32 جاستاعى دامير يسماعۇلوۆ كاسىبي تۇردە ارالاس جەكپە-جەكپەن 2014 جىلدان بەرى اينالىسىپ كەلەدى. ءتورت جىلدان اسا ۋاقىت ارالىعىندا 20 مارتە وكتاگونعا شىققان ول 19 رەت جەڭىسكە جەتىپ, 13-ىندە ايقىن باسىمدىق تانىتتى. ءالى ەسىمىزدە, 2016 جىلى دامير الماتىعا كەلىپ, دانيار قاسقاراۋوۆ جەتەكشىلىك ەتەتىن «الاش پرايد» پروموۋشەنى ۇيىمداستىرعان ءدۇبىرلى دوداعا قاتىستى. ءبىر تاۋلىكتىڭ ىشىندە تەمىرلان ءايسادىلوۆ, ايبەك نۇرسەيىت جانە مارات باقتىورازوۆ سىندى سپورتشىلاردى سان سوقتىرىپ, باس جۇلدەگە تىگىلگەن «تەمىر تۇلپاردى» تىزگىندەدى. الاتاۋ باۋرايىنداعى جارىس قانداسىمىزدىڭ ءىرى جەڭىستەرىنىڭ التىن باستاۋى بولدى دەسەك تە بولادى. ولاي دەۋگە نەگىز, يسماعۇلوۆ كەلەسى جىلى ورىنبوردا وتكەن تۋرنيردە نەۆا جاعالاۋىنان كەلگەن ماكسيم ءديۆنيچتى ويسىراتا ۇتىپ, م-1 نۇسقاسى بويىنشا چەمپيوندىق بەلبەۋدى يەلەندى. ول سودان كەيىن قاتارىنان ەكى رەت ءوز اتاعىن ءساتتى قورعادى.
وسىنداي جارقىن جەڭىستەردەن كەيىن دامير UFC-ءدىڭ قىراعى ماماندارىنىڭ نازارىنا ىلىكتى. ارالاس جەكپە-جەك الەمىندەگى ەڭ بەلدى ۇيىمىنداعى تۇساۋكەسەر كەزدەسۋىن يسماعۇلوۆ 2018 جىلدىڭ 2 جەلتوقسانىندا اۋستراليانىڭ ادەلايدا قالاسىندا وتكىزىپ, جەرگىلىكتى فايتەر الەكس گوردجيستەن ايلاسىن اسىردى. كوپ ۇزاماي ول حوەل الۆارەس, تياگۋ مويزيس, رافاەل الۆيس جانە گۋرام كۋتاتەلادزەنى ۇتىپ, جەڭىل سالماقتىلار رەيتينگىندە توپ-15 سپورتشىنىڭ قاتارىنا ەندى.
ءوزىنىڭ كەيىنگى جەكپە-جەگىن دامير بىلتىرعى جىلدىڭ اياعىندا اقش-تىڭ لاس-ۆەگاس قالاسىندا رەسەيدىڭ تۋى استىندا ونەر كورسەتىپ جۇرگەن ارميان جىگىتى ارمان تسارۋكيانمەن وتكىزدى. قارسىلاستاردىڭ دەڭگەيلەرى شامالاس بولدى. ەكەۋى قانشا ارپالىسسا دا, ءبىر-ءبىرىن الا المادى. باسەكە تەڭ دارەجەدە ءوتتى. دەسەك تە تورەشىلەر تسارۋكياندى جەڭىمپاز دەپ جاريالادى. وسى ساتسىزدىكتەن كەيىن قازاق فايتەرى UFC-دەن كەتەتىنىن جالپاق جۇرتقا جاريا ەتتى. الايدا ارادا بىرەر اي وتكەن سوڭ ول رايىنان قايتتى. مىنە, ەندى «قازاق» قايتا ايقاس الاڭىنا شىعۋعا بەكىندى. ال دامير يسماعۇلوۆتىڭ قارسىلاسى جايىندا ءبىز نە بىلەمىز؟
29 جاستاعى گرانت دوۋسون اقش-تىڭ ۆيسكونسين شتاتىنداعى كامبريا قالاشىعىندا دۇنيەگە كەلدى. ونىڭ دا ارالاس جەكپە-جەكپەن شۇعىلدانىپ جۇرگەنىنە توعىز جىلعا جۋىقتادى. جاناما اتى – «Prophet». دوۋسون – برازيليالىق دجيۋ-دجيتسۋدىڭ حاس شەبەرى. العاشقى ەكى جىلدا 11 كەزدەسۋ وتكىزگەن گرانت 10 رەت جەڭىس تويىن تويلادى. 2017 جىلى دەين ۋايت پرەزيدەنتتىك سەريانىڭ ىرىكتەۋ سىنىنان ىركىلمەي ءوتىپ, UFC-مەن كەلىسىمشارتقا وتىردى. اتالعان ۇيىمدا ول سەگىز مارتە ايقاس الاڭىنا شىعىپ, جەتى رەت جەڭىسكە جەتتى. تاعى ءبىر باسەكەدە تەڭ ەسەپ تىركەلدى. اقش سپورتشىسى دجۋليان ەروسا, مايكل تريزانو, دارريك ميننەر, ناد ناريماني, لەوناردو سانتوس جانە جارەب گاردون سىندى شەبەرلەردى ۇتىپ, توپ-15 سپورتشىنىڭ قاتارىنا قوسىلدى.
ءوزىنىڭ كەيىنگى كەزدەسۋىن گرانت دوۋسون بىلتىرعى قاراشا ايىندا دانيالىق مارك مادسەنمەن وتكىزدى. بۇل ەسىم جانكۇيەرلەرگە جاقسى تانىس. ول گرەك-ريم كۇرەسىنەن ريو وليمپياداسىنىڭ كۇمىس جۇلدەگەرى, الەم چەمپيوناتتارىندا ءتورت كۇمىس جانە ءبىر قولا مەدال ولجالادى. ارالاس جەكپە-جەكتەن 12 كەزدەسۋ وتكىزىپ, بارلىعىندا مەرەيى ۇستەم بولدى. سول اتاعى جەر جارعان مادسەندى توقتاتقان – دوۋسون. ول دانيالىقتى قىلقىندىرىپ تاستادى. مىنە, وسىدان-اق دامير يسماعۇلوۆتىڭ قارسىلاسى قانشالىقتى ازۋلى ەكەنىن اڭعارۋعا بولادى.
«1 شىلدەدە UFC-گە قايتا ورالامىن. قارسىلاسىم توپ-15 سپورتشىنىڭ قاتارىندا. بۇل – مەن ءۇشىن كەزەكتى ۇلكەن سىناق. وسى جەكپە-جەكتە بولاشاعىمنىڭ ايقىندالاتىنى انىق. مەنىڭ ەشكىمنەن دە, ەشتەڭەدەن دە قايمىقپايتىنىمدى وزدەرىڭىز جاقسى بىلەسىزدەر. ويتكەنى قازاقتار قورقۋ دەگەندى بىلمەيدى. مەن الداعى ايقاسقا ساقاداي-ساي ازىرلىكپەن كەلىپ, جەڭىسكە جەتۋ ءۇشىن بارىمدى سالامىن», دەيدى د.يسماعۇلوۆ.
