارىققا, ونىڭ ىشىندە اقش نارىعىنا ماسشتابتاۋعا مۇمكىندىك الادى.
قارقىندى اكسەلەراتسيالىق باعدارلاما «Draper University»-دەگى كامپۋس بازاسىندا وتەدى. التى اي بويى بارلىق ستارتاپقا باسپانا مەن جۇمىس كەڭىستىگى ۇسىنىلادى. وسى كەزەڭدە قاتىسۋشىلاردىڭ تاجىريبەلى تەحنولوگيالىق كاسىپكەرلەر مەن «Draper» ەكوجۇيەسى ساراپشىلارىنىڭ جەتەكشىلىگىمەن ينۆەستيتسيا تارتۋعا جانە اقش نارىعىنا شىعۋعا بىرەگەي مۇمكىندىگى بولادى.
كرەمني القابىنداعى وقۋ كەزىندە ستارتاپتار ءۇشىن «Demo Day»-گە قاتىسۋ (وفلاين), نەتۆوركينگ, ساراپشىلاردىڭ ساراپتاماسى مەن تالىمگەرلىگى قولجەتىمدى بولادى ءارى ولارعا اقش-تاعى «Astana Hub» حالىقارالىق اگەنتتىگى قولداۋ كورسەتەدى.
ايتا كەتەيىك, وسى جىلدىڭ 10 ناۋرىزىندا سان-ماتەودا (كاليفورنيا شتاتى) ەلىمىزدىڭ تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات ءمۋسيننىڭ اقش-قا رەسمي ساپارى كەزىندە «Astana Hub» باس ديرەكتورى ماعجان ماديەۆ پەن «Draper University» پرەزيدەنتى اسرا ناديم ىنتىماقتاستىق تۋرالى شارتقا قول قويعان بولاتىن.
«Draper Ecosystem» – يننوۆاتسيالىق ەكوجۇيەنى قولداۋ ءۇشىن وزىق فاسيليتاتورلار مەن تالىمگەرلەردىڭ, سالالىق ساراپشىلاردىڭ, كورپوراتيۆتىك سەرىكتەستەردىڭ جانە ينۆەستورلاردىڭ تەڭدەسى جوق جەلىسىن ۇسىنۋ ارقىلى تالانتتاردى, ساراپشىلاردى جانە ينۆەستورلاردى بىرىكتىرۋدىڭ بىرەگەي ءتاسىلى. «Draper University» نەگىزىن ۆەنچۋرلىق كاپيتال بيزنەسىندە 38 جىلدىق تاجىريبەسى بار تيم درەيپەر قالاعان. ونىڭ باسقارۋىندا 11 قور بار, وعان 7,7 ملرد دوللار ينۆەستيتسيا سالعان.
