پرەمەر-ءمينيستردىڭ ورىنباسارى – قارجى ءمينيسترى ەرۇلان جاماۋباەۆتىڭ ايتۋىنشا, قاڭتار-ءساۋىر ايلارىندا مەملەكەتتىك بيۋدجەتكە 6,1 ترلن تەڭگە كىرىس تۇسكەن, جوسپار 104,6% ورىندالعان. اتاپ ايتقاندا, رەسپۋبليكالىق بيۋدجەت 4 ترلن تەڭگەگە, جەرگىلىكتى بيۋدجەتتەر 2 ترلن 123 ملرد تەڭگەگە تولىقتى. بارلىق وڭىرلەر بويىنشا كىرىس جوسپارلارى اسىرا ورىندالدى. وسى كەزەڭدە مەملەكەتتىك بيۋدجەت شىعىستارى 98,6%-عا, رەسپۋبليكالىق بيۋدجەت 99%-عا, جەرگىلىكتى بيۋدجەتتەر 98,6%-عا ورىندالدى.
پرەمەر-مينيستر 4 ايدىڭ قورىتىندىسى بويىنشا ەل ەكونوميكاسى جاقسى ءوسۋ قارقىنىن كورسەتىپ وتىرعانىن اتاپ ءوتتى.
«جالپى ىشكى ءونىم كولەمى وتكەن جىلدىڭ سايكەس كەزەڭىمەن سالىستىرعاندا 5%-عا ۇلعايدى. ەكونوميكانىڭ بازالىق سالالارىندا وڭ ديناميكا ساقتالدى. وڭدەۋ ونەركاسىبى 5,1%-عا ءوستى», دەدى ءاليحان سمايىلوۆ.
سونداي-اق ماشينا جاساۋدا – 36%, ونىڭ ىشىندە اۆتوموبيل جاساۋدا – 41%, لوكوموتيۆتەر مەن ۆاگوندار وندىرىسىندە – 64%, جەڭىل ونەركاسىپ سالاسى – 35%, توقىما وندىرىسىندە – 55%, كيىم-كەشەك – 8%, بىلعارى ونىمىندە – 2%, سونداي-اق قۇرىلىس سالاسىندا 15%-دان استام ورنىقتى ءوسىم قالىپتاسىپ وتىر.
ازىق-ت ۇلىك جانە مينەرالدى ونىمدەر ءوندىرىسى 8%-عا, ەلەكتر ەنەرگياسىن ءوندىرۋ 6%-عا ۇلعايدى. فارماتسەۆتيكا مەن اۋىل شارۋاشىلىعى 4%-عا, مۇناي وڭدەۋ 3%-عا, تاۋ-كەن ونەركاسىبى 2%-عا ءوستى. قىزمەت كورسەتۋ سەكتورى 5%-عا ءوستى. بۇعان ساۋدا, اقپارات, بايلانىس جانە كولىك سالالارى وڭ اسەر ەتتى.
«تۇراقتى ينۆەستيتسيالىق بەلسەندىلىك, ونىڭ ىشىندە شيكىزاتتىق ەمەس سەكتورلارعا ينۆەستيتسيا تارتۋ سەرپىندى ەكونوميكالىق ءوسىمنىڭ باستى فاكتورى بولىپ تابىلادى. تاۋ-كەن ءوندىرىسىن ەسەپكە الماعاندا, نەگىزگى كاپيتالعا سالىنعان ينۆەستيتسيالاردىڭ ءوسۋى 18%-دان استى», دەپ اتاپ ءوتتى پرەمەر-مينيستر.
جالپى, 4 ايدىڭ قورىتىندىسى بويىنشا اباي, جەتىسۋ, ۇلىتاۋ, اقمولا, باتىس قازاقستان, قوستاناي, قىزىلوردا, پاۆلودار, سولتۇستىك قازاقستان وبلىستارى مەن الماتى قالاسىندا بارلىق ماكروكورسەتكىشتەردىڭ ءوسۋى تىركەلىپ وتىر. ەڭ تومەن كورسەتكىشتەر – اتىراۋ جانە اقتوبە وبلىستارىندا بايقالادى.
«قازىرگى جاعدايدا ءبىز ەكونوميكالىق ءوسىمنىڭ جوعارى قارقىنىن قامتاماسىز ەتۋىمىز كەرەك. بۇل – وڭاي شارۋا ەمەس. وعان ەكونوميكانىڭ سالالارىندا ۇيلەسىمدى جۇمىستى قامتاماسىز ەتە وتىرىپ, قول جەتكىزۋگە بولادى. الدىمىزدا تۇرعان مىندەتتەردى ورىنداۋ ءۇشىن ءاربىر مينيسترلىك پەن ءوڭىردىڭ قوساتىن ۇلەسى اسا ماڭىزدى», دەپ اتاپ ءوتتى ءاليحان سمايىلوۆ.
