ء«بىز الداعى سايلاۋدا جەڭىسكە جەتۋگە ۇمتىلىپ جاتىرمىز. سايلاۋشىلاردىڭ سەنىمىن اقتاۋىمىز كەرەك. ول ءۇشىن ازاماتتاردىڭ ۇسىنىس-پىكىرىن جيناپ, «ەسىكتەن ەسىككە» اكتسياسىن ۇيىمداستىرامىز. جۇمىسشىلار, مۇعالىمدەر, كاسىپكەرلەر, دارىگەرلەر, شارۋالار سىندى ناقتى الەۋمەتتىك توپتارمەن جانە وزگە دە ازاماتتارمەن كەزدەسۋ وتكىزەمىز. ءبىزدىڭ ماقساتىمىز – ادىلەتتى قازاقستاندى قۇرۋ», دەدى پارتيانىڭ اتقارۋشى حاتشىسى ەلنۇر بەيسەنباەۆ.
بۇدان كەيىن ەلنۇر بەيسەنباەۆ ازاماتتىق قوعام وكىلدەرىمەن جانە جاستارمەن كەزدەستى.
ء«بىزدىڭ پارتيا مەملەكەت پەن قوعام اراسىنداعى ادال ءارى اشىق ديالوگتى قولدايدى. ۇكىمەتتىك ەمەس ۇيىمدارعا, كوممەرتسيالىق ەمەس قورلارعا قولداۋ كورسەتە وتىرىپ, ءبىز ازاماتتاردى ساياسي بەلسەندىلىككە, ەل باسقارۋ ىسىنە ارالاسۋعا ىقپال ەتەمىز», دەدى ول.
ال پارتيا اتىنان پارلامەنت ءماجىلىسىنىڭ دەپۋتاتتىعىنا كانديدات جاناربەك ءاشىمجانوۆ قوناەۆ قالاسىنىڭ ىرگەسىندەگى سۋ ەلەكتر ستانساسىنا باردى. كانديدات قاپشاعاي سۋ ەلەكتر ستانساسىنىڭ ۇجىمىمەن كەزدەسىپ, پارتيانىڭ سايلاۋالدى باعدارلاماسىن ءتۇسىندىردى. سونداي-اق پارتيانىڭ الداعى جوسپارىن جەتكىزىپ, قىزمەتكەرلەردىڭ ءوتىنىش-تىلەگىنە قۇلاق ءتۇردى.
«پارتيا ءاردايىم حالىق مۇددەسى جولىندا قىزمەت ەتىپ كەلەدى. وتانداستارىمىزدىڭ اماناتىن ارقالاعان پارتيا بۇقارانىڭ تۇرمىس ساپاسىن ارتتىرىپ, الەۋمەتتىك جاعدايىن جاقسارتۋدى كوزدەيدى. ءبىز وڭىردەگى جىلۋ جانە سۋمەن جابدىقتاۋ جەلىلەرىنىڭ توزۋ دەڭگەيىن 42,8 پايىزعا دەيىن تومەندەتۋگە كۇش سالامىز», دەدى جاناربەك ءاشىمجانوۆ.
سونداي-اق كانديدات وڭىردە جۇمىسسىزدىق, قىمباتشىلىق, ەكولوگيا ماسەلەسىندە بىرقاتار پروبلەما بارىن ايتىپ, ونى شەشۋ جولدارىن تالقىلادى. ءوز كەزەگىندە, كاسىپورىن ۇجىمى كانديداتتىڭ باستامالارىنا ساتتىلىك تىلەدى.
