ەلىمىزدىڭ دەنساۋلىق ساقتاۋ سالاسىندا جۇرەك دەرتىن ەمدەۋدە ىلگەرىلەۋشىلىك بار

استانا. 8 شىلدە. قازىرگى تاڭدا ەلىمىز بويىنشا جۇرەك اۋرۋىنا شالدىققان جانداردىڭ جىلىنا 20 مىڭعا جۋىعىنا وتا جاساۋعا مۇمكىندىك بار. ال وسىدان 7-8 جىل بۇرىن مۇنداي وپەراتسيالار ءبىر جىلدا 6-7 مىڭ ادامعا عانا جاسالاتىن. بۇل تۋرالى «حابار» تەلەارناسى حابارلادى. ەلىمىزدىڭ دارىگەرلەرى كورونارلىق تامىرلاردى ستەنتتەۋ وپەراتسياسىن ءساتتى جۇزەگە اسىرىپ كەلەدى. بۇل وپەراتسيالار جۇرەك اۋرۋلارىنان بولاتىن كىسى ءولىمىن ازايتۋعا سەپتىگىن تيگىزۋدە. بۇگىندە ازاماتتارعا كارديولوگيالىق قىزمەت كورسەتۋدىڭ جاڭا ادىستەرىن قولدانىسقا ەنگىزۋ ءىسى تىڭعىلىقتى جۇرگىزىلۋدە. بۇل باعىتتا شەتەلدىك مامانداردىڭ تاجىريبەسىن يگەرۋدىڭ ماڭىزى زور. پرەزيدەنتتىڭ ءىس باسقارماسى مەديتسينالىق  ورتالىعى ينتەرۆەنتسيالىق كارديولوگيا ءبولىمىنىڭ مەڭگەرۋشىسى دانيار ماحانوۆ: «گەرمانيادان ارنايى شاقىرىلعان كارديولوگيا سالاسىنىڭ مامانى, پروفەسسور ۆەرنەر حابەربوش كورونارلىق تامىرلاردى ستەنتتەۋ وپەراتسياسىن جاڭا ادىسپەن جاساۋعا بولاتىنىن  كورسەتتى. اتالعان ءادىستىڭ ارقاسىندا جىڭىشكە تامىرلاردا قان ۇيىپ قالاتىن جاعداي بولمايدى. ماماندارىمىز بۇل وپەراتسيانى مەڭگەرگەن سوڭ ناۋقاستار الىس شەتەلدەرگە شابىلماي-اق, ءوز ەلىمىزدە تەگىن ەمدەلە الادى, – دەدى. جولدىباي بازار. دەرەككوز: «حابار» تەلەارناسى. فوتو: today.kz.