«وبلىسىمىز بىلەكتى دە جۇرەكتى بالۋانداردان كەندە ەمەس. تۇڭعىش «قازاقستان بارىسى» ۇلان رىسقۇل ءبىزدىڭ ءوڭىردىڭ تۋماسى ەكەنى بارشاعا ءمالىم. بىلتىر بۇل جوبانىڭ 10 جىلدىق مەرەيتويى اتالىپ ءوتتى. وسى جىلدار ارالىعىندا وبلىسىمىز ءدۇبىرلى دوداعا ءوزىنىڭ ءاپايتوس بالۋاندارىن قوسىپ كەلەدى. ال وڭىردەگى كىل مىقتىدان كىم مىقتى ەكەنى بۇگىنگى سايىستا بەلگىلى بولادى. سوندىقتان تۋرنيرگە قاتىسۋشىلارعا ساتتىلىك تىلەي وتىرىپ, رەسپۋبليكادا الماتى وبلىسىنىڭ مەرەيىن اسقاقتاتار ناعىز شەبەر جەڭىسكە جەتسىن», دەدى جارىستىڭ اشىلۋ سالتاناتىنا قاتىسقان ايماق باسشىسى مارات سۇلتانعازيەۆ.
قوناەۆ قالاسىنىڭ ورتالىق الاڭىندا وتكەن تۋرنيردە ايماقتىڭ تۇكپىر-تۇكپىرىنەن سالماعى 90 كيلودان جوعارى 28 بالۋان بەلدەستى. ولاردىڭ بارلىعى ءوز وڭىرلەرىندە ۇزدىك ۇشتىكتەن كورىنگەن سپورتشىلار.
جارىس قورىتىندىسىندا بارلىق قارسىلاسىن تىزە بۇكتىرىپ, «الاتاۋ ارلانى» اتانعان قوناەۆ قالاسىنىڭ وكىلى ءمادي ەدىلباەۆ التىن بەلبەۋدىڭ يەسى اتانىپ, 5 ملن تەڭگە اقشالاي سىيلىققا يە بولدى. ەندى ءمادي رەسپۋبليكالىق تۋرنيردە وبلىستىڭ نامىسىن قورعايتىن بولادى.
ال ەڭبەكشىقازاق اۋدانىنان شىققان بالۋان نۇرعالي جولتاەۆ ەكىنشى ورىندى يەمدەنىپ, 1 ملن تەڭگەنىڭ سەرتيفيكاتىن السا, بالقاش اۋدانىنان قاتىسقان ءالىمجان جۇماحمەتوۆ ءۇشىنشى ورىنعا تابان تىرەپ, 500 مىڭ تەڭگەنى قانجىعاسىنا بايلادى.
الماتى وبلىسى
