پارتيا وكىلى سەرىكتەستىك ۇجىمىنا حالىق پارتياسىنىڭ سايلاۋالدى باعدارلاماسىن تانىستىردى. ا.اسىلبەكوۆ پارتيا ەلدە قالىپتاسقان جۇيەنىڭ ءمانىن تۇبەگەيلى وزگەرتۋدى تالاپ ەتەتىنىن, بيلىك پەن بايلىق قازاقستان حالقىنا تيەسىلى بولاتىن ادىلەتتى قوعام قۇرۋدى قولدايتىنىن جانە بيلىك وكىلەتتىكتەرىن بولۋدە تەجەۋ مەن تەپە-تەڭدىكتىڭ ساياسي جۇيەسىن ساقتاۋدى جاقتايتىنىن جاريالادى.
ء«بىز ازاماتتاردىڭ قۇقىعى مەن بوستاندىعى بارلىعىنان جوعارى تۇراتىن ناعىز حالىقتىق مەملەكەت قۇرۋدى قولدايمىز. جەر مەن جەر قويناۋى حالىققا تيەسىلى بولۋ كەرەك», دەدى ول.
كانديدات جاڭا قازاقستانعا جالدامالى قىزمەتكەرلەردىڭ الەۋمەتتىك جانە ەڭبەك قۇقىعىن تولىق قورعايتىن جاڭا ەڭبەك كودەكسى قاجەت ەكەنىن مالىمدەدى.
– ەكونوميكادا ورتا تاپ قۇرۋعا جانە كەدەيلىكتى جويۋعا مۇمكىندىك بەرەتىن جاڭا تاسىلدەردى ەنگىزۋ ماڭىزدى. حالىق پارتياسى ەل اۋماعىندا ءوز ازاماتتارىمىز وندىرگەن تاۋارلاردان, كورسەتكەن قىزمەتتەردەن قوسىمشا قۇن سالىعىن الىپ تاستاۋدى جانە اينالىمعا 5% مولشەرىندە بىرىڭعاي سالىق ەنگىزۋدى قولدايدى, – دەدى پارتيا وكىلى.
كەزدەسۋدە ءبىلىم, مەديتسينا, قۇرىلىس سالالارىنداعى وزەكتى ماسەلەلەر دە تالقى تارازىسىنا سالىندى. كانديدات مەملەكەتتىك مەكەمەلەردە (ارناۋلى ورتا جانە جوعارى) ءبىلىم بەرۋ مەن دەنساۋلىق ساقتاۋ ماماندارىن تەگىن وقىتۋ, ايەلدەردىڭ زەينەتكە شىعۋ جاسىن 58-گە بەكىتۋ, ال 4 جانە ودان كوپ بالا تاربيەلەپ وتىرعان انالاردى 55 جاسقا دەيىن زەينەتكە شىعارۋ ۇسىنىسىن قولدايتىنىن, بۇل باعىتتا جۇيەلى جۇمىستاردى جالعاستىرا بەرەتىنىن ايتتى. كانديداتتار سايلاۋالدى باعدارلامادا بانكتەرگە ازاماتتاردىڭ ارتىق تولەمدەرىن قايتارىپ بەرۋ تۋرالى تالاپ قويعاندارىن مالىمدەدى.
كانديدات حالىقتىڭ قارىزعا باتقانىن, ونلاين نەسيەنىڭ سالدارىنان ەلىمىزدە الاياقتاردىڭ قاپتاپ كەتكەنىن, جاستاردىڭ قۇمار ويىنىنىڭ قۇربانىنا اينالىپ بارا جاتقانىن دا العا تارتتى. «قازىر ونلاين نەسيەنىڭ جارناماسى قاپتاپ كەتتى. حالىق ماجبۇرلىكتەن نەسيە الىپ, قارىزعا باتىپ وتىر. الاياق كومپانيالار ەلدى قاناپ جاتىر. وسىلاردى مەملەكەت اۋىزدىقتاۋى كەرەك», دەدى كانديدات.
