اتى يليا بورششوۆ دەيتىن ورىس بوتانيگىنىڭ قۇرمەتىنە قويىلعان بۇل گۇل تورعاي, ارال وڭىرىندەگى قۇمدى شولدەردە, قىزىلقۇمدا كەزدەسەدى. ارالداعى بارساكەلمەس قورىعىنىڭ ءسانىن كىرگىزىپ تۇرعان دا وسى گۇل. قىستا قار مول تۇسكەن جىلدارى لالاگۇلدەر تۇقىمداسىنىڭ قىزعالداق توبىنا جاتاتىن بۇل وسىمدىكتىڭ قارماقشىداعى قورقىت اتا كەسەنەسىنىڭ ماڭىندا جايقالىپ تۇرعانىن دا تالاي كورگەنبىز. جاپىراعى كادىمگى الوەنىڭ ساباعىنا كەلىڭكىرەيتىن بورششوۆ قىزعالداعى مۇناي وندىرىلەتىن قۇمكول ماڭايىن دا «جاتىرقاي» قويمايدى.
جالپى, ەلىمىزدە قىزعالداقتىڭ 35 ءتۇرى وسسە, ونىڭ 18-ءى «قىزىل كىتاپقا» ەنگەن. بارساكەلمەس قورىعىندا ءساۋىر-مامىر ايلارىندا گۇلدەپ, مامىر-ماۋسىم ايلارىندا تۇقىم شاشاتىن بورششوۆ قىزعالداعىنان بولەك ەلىمىزدە قورعاۋعا الىنعان تاعى 4 وسىمدىك وسەدى.
كوكتەمنىڭ كوركى, سۇلۋلىقتىڭ نىشانى قىزعالداقتاردى قورعاۋ مەن دارىپتەۋ ماقساتىندا رەسپۋبليكالىق «پاركتەر شەرۋى-2023» تابيعات قورعاۋ اكتسياسى اياسىندا ارالدا «قىزعالداقتار فەستيۆالى» ءوتىپ, بورششوۆ قىزعالداعى تۋرالى مەكتەپ وقۋشىلارىنىڭ جاساعان تانىمدىق كورمەلەرى مەن پاننولار ۇيىمداستىرىلدى. اۋدان مەكتەپتەرىندە دالا سانىنە اينالعان قىزعالداققا ارنالعان ەكولوگيالىق ءىس-شارالار ءوتتى.
قىزىلوردا