ول مينيسترلىكتەر مەن ءوڭىر باسشىلارى ەكونوميكانى ودان ءارى ءارتاراپتاندىرۋ, جانە تۇراقتى جۇمىس ورىندارىن قۇرۋ بويىنشا جۇمىستى جالعاستىرۋى قاجەت ەكەنىن اتاپ ءوتتى. بۇل ورايدا, ىشكى نارىقتى وتاندىق تاۋارلارمەن تولىقتىرۋعا جانە شيكىزاتتىق ەمەس ءونىم شىعارۋعا باسىمدىق بەرىلۋى ءتيىس.
ونىڭ ايتۋىنشا, ىسكەرلىك بەلسەندىلىكتى ارتتىرىپ, ەكونوميكانى ساپالى دامىتۋ ءۇشىن ىشكى جانە سىرتقى ينۆەستيتسيالاردى تارتۋ جۇمىسىن جانداندىرۋ قاجەت. سونداي-اق وڭدەۋ ونەركاسىبى, اۋىل شارۋاشىلىعى, كولىك, لوگيستيكا, IT, تۋريزم جانە باسقا سالالاردا جوسپارلانعان ينۆەستيتسيالىق جوبالار پۋلىن ىسكە اسىرۋعا كۇش سالۋ قاجەت.
ء«بىز نەگىزگى كاپيتالعا 18,5 ترلن تەڭگە مولشەرىندە ينۆەستيتسيا تارتۋىمىز كەرەك», دەدى پرەمەر-مينيستر.
سونىمەن قاتار كاسىپكەرلىك پەن باسەكەلەستىكتى دامىتۋ, سونداي-اق كولەڭكەلى ەكونوميكا دەڭگەيىن تومەندەتۋ شارالارىن ءارى قاراي جالعاستىرۋ ماڭىزدى. اسىرەسە, شاعىن جانە ورتا بيزنەستە جۇمىس ورىندارىن قۇرۋعا باسا نازار اۋدارۋ كەرەك. جاڭا وندىرىستەردىڭ پايدا بولۋىنا جانە قولدانىستاعى وندىرىستەردى كەڭەيتۋگە باعىتتالعان باستامالاردى بەلسەندى تۇردە قولداعان ءجون.
«بيزنەستى اشۋعا جانە جۇرگىزۋگە بارىنشا جاعداي جاساپ, كاسىپكەرلەردىڭ پروبلەمالارىن جەدەل شەشۋ قاجەت. بۇل مىندەت ءتيىستى مينيسترلىكتەر مەن اكىمدىكتەردىڭ تۇراقتى باقىلاۋىندا بولۋى ءتيىس», دەدى ءاليحان سمايىلوۆ.
ەكونوميكالىق ساياساتتاعى باسىمدىقتاردىڭ ءبىرى – مەملەكەتتىڭ ەكونوميكاداعى ۇلەسىن جالپى ىشكى ءونىمنىڭ 14,4%-ىنا دەيىن بىرتىندەپ قىسقارتۋ. بيىل 2025-ءشى جىلعا دەيىنگى جەكەشەلەندىرۋدىڭ كەشەندى جوسپارىنىڭ 90%-عا ورىندالۋىن قامتاماسىز ەتۋ كەرەك.
پرەمەر-مينيستر مۇنىمەن قاتار باعانىڭ وسۋىن تەجەۋگە كۇش سالۋ قاجەتتىگىن اتاپ ءوتتى.
ء«بىزدىڭ ماقساتىمىز – بيىل ينفلياتسيانى 2 ەسەگە تومەندەتۋ. ول ءۇشىن ۇيلەسىمدى جانە ناقتى شۇعىل شارالار قاجەت. بيىلعى جىلدىڭ ءساۋىر ايىندا ينفلياتسيا 16,8%-عا دەيىن باياۋلادى. ءوڭىر اكىمدەرى الەۋمەتتىك ماڭىزى بار ازىق-ت ۇلىك تاۋارلارىنىڭ باعاسىن تۇراقتاندىرۋ بويىنشا ساپالى جۇمىستى جالعاستىرۋى كەرەك», دەدى ۇكىمەت باسشىسى.
ول سونداي-اق ينفلياتسيا دەڭگەيىن باقىلاۋ جانە تومەندەتۋ جونىندەگى وزەكتەندىرىلگەن شارالار جوسپارىن ورىنداۋ ءۇشىن بارلىق ءتيىستى شارالاردى قابىلداۋ قاجەت ەكەنىن ايتتى.
قورىتىندىلاي كەلە, پرەمەر-مينيستر قارجىلىق ءتارتىپتى كۇشەيتۋ جانە مەملەكەتتىك بيۋدجەت شىعىستارىنىڭ تيىمدىلىگىن ارتتىرۋ ماڭىزدى ەكەنىنە نازار اۋداردى. اتاپ ايتقاندا, «بيزنەستىڭ جول كارتاسى – 2025» جانە «قاراپايىم زاتتار ەكونوميكاسى» باعدارلامالارى بويىنشا ىسكە اسىرىلاتىن شارالاردىڭ ساپاسىن جاقسارتقان ءجون.
