سۋرەتتەردى تۇسىرگەن اۆتور
بەلگىلى قىلقالام شەبەرى قۇداش نۇرسادىقوۆ باستاعان سۋرەتشىلەر توبى بىلتىر وسكەمەننىڭ ىرگەسىندەگى بورتەككە شىقسا, بيىل سول جاعالاۋ ساياباعىنا بارىپ جايعاستى. ات شاپتىرىم اۋماقتى الىپ جاتقان ابات باقتىڭ ءىشى سۋرەتشىلەر ءۇشىن تاپتىرماس جەر. ەرتىستىڭ جاعاسى, ورمان-توعايدىڭ ساياسى. قۇستارى سايراعان باۋ-باعى جايناعان.
ونەر مۋزەيىمەن بىرلەسە ۇيىمداستىرىلعان بۇل جولعى پلەنەرگە قۇداش نۇرسادىقوۆتىڭ شاكىرتتەرى دە قاتىستى. ولار اكۆارەلمەن, مايلى بوياۋمەن ەتيۋد جازىپ, ءوز باپتارىن سىنادى. ال كاسىبي سۋرەتشىلەر ءبىر كۇنگە سوزىلعان شارادا ەكى ەتيۋدتەن جازىپ ۇلگەردى.
– تابيعات اياسىندا سۋرەت سالۋدىڭ ءجونى بولەك. ناعىز شىعارماشىلىق جۇمىس وسى. فوتوسۋرەتتەن كوشىرىپ ەمەس, تابيعاتتا تابان استىندا جازىلعان كارتينا قۇندى. ونىڭ تەڭگەگە شاققانداعى قۇنى ەمەس, شىعارماشىلىق باعاسىن ايتىپ تۇرمىن, – دەيدى قىلقالام شەبەرى ەرجان تۇرعانباەۆ.
ەرتىستىڭ جاعاسىنا تاياۋ تۇرىپ, كەنەپ بەتىنە توپتاسا وسكەن تەرەكتەردى بەينەلەگەن گۇلنار ميعراجقىزىنىڭ دا ەتيۋدى ەرەكشە كوز تارتتى. ەندى-ەندى بۇرشىك اتىپ كەلە جاتقان تەرەكتەردىڭ كەسكىنى ايناداي كولشىككە تۇسەدى. كول بەتىن سىزعىلاي قوس ۇيرەك ءجۇزىپ بارادى. مايلى بوياۋمەن جازعان ەتيۋدى مەن تابيعاتتىڭ ۇيلەسىمىنە سۋرەتشى ءسال شەگىنشەكتەي بارىپ, كوزىن سىعىرايتا قارادى. كەيبىر تۇسىن ساۋساق ۇشىمەن تۇزەتكەن بولدى. گالەرەياعا قويا سالاتىنداي دايىن كارتينا.
سول سياقتى جاس سۋرەتشى ءمادي قايىرحان دا جۇمىسىن ءساتتى اياقتادى. سۋرەتشىلەردىڭ بيىلعى جوسپارى, پلەنەرگە جۇيەلى تۇردە شىعىپ, شىعىستىڭ كورىكتى جەرلەرىن كەنەپ بەتىنە ءتۇسىرۋ.
شىعىس قازاقستان وبلىسى
