بيزنەستى دامىتۋ, نەسيەنىڭ قىمبات مولشەرلەمەلەرى, وففشورلىق ەسەپشوتتارداعى حالىق قاراجاتىن قازاقستانعا قايتارۋ تۋرالى تارماقتار ءوڭىر تۇرعىندارىنان قولداۋ تاپتى. جاستاردى يپوتەكالىق نەسيە ماسەلەسى تولعاندىردى.
ال كاسىپكەرلەر شەكسىز مۇمكىندىككە يە سوت ورىنداۋشىلارىنىڭ ارەكەتىنە نارازىلىقتارىن ايتتى. ولار كومپانيالاردىڭ ەسەپشوتتارىن بۇعاتتاپ, تابىس تاۋىپ, قارىزدارىنان قۇتىلۋىنا كەدەرگى جاسايدى. كاسىپورىنداردى ديزەلدىك وتىنمەن قامتاماسىز ەتۋ ماسەلەسىندە دە كەرەعار جاعداي تۋىنداپ وتىر. حالىققا, اۋىل شارۋاشىلىعىنا جەڭىلدىكتەر قاراستىرىلسا, كەنىشتەر مەن كولىك كومپانيالارى ونى 3 ەسە قىمباتقا ساتىپ الۋعا ءماجبۇر. ولاردىڭ كوپشىلىگى بانكروتتىقتىڭ الدىندا تۇر. «بۇل ماسەلەلەردىڭ بارلىعى باقىلاۋدا بولادى», دەپ سەندىردى دميتري ۆاسيلەۆ.
پارتيا ءوز تاراپىنان كاسىپكەرلىك سالاسىنداعى ماسەلەلەردى شەشۋدىڭ بىرقاتار جولىن ۇسىنۋعا دايىن. اتاپ ايتقاندا, الەۋمەتتىك ماڭىزى بار تاۋارلار مەن بيزنەستىڭ باسىم سەكتورلارى ءۇشىن 0-6% دەڭگەيىندە قوسىمشا قۇن سالىعىنىڭ تومەندەتىلگەن مولشەرلەمەلەرىن ەنگىزۋدى تالاپ ەتپەك. ۇلتتىق بانكتىڭ ەكىنشى دەڭگەيدەگى بانكتىك نەسيە بويىنشا بازالىق سىياقى مولشەرلەمەسىن جىلدىق 4-5%-دان اسپايتىن ءتيىمدى سىياقى مولشەرلەمەسىنە دەيىن تومەندەتۋ ماسەلەسىن كوتەرۋ قاجەت. مونوپوليستەر تاريفتەرىنىڭ نەگىزدىلىگىن – ءبىرىنشى كەزەكتە ەنەرگەتيكا جانە تەمىر جول كولىگى سالاسىندا تولىق كولەمدە تەكسەرۋ جۇرگىزۋ كەرەك.
ء«بىز اۋىلدىق جەرلەردە سالىقتاردى جويۋعا ۇمتىلامىز, ادامداردىڭ بجزق شوتىنداعى قاراجاتىن وزدەرى باسقارعانىن قالايمىز, مەديتