پارتيا وكىلدەرى شىعىس قازاقستان وبلىسىنا ساپارىن قالانىڭ بيزنەس قاۋىمداستىعىمەن كەزدەسۋدەن باستادى. پارتيانىڭ تەڭ توراعاسى ماكسيم بارىشەۆ پارتيانى قۇرۋدىڭ العىشارتتارىنىڭ ءبىرى ەلدىڭ سالىق زاڭناماسىنداعى كەدەرگىلەر ەكەنىن ايتتى. قاڭتار وقيعاسى كەزىندە قاراقشىلىق شابۋىلدان زارداپ شەككەن كاسىپكەرلەر مەملەكەت تاراپىنان قولداۋعا يە بولعانىن اتاپ ءوتتى. بەلگىلى بولعانداي, بۇل قولداۋعا دا سالىق سالىنعان, ونى وزگەرتۋ مۇمكىن ەمەس.
«وتكەن جىلى قاڭتاردا تالان-تاراجعا تۇسكەن كاسىپكەرلەرگە مەملەكەتتەن قولداۋ سۇراعان بولاتىنبىز, قولداۋ كورسەتىلدى. بىراق كاسىپكەرلەر تابيعي اپاتتان زارداپ شەكسە, ءتيىستى قولداۋعا سالىق سالىنبايدى. ال تالان-تاراجعا تۇسكەن جاعدايدا سالىق سالۋ زاڭنامادا قاراستىرىلعان. ءبىز مۇنداي جاعدايلاردا سالىق سالۋدى جويۋ ءۇشىن زاڭناماعا وزگەرىستەر ەنگىزۋدى ۇسىندىق, ويتكەنى بيزنەستى قالپىنا كەلتىرۋ ماسەلەسى قيىن. بىراق ماجىلىستەگى دەپۋتاتتار بۇل نورمانى جوققا شىعاردى, بيۋدجەتتىك شىعىن ەكەنىن ايتتى», دەدى م.بارىشەۆ.
بۇل رەتتە پارتيانىڭ قۇرىلتايشىلارى شەنەۋنىكتەر بارلىق كاسىپكەرلەردى سالىق تولەۋشى رەتىندە قابىلدايتىنىن ايتادى.
«ولاردى ءبىزدىڭ ەكونوميكاعا, ونەركاسىپكە نەمەسە ءبىز اشاتىن جۇمىس ورىندارىنا قوسقان ۇلەسىمىز سونشالىقتى قىزىقتىرمايدى. ولار تەك ءبىر نارسەنى ويلايدى – ءبىز سالىق تولەيمىز. مەملەكەتتىك قىزمەتتە ءبىزدى كاسىپكەر دەمەيدى, سالىق تولەۋشى دەپ اتايدى. سەبەبى 30 جىلدا وزىنەن-ءوزى وسىلاي قالىپتاسىپ كەتكەن. سوندىقتان بيزنەسكە دەگەن وسى كوزقاراستى وزگەرتۋ, سونداي-اق كاسىپكەرلەرگە قاتىستى ءادىل ءارى دۇرىس قارىم-قاتىناس بولۋى ءۇشىن قولدانىستاعى زاڭناماعا وزگەرىستەر مەن تولىقتىرۋلار ەنگىزۋگە باستاماشىلىق ەتۋ – پارتيانىڭ العا قويعان ماقساتتارىنىڭ ءبىرى», دەدى م.بارىشەۆ.
«Respublica» پارتياسىنان پارلامەنت ءماجىلىسىنىڭ دەپۋتاتتىعىنا كانديدات زەينوللا ابدۋماناپوۆ پارتيانىڭ كاسىپكەرلىك ماسەلەلەرىن جاقسى بىلەتىنىن اتاپ ءوتتى.
