اقجولدىقتار پارتيانىڭ ساياسي باعدارلاماسىن تانىستىرىپ, سىبايلاس جەمقورلىققا قارسى كۇرەس, پارلامەنتتىك رەسپۋبليكاعا كوشۋ ماسەلەلەرىنە توقتالدى. سونداي-اق, يپوتەكالىق نەسيەنىڭ جوعارى پايىزدىق مولشەرلەمەلەرى, جۇمىسسىزدىق, سالالىق قوسىمشا قۇن سالىعى مولشەرلەمەلەرى, وففشورلارداعى قارجىنى قايتارۋ, ينفلياتسيامەن كۇرەس جانە تۇرعىن ءۇي باعاسىنىڭ قىمباتتاۋىنا قاتىستى ماسەلەلەر كوتەرىلدى.
پارتيانىڭ سايلاۋالدى باعدارلاماسىن تانىستىرعان سوڭ كانديداتتار پارلامەنتتە اتقارىلعان جۇمىستار جايلى ايتتى. جۇمىسشىلار كوكەيدەگى سۇراقتارىن قويدى. كوپشىلىكتى الەۋمەتتىك ادىلەتتىلىك, «جەكە تۇلعالاردىڭ بانكروتتىعى تۋرالى» زاڭ مەن ءادىل سايلاۋ ماسەلەلەرى قىزىقتىردى.
جۇمىسشىلاردىڭ ءبىرى تاۋەلسىز باقىلاۋشىلار سانىنىڭ جەتكىلىكسىزدىگىن ايتىپ, حالىقتىڭ سايلاۋدىڭ ءادىل وتەتىنىنە سەنۋدەن قالعانىن, تاجىريبە كورسەتكەندەي, سايلاۋ ۋچاسكەلەرىنە كەلمەگەن ادامداردىڭ ورنىنا بيۋللەتەندەر تولتىرىلاتىنىنا نازار اۋداردى.
«سايلاۋ ۇدەرىسىنىڭ اشىقتىعى مەن جاريالىعىن قامتاماسىز ەتۋ ماقساتىندا ءبىز داۋىس بەرۋ كۇنى سايلاۋ ۋچاسكەلەرىندەگى بارلىق راسىمدەرگە بەينەباقىلاۋ ەنگىزۋدى ۇسىنامىز. سونداي-اق, ەلەكتروندى داۋىس بەرۋدى ەنگىزۋدى قاراستىرۋ قاجەت. قازىر بارلىعىن تەلەفون ارقىلى جاسايمىز. كوپتەگەن سايلاۋشىلار داۋىس بەرۋ كۇنى كەزەكتە تۇرعىسى كەلمەي, داۋىس بەرۋ قۇقىعىن پايدالانبايدى. بۇل تارماقتاردى ەنگىزبەيىنشە, داۋىس بەرگەندەردىڭ ناقتى سانىن بىلە المايمىز», دەدى بەرىك دۇيسەمبينوۆ.
جيىن بارىسىندا ۇجىم قىزمەتكەرلەرى بىرقاتار تۇيتكىلدى ماسەلەگە توقتالدى. مىسالى, نەسيە ءوسىمى, باعا تۇراقسىزدىعى, باسپانانىڭ قولجەتىمسىزدىگى تۋرالى ويلارىن ايتتى. كانديداتتار كاسىپورىن مەن ەڭبەك ۇجىمىن قولدايتىنىن ايتىپ, پارلامەنتتە «اق جول» فراكتسياسى قۇرىلعاننان كەيىن بۇل ماسەلەلەردى ۇكىمەت الدىندا كوتەرۋگە دايىن ەكەنىن مالىمدەدى.
