جۋىردا پارتيادان ماجىلىسكە كانديدات ساپار ابدراحمەتوۆ وبلىستىق, قالالىق ءماسليحات دەپۋتاتتىعىنا كانديداتتارمەن بىرگە «جامبىل-سۋ» مكك ۇجىمىمەن ۇگىت-ناسيحات كەزدەسۋىن وتكىزدى. ۇمىتكەرلەر پارتيانىڭ ماقسات-مىندەتتەرىنە توقتالىپ, جامبىل وبلىسىنداعى ەكولوگيا ماسەلەسىنىڭ ماڭىزدىلىعى جايىندا ايتتى. قالا تۇرعىندارىنىڭ تۇرمىس جاعدايىن جاقسارتۋ ماسەلەسى تالقىلاندى.
سوڭعى بىرنەشە جىلدا ەلىمىز ەكولوگيالىق ماسەلەلەرمەن, سونىڭ ىشىندە اۋانىڭ لاستانۋى, وندىرىستىك جانە تۇرمىستىق قالدىقتار, سۋ تاپشىلىعى, راديواكتيۆتى لاستانۋ جانە باسقا دا وزەكتى ماسەلەلەرمەن بەتپە-بەت كەلدى. اتاپ ايتقاندا, جامبىل وبلىسىنىڭ ورتالىعى – تاراز قالاسىنداعى كارىز جۇيەلەرىنىڭ سۋى مەن شايىندى سۋلارىن ءسۇزۋ الاڭدارىنىڭ تازارتۋ قوندىرعىلارى كوپ ۋاقىتتان بەرى جاڭارتىلماعاندىقتان, ەكولوگيالىق اپات قاۋپىن ءتوندىرىپ وتىر. شايىندى سۋ, قالا ىرگەسىندەگى جامبىل اۋدانىنىڭ اۋماعىنا, اتاپ ايتقاندا, جامبىل, قوستوبە ەلدى مەكەندەرىنە جايىلا باستادى. سونىڭ سالدارىنان جەراستى سۋلارى, اۋىز سۋ دا لاستانىپ وتىر. تاراز قالاسىنىڭ كارىز جۇيەلەرىنەن شىققان لاس سۋ مەن ءوندىرىس, ونەركاسىپ قاجەتىنە پايدالانىلعان شايىندى سۋ كەز كەلگەن ۋاقىتتا توتەنشە جاعدايعا ۇشىراتۋى عاجاپ ەمەس.
ال «بايتاق» جاسىلدار پارتياسىنىڭ بەلسەندىلەرى شىمكەنتتە تىگىن فابريكاسىنا اتباسىن بۇردى. قالاداعى سايلاۋالدى شتاب وكىلدەرى ەڭبەك ۇجىمىمەن كەزدەسىپ, ساياسي قۇرىلىم تۇعىرناماسىنىڭ نەگىزگى باعىتتارىن تانىستىردى. ەلدە جۇرگىزىلىپ جاتقان ساياسي جانە ەكونوميكالىق رەفورمالار توڭىرەگىندە وي ءوربىتىپ, الداعى ناۋقاننىڭ ماڭىزدىلىعى تۋرالى پىكىر الماستى.
سونىمەن قاتار بايتاقتىقتار قورشاعان ورتا مەن ەكولوگيالىق ماسەلەلەرگە قاتىستى جۇمىسشىلاردىڭ پىكىر-ۇسىنىستارىن تىڭداپ, ساۋالدارىنا جاۋاپ بەردى. پارتيا وكىلدەرى كاسىپورىن جۇمىسىمەن دە تانىستى. تىگىن فابريكاسى 2013 جىلى اشىلعان. قازىر مۇندا 70 ادام ەڭبەك ەتەدى. فابريكا تاپسىرىس ارقىلى ارنايى كيىمدەر تىگەدى. ايتا كەتەيىك, پارتيانىڭ رەسپۋبليكالىق جانە وڭىرلىك شتابتارى كەستەگە ساي جۇمىس ىستەپ جاتىر.
