سالتاناتتى شاراعا ەۋرازيا ۇلتتىق ۋنيۆەرسيتەتى مەن وش مەملەكەتتىك ۋنيۆەرسيتەتىنىڭ رەكتورلارى ەرلان سىدىقوۆ پەن قۇدايبەردي قوجوبەكوۆ, ەلىمىزدەگى قىرعىز رەسپۋبليكاسىنىڭ توتەنشە جانە وكىلەتتى ەلشىسى داستان ديۋشەكەەۆ جانە ەكى ەلدىڭ عالىمدارى مەن وقىتۋشىلارى, ستۋدەنتتەرى قاتىستى.
– بۇل – ءبىزدىڭ نەگىزگى سەرىكتەسىمىز وش مەملەكەتتىك ۋنيۆەرسيتەتىمەن عىلىمي-اكادەميالىق ىنتىماقتاستىق اياسىنداعى بايلانىستى كەڭەيتۋدەگى ماڭىزدى قادام. 2019 جىلدان باستاپ ءبىزدىڭ وقۋ ورنىندا قىرعىزستاننىڭ جوعارى وقۋ ورىندارىنان 200-دەن اسا ورەن ءارتۇرلى ءبىلىم بەرۋ باعدارلامالارى بويىنشا وقىدى. ورتالىقتىڭ اشىلۋى باۋىرلاس ەكى ەل اراسىنداعى ىنتىماقتاستىقتى ودان ءارى نىعايتۋعا ەرەكشە ۇلەس قوساتىنىنا سەنىمدىمىز, – دەدى ەرلان سىدىقوۆ.
بىلتىر قىرعىز ەلىندە ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ فيليالى اشىلدى. بۇگىنگى تاڭدا وندا 30-عا جۋىق قىرعىز ستۋدەنتى ءبىلىم الادى. ولار قازاق ءتىلى, اۋدارما ءىسى مەن ادەبيەت ماماندىعى بويىنشا وقيدى.
– ءبىزدىڭ ۋنيۆەرسيتەتتەر اراسىنداعى ىنتىماقتاستىق قىرعىزستان مەن قازاقستان اراسىنداعى ديپلوماتيالىق قاتىناستاردىڭ دامۋىنا اسەر ەتەدى. ويتكەنى ءبىلىم – مەملەكەتتەر اراسىنداعى كوپىر. ءبىز ءۇشىن ەۋرازيا ۇلتتىق ۋنيۆەرسيتەتى – قازاقستانداعى ۇزدىك ۋنيۆەرسيتەت. بۇگىنگى ماڭىزدى ءىس-شارا ەكى جوعارى وقۋ ورنى اراسىنداعى دوستىققا سەرپىن بەرەدى دەپ سەنەمىن, – دەپ اتاپ ءوتتى وش مەملەكەتتىك ۋنيۆەرسيتەتىنىڭ رەكتورى قۇدايبەردي قوجوبەكوۆ.
سونىمەن قاتار ەلىمىزدەگى قىرعىز رەسپۋبليكاسىنىڭ توتەنشە جانە وكىلەتتى ەلشىسى داستان ديۋشەكەەۆ ەكى مەملەكەت اراسىندا ءبىلىم بەرۋ سالاسىندا كەلىسىم بار ەكەنىن جەتكىزدى. «ورتالىقتىڭ اشىلۋى ءبىزدىڭ ازاماتتارىمىز, وسىندا وقيتىن ستۋدەنتتەر ءۇشىن ساپالى ءبىلىم الۋعا جول اشادى», دەپ اتاپ ءوتتى ديپلومات.
