ساپار بارىسىندا كوميسسيا مۇشەلەرى پارلامەنت ءماجىلىسى مەن ءماسليحاتتارى دەپۋتاتتارىنىڭ كەزەكتەن تىس سايلاۋىن ازىرلەۋ مەن وتكىزۋ ماسەلەلەرى بويىنشا جەرگىلىكتى جەرلەردە كوشپەلى سەمينار-كەڭەستەر وتكىزدى. ءىس-شاراعا جەرگىلىكتى اتقارۋشى ورگانداردىڭ وكىلدەرى, وبلىستىق پروكۋراتۋرالاردىڭ قىزمەتكەرلەرى, اۋماقتىق سايلاۋ كوميسسيالارىنىڭ مۇشەلەرى, كانديداتتاردىڭ سايلاۋالدى شتابتارىنىڭ وكىلدەرى, حالىقارالىق بايقاۋشىلار مەن باق وكىلدەرى قاتىستى. ينسپەكتسيالىق ساپاردىڭ نەگىزگى ماقساتى سايلاۋ زاڭناماسىنىڭ جاڭالىقتارىن ءتۇسىندىرۋ, سايلاۋ كوميسسيالارىنىڭ مۇشەلەرىنە ادىستەمەلىك كومەك كورسەتۋ, سونداي-اق الداعى سايلاۋعا دايىندىق بويىنشا اتقارىلعان جۇمىستار تۋرالى وڭىرلەردىڭ ەسەپتەرىن تىڭداۋ ەكەنى بەلگىلى.
قاراعاندىدا وتكەن جيىندا وبلىس اكىمى اپپاراتىنىڭ باسشىسى ەرلان عاليەۆ وڭىردە سايلاۋدى ۇيىمداستىرۋ بويىنشا جۇرگىزىلىپ جاتقان جۇمىستار تۋرالى حاباردار ەتتى. ول وبلىستاعى سايلاۋشىلار سانى 761 471 ادامدى قۇرايتىنىن اتاپ ءوتىپ, 654 سايلاۋ ۋچاسكەسىنىڭ جۇمىسى ۇيىمداستىرىلعانىنا توقتالدى.
«سايلاۋ ۋچاسكەلەرىن اشۋ بارىسىندا مۇگەدەكتىگى بار ادامداردىڭ دا قاجەتتىلىكتەرى ەسكەرىلىپ, ارنايى جابدىقتالعان بۇرىشتار اشىلدى. وندا سايلاۋ بيۋللەتەنىن تولتىرۋ ءتارتىبىنىڭ اۋديو نۇسقالارى, سايلاۋ بويىنشا اقپاراتتى تىڭداۋ, قوسىمشا جارىقتاندىرۋ جانە وپتيكالىق تۇزەتۋ قۇرالدارى قويىلادى. سونداي-اق كرەسلو-اربالاردى پايدالاناتىن سايلاۋشىلار ءۇشىن جاسىرىن داۋىس بەرۋگە جانە ءجۇرىپ-تۇرۋعا ارنالعان كابينالاردىڭ ىڭعايلىلىعى, سونداي-اق اقپاراتتىق ماتەريالدارمەن تانىسۋدىڭ قولجەتىمدىلىگى قامتاماسىز ەتىلەدى. سويلەۋ نەمەسە ەستۋ قابىلەتى بۇزىلعان ادامدار ءۇشىن دىبىس كۇشەيتكىشتەرى مەن قۇلاققاپتار ورناتىلادى», دەدى ە.عاليەۆ .
سەمينار-كەڭەس بارىسىندا وبلىسى پروكۋرورىنىڭ ءبىرىنشى ورىنباسارى ۆيتالي شابەر سايلاۋ ناۋقانىنىڭ بارلىق كەزەڭدەرىندە زاڭدىلىقتىڭ ساقتالۋىن جوعارى قاداعالاۋدى قامتاماسىز ەتۋ جونىندەگى جۇمىس تۋرالى باياندادى.
