استانا. 6 شىلدە. بۇگىن تاڭ الدىندا اياقتالعان گوللانديا جانە كوستا-ريكا قۇرامالارى اراسىنداعى ماتچپەن شيرەك فينالدىق ويىندار ءوز مارەسىنە جەتتى. وسى كەزدەسۋدە پەنالتيدەن جەڭىسكە جەتكەن ەۋروپالىقتار جارتىلاي فينالعا شىققان تورتتىكتى تولىقتىردى. بۇل تۋرالى egemen.kz حابارلادى.
ايتارى جوق, بۇل ماتچتىڭ قورىتىندىسىندا جولدان شىعىپ قالعاندارىمەن, كوستا-ريكا فۋتبولشىلارى ەرلەدى. ولار تۋرنيردەگى ويىنداردىڭ نەگىزگى جانە قوسىمشا ۋاقىتتارىندا ءبىر رەت تە جەڭىلمەستەن چەمپيوناتتى ءبىتىردى.
گوللانديا – كوستا-ريكا 0:0. پەنالتي -4:3.
6 شىلدە. سالۆادور. «فونتە-نوۆا» ستاديونى. 51 179 كورەرمەن. تورەشى – راۆشان يرماتوۆ (وزبەكستان).
گوللانديا: ياسپەر سيللەسسەن (تيم كرۋل, 120+1), مەمفيس دەپاي (دجەرمەين لەنس, 76), ستەفان دە ۆرەي, رون ۆلاار, برۋنو مارتينس يندي (كلاس-يان حيۋنتەلار, 106), ديرك كيويت, دجوردجينو ۆەينالدۋم, دەيلي بليند, ۋەسلي سنەيدەر, ارەن روببەن, روبين ۆان پەرسي.
كوستا-ريكا: كەيلور ناۆاس, كريستيان گامبوا (دەيۆ ميري, 79), دجونني اكوستا, مايكل ۋمانيا, دجانكارلو گونسالەس, جۋنيور دياس, برايان رۋيس, سەلسو بورگەس, ەلتسين تەحەدا (حوسە كۋبەرو, 97), كريستيان بولانوس, جوەل كەمپبەلل (ماركوس ۋرەنيا, 66).
پەنالتي سوققاندار: روبين
ۆان پەرسي,
ارەن
روببەن,
ۋەسلي سنەيدەر, ديرك كيويت
– سەلسو بورگەس, دجانكارلو گونسالەس, كريستيان بولانوس.
پەنالتي سوقپاعاندار: برايان رۋيس (قاقپاشى),
مايكل ۋمانيا (قاقپاشى).
ەسكەرتۋلەر: برۋنو مارتينس يندي (64), كلاس-يان حيۋنتەلار (111) - جۋنيور دياس (37), مايكل ۋمانيا (52), دجانكارلو گونسالەس (81), دجونني اكوستا (107).
شيرەك فينالدىڭ اقىرعى ويىنى مۇنىڭ الدىنداعى ماتچتارعا اسا كوپ ۇقساي قويمادى. ولاردا كىمدە-كىم تەز گول سوقسا, سول جەڭىسكە جەتسە, مۇندا ءتىپتى كەشتەۋ بولسا دا گول سوعىلعان جوق. جالپى, سالۆادور مۋنديالدىڭ نەگىزگى دە, قوسىمشا دا ۋاقىتىندا ءبىرىنشى رەت قاقپاعا تۇسكەن دوپتى كورە المادى.
الايدا, وسىعان قاراماستان, كەزدەسۋ ءوزىنىڭ سوڭىنا دەيىن جۇرتتى ۋىسىندا ۇستادى. بۇعان ويىننىڭ بىتكەنىن بىلدىرەتىن ىسقىرىق ەستىلگەنشە, قارسىلاستاردىڭ قايتپاي شايقاسقاندارى سەبەپ بولدى. مۇنداعى شيلەنىستى ساتتەر دە بارىنەن اسىپ ءتۇستى. راس, العاشقى جيىرما مينۋتتا ويىننىڭ وسىلاي ءوربيتىنىن بىلدىرە قويعان جوق. بۇل ارالىقتا ەكى جاق تا ءبىر-بىرلەرىنىڭ قاقپالارىنا تۋرا سوققى جاساي المادى. بىراق وسىدان كەيىن گوللانديا اينالىمدى ارتتىرىپ, جىلدامدىقتى ۇدەتە ءتۇستى. وسى تۇستا قاقپاشى كەيلور ناۆاس تاعى دا ءوزىن بارىنشا جاقسى قىرىنان كورسەتتى. ويىن سوڭىندا ۇزدىك ويىنشى اتاناتىن ول الدىمەن روبين ۆان پەرسيدىڭ سوققىسىن قايتاردى, سوسىن ۋەسلي سنەيدەرگە ءوزىن الداپ تۇسىرۋگە جول بەرمەدى.
ەكىنشى تايمنىڭ باسىندا كوستاريكالىقتار قارقىنعا قارقىن قوستى. دەگەنمەن, نەگىزگى ۋاقىتتا ولار بىردە-ءبىر رەت قاقپا شەڭبەرىنە تۋرالاپ دوپ ۇرا قويمادى. ال ماتچتىڭ اياعىنا قاراي تاعى دا ولاردىڭ قاقپاسى الدىندا قاربالاس كوبەيىپ, ناۆاسقا شەبەرلىك كورسەتۋگە تۋرا كەلدى. تاعى دا سنەيدەردىڭ گول سوعاتىن مۇمكىندىگى تۋدى. بىراق ۋەسليدىڭ سوققىسى باعاننان قايتتى. ال ارەن روببەننىڭ دوبى جولىن ەلتسين تەحەدا كەستى. وسىنىڭ ارقاسىندا ويىن قوسىمشا تايمعا اۋىستى. الايدا, قارسىلاستار وۆەرتايمدا دا كىمنىڭ مىقتى ەكەنىن انىقتاي المادى.
كەزدەسۋدىڭ تاعدىرى پەنالتي ارقىلى شەشىلگەلى كەلە جاتقانىن اڭعارعان لۋي ۆان گال دەرەۋ قاقپاشىلاردى الماستىرا قويدى. ول الاڭداعى ياسپەر سيللەسسەننىڭ ورنىنا تيم كرۋلدى شىعاردى. ناتيجەسىندە تاپ وسى كرۋل كوستاريكالىق ەكى ويىنشىنىڭ سوققىلارىن قايتارىپ, ءوز كومانداسىنا جەڭىس اپەردى.
دامير قوجامقۇل.
دەرەككوز: egemen.kz.
فوتو: Sportbox.ru.
