دۋربانداعى دوداعا دايارلىق

اتالعان جارىستا ەلىمىزدىڭ سەگىز سپورتشىسى باق سى­نايدى. ولار – كيريلل گەرا­سيمەنكو (جە­كە, جۇپتىق جانە ارالاس جۇپ­تىق سايىس), الان قۇر­مان­عاليەۆ (جۇپتىق سايى­س), ايدوس كەنجەعۇلوۆ (ارالاس جۇپ­تىق سايىس), دەنيس جولۋدەۆ (جۇپتىق سايىس), ساعىنتاي قۇر­مامباەۆ (جۇپتىق سايىس), اناس­تاسيا لاۆروۆا (جەكە, جۇپ­تىق جانە ارا­لاس جۇپتىق سايىس), زاۋرەش اقاشەۆا (جەكە, جۇپتىق جانە ارا­لاس جۇپ­تىق سايىس) جانە سار­ۆينوز مىر­قادىروۆا (جەكە سايىس).

جوعارىدا ەسىمدەرى اتالعان سپورتشىلار اراسىنداعى ەڭ ۇز­دىگى كيريلل گەراسيمەنكو ەكەنى ءسوزسىز. 26 جاستاعى اس­تا­نالىق ساڭ­لاق الەمدىك رەيتينگتە 53-ورىن­دا تۇر. بۇل – كەزىندە كسرو قۇرامىندا بولعان مەم­لە­كەت وكىلدەرى ارا­سىنداعى ەڭ ۇز­دىك كورسەتكىش. كي­ريلل ريو-دە-جانەيرو جانە توكيو وليم­پيادالارى مەن الەم چەم­پيو­ناتتارىنا قا­تى­سىپ, كوپتەگەن حا­لىقارالىق جارىس­تاردا جۇلدە الىپ ءجۇر. سول سەب­ەپتى دە وعان دۋر­باندا زور سەنىم ارتىلىپ وتىر.

كەيىنگى جىلدارى ورەلى ونە­رىمەن كوزگە ءتۇ­سىپ جۇرگەن 16 جاستاعى الان قۇرمانعاليەۆ تە وار-دان ولجالى ورالادى دەپ ۇمىتتەنەمىز. جاستار بۋىنى اراسىنداعى جارىس­تاردا جاسىنداي جار­قىل­داعان جەرلەسىمىز ەرەسەكتەر دۋىندا دا ءوزىن جاقسى قىرىنان كور­سەتە ءبىلدى. قازىرگى كەزدە ول الەم­دىك رەيتينگتە 207-ورىندى ەنشىلەيدى. سونداي-اق باسقا دا وتان­دىق ۇستەل تەن­نيس­شىلەرى جەر-جا­ھاننىڭ مىق­تىلارى باس قوس­قان جارىستا بارىن سالۋعا ءتيىس.

جالپى, ۇستەل تەننيسىنەن الەم چەمپيوناتى 1926 جىلدان بەرى ۇيىمداستىرىلىپ كەلەدى. العاشقى جارىستىڭ تۇساۋى لوندوندا كە­سىلدى. سول باسەكەلەردە ەڭ كوپ جۇل­دە ال­عان – قىتاي قۇراماسى. ولار بارلىعى 407 (145 التىن+103 كۇ­مىس+159 قولا) مەدال ولجالادى. ەكىنشى جانە ءۇشىنشى ورىن­داردى ما­جارستان (68+58,5+75,5) مەن جاپونيا (48+36+73) يەلەنەدى. سونداي-اق چەحيا (28+34,5+59), رۋ­­مىنيا (16,5+10,5+19), ان­گليا (15+20+61), شۆەتسيا (13+15+12,5), اقش (9,5+2+20), اۋس­­تريا (6+15,5+19) جانە گەر­ما­نيا قۇ­را­­مالارى (5+16,5+21,5) توپ-10 كو­مان­دانىڭ قاتارىنا ەنىپ وتىر.

قازىرگى كەزدە سپورتتىڭ بۇل تۇرىندە قىتايدىڭ قارقىنىنا ەشبىر كوماندا توتەپ بەرە الاتىن ەمەس. ەرلەر اراسىنداعى جە­كەلەگەن باسەكەلەردە سول ەل­دىڭ ورەندەرى قاتارىنان توعىز جارىس­تا توپ جارسا, ايەلدەرى 14 جىل بويى قارسىلاس شىداتار ەمەس. سونىمەن قاتار جۇپتىق جانە ارالاس جۇپتار سايىسىندا دا قىتايلىقتاردىڭ الدىنا ەشكىم تۇسە المايتىنداي. 

سوڭعى رەت ۇستەل تەننيسىنەن الەم چەمپيوناتى 2021 جىلى اقش-تىڭ حيۋستون قالاسىندا ۇيىم­داستىرىلدى. سول جا­رىس­­تا ساراپقا سالىنعان بەس باس جۇلدەنىڭ تورتەۋىن قىتاي قۇ­راما كو­مان­داسىنىڭ مۇشەلەرى ولجالادى. تارقاتىپ ايتساق, ەرلەر اراسىندا 26 جاستاعى فان چجەندۋنگە تەڭ كەلەر ەش­­­كىم تابىلمادى. في­نالدا ول شۆەتسيالىق ترۋلس ميو­رەگوردتى ۇتتى. ايەلدەر سايىسىنا 24 جاس­تاعى ۆان ءمانيۋيدىڭ مەرەيى ۇستەم بولدى. اقتىق سىندا ول ءوزىنىڭ وتانداسى سۋن ينشادان ايلاسىن اسىردى. سول سەكىلدى ايەل­دەردىڭ جۇپتىق جانە ارالاس جۇپتاردىڭ تار­تىسىندا دا قىتاي ەلى وكىل­دەرىنىڭ اسىعى الشىسىنان ءتۇس­تى. تەك ەرلەردىڭ جۇپ­تىق باسەكەسىندە ولارعا باس جۇلدە بۇيىرمادى. بۇل جارىستا قۇرا­مىندا كريستيان كارلس­سون مەن مات­تياس فالك سىندى شە­­بەر­­لەرى بار شۆە­­­تسيا قۇ­راماسى شا­شاسىنا شاڭ جۇق­تىر­مادى.