ال ۇلىتاۋ وبلىسىندا اتقارىلىپ جاتقان جۇمىستار تۋرالى اكىم اپپاراتىنىڭ باسشىسى ابزال جايلىباەۆ ەسەپ بەردى. اپپارات باسشىسىنىڭ ايتۋىنشا, بۇگىنگى تاڭدا ايماقتا 70 وكرۋگتىك سايلاۋ كوميسسياسى جۇمىس ىستەيدى. وبلىس بويىنشا بارلىعى 134 سايلاۋ ۋچاسكەسى, ونىڭ ىشىندە 123-ءى ەرەكشە قاجەتتىلىكتەرى بار ادامدار ءۇشىن كەدەرگىسىز قولجەتىمدىلىكپەن جابدىقتالعان, قالعان 11 سايلاۋ ۋچاسكەسى ۋاقىتشا پاندۋستارمەن جابدىقتالعان. سايلاۋ ناۋقانى كەزىندە كورۋ قابىلەتى بۇزىلعان ادامدار ءۇشىن سايلاۋ ۋچاسكەلەرىندە اۋديوجازبا جانە برايل ترافارەتتەر تۇرىندەگى اقپاراتتىق ماتەريال پايدالانىلادى. «بارلىق سايلاۋ ۋچاسكەلەرى ماتەريالدىق-تەحنيكالىق جاعىنان تولىق جابدىقتالعان», دەدى ابزال جايلىباەۆ.
وبلىستاعى سايلاۋشىلاردىڭ جالپى سانى 141 285 ادامدى قۇرايدى. بارلىق قالا مەن اۋداندا سايلاۋشىلار ءتىزىمىن تەكسەرۋ جانە سايلاۋ ۋچاسكەلەرىن ناقتىلاۋ ءۇشىن سall-ورتالىقتاردىڭ جۇمىسى ۇيىمداستىرىلدى. قالالار مەن اۋداندار اكىمدىكتەرىنىڭ سايتتارىندا سايلاۋشىلار تىزىمىندە ءوزىن ىزدەۋ بويىنشا قىزمەتتەر بار Telegram_bot, سايلاۋشىعا سايلاۋ ۋچاسكەسىنىڭ مەكەنجايىن بىلۋگە جانە بەلگىلى ءبىر وكرۋگتەن تىركەلگەن كانديداتتاردىڭ ءتىزىمىن الۋعا مۇمكىندىك بەرەدى.
سەمينار-كەڭەستەردىڭ ەكىنشى بولىمىندە قاراعاندى مەن ۇلىتاۋ وبلىستارىنىڭ اۋماقتىق سايلاۋ كوميسسيالارىنىڭ مۇشەلەرى ءۇشىن «داۋىس بەرۋ كۇنى» ىسكەرلىك ويىن ستيلىندە ترەنينگتەر ۇيىمداستىرىلدى. ترەنينگتىڭ ماقساتى – سايلاۋ كوميسسيالارى مۇشەلەرىنىڭ داۋىس بەرۋدىڭ بارلىق راسىمدەرىن ساپالى مەڭگەرۋى, سايلاۋعا قاتىسۋعا قۇقىعى بار ازاماتتاردىڭ ءتىزىمى, ەسەپتەن شىعارۋ كۋالىكتەرى, ازاماتتاردىڭ اۋىزشا جانە جازباشا وتىنىشتەرى, قوعامدىق بىرلەستىكتەر وكىلدەرىمەن قارىم-قاتىناس جاساۋ تاجىريبەلىك داعدىلارىن يگەرۋ.
سەمينار-كەڭەس سوڭىندا ورتسايلاۋكوم مۇشەلەرى اۋماقتىق سايلاۋ كوميسسيالارىنىڭ مۇشەلەرىن قىزىقتىراتىن سۇراقتارعا جاۋاپ بەردى.
