مەيىرلان مەن دۋماننىڭ تسەحى اۋلادا ورنالاسقان. كۇنىنە 500 كەسەك كىر سابىن شىعارادى. وسىدان ەكى اي بۇرىن باستاۋ العان جۇمىس قازىر قارقىن الىپ كەلەدى. يدەياعا تۇرتكى بولعان ينتەرنەتتەگى ۇلان قۇرمانعاليەۆتىڭ ارناسى ەكەن.
– ينتەرنەتتەن ءبىرشاما مالىمەت, اقپارات جيناي كەلە, «وسى ءوزىمىز نەگە كىر سابىن جاساپ كورمەسكە؟» دەگەن وي كەلدى. سودان الماتىعا بارىپ, ارنايى ءدارىس تىڭدادىق. قاجەتتى قۇرال-جابدىعىن دا ساتىپ الدىق. سابىننىڭ نەگىزگى قۇرامى – ماي. قوسپالارىندا ايتارلىقتاي حيميكات جوق. بۇل – تازا تابيعي ءونىم. جوبامىز ەكى اي جۇمىس ىستەپ كەلەدى. سودان بەرى سابىن شىعارۋدى تولىق مەڭگەردىك, – دەيدى مەيىرلان.
جوعارىدا ايتىپ وتكەنىمىزدەي, سۇرانىس جوعارى. قازىر قارقارالى اۋدانى اۋماعىندا ساۋداعا شىققان. كۇنىنە 500-1000 دانا سابىن ساتىلادى. ءونىم تاپسىرىس كولەمىنە قاراي شىعارىلادى.
مەملەكەتتەن ازىرگە ەشبىر قولداۋ الماعان كاسىپكەرلەر الداعى ۋاقىتتا وبلىس اكىمى گرانتىنا ءوتىنىش بەرۋگە مۇددەلى. ەگەر گرانت السا, سابىننىڭ سىرتقى وراۋىن جولعا قويماقشى. كەلەشەكتە جۇمىستى جانداندىرا ءتۇسىپ, اۋىل تۇرعىندارىن جۇمىسقا تارتۋدى دا كوزدەپ وتىر.
«الداعى ۋاقىتتا ءىرى ساۋدا ورتالىقتارىنا سابىنىمىزدىڭ ساتىلۋىنا رۇقساتقا قول جەتكىزسەك, بۇل دا ءبىر جەتىستىك بولار ەدى. ەندى سول ماقساتقا جەتۋ ءۇشىن ارەكەت ەتەمىز», دەيدى مەيىرلان.
سابىن «جاڭاتوعان» ماركاسىمەن شىعادى. بۇل – اۋىلدىڭ اتاۋى. سالماعى ءۇش ءتۇرلى: 150, 200 جانە 250 گرامم كولەمىندە. ساپا سەرتيفيكاتىن العان سوڭ كاسىپكەرلەر جوباعا قۋات بەرمەكشى. تاعى ءبىر اتاپ ايتارلىعى, بۇل كىر سابىننىڭ باعاسى ورتاشا نارىقتىق قۇننان ءبىرشاما, ياعني ون پايىزعا ارزان.
بۇعان دەيىن كاسىپكەرلەر اۋدان اكىمى گرانتىن ۇتقان. ءسويتىپ قىمىز ءوندىرىسىن ىسكە قوسىپتى. ونىمەن توقتاپ قالماس ءۇشىن سابىن شىعارۋدى قولعا العان جوندەرى بار. سابىننىڭ نەگىزى مالدىڭ ءىش مايى بولعاندىقتان, تۇرعىندار كاسىپكەرلەرگە ءىش مايدى اكەپ وتكىزە باستاپتى.
قارقارالى اۋدانىنىڭ تۇرعىنى ايجان قىپشاقباەۆا «جاڭاتوعان» سابىنىن تۇتىنىپ كورگەن كوپتىڭ ءبىرى. ايتۋىنشا, وزگە سابىندار سەكىلدى ەمەس. ولاردان ساپالىراق. جاعىمسىز يىستەن ادا. كىر جۋعاندا ونى اشۋى دا جاقسىراق.
«Cابىننىڭ ءتۇسى دە, ءيىسى دە جاقسى. مۇلدەم ءيىس جوق دەسە دە, ارتىق ەمەس. كەي سابىنداردا ءبىر بوگدە ءيىس شىعىپ تۇرادى عوي ادەتتە. مىنا «جاڭاتوعان» سابىنىندا ونداي ءيىس مۇلدەم سەزىلمەيدى. قايبىر سابىندار سەكىلدى ەزىلىپ تە كەتپەيدى. ۇزاق ۋاقىتقا جەتەدى», دەيدى اۋىل تۇرعىنى.
كاسىپكەرلەر كەلەشەكتە سابىندى ءالى دە جەتىلدىرۋدى كوزدەيدى.
قاراعاندى وبلىسى,
قارقارالى اۋدانى,
جاڭاتوعان اۋىلى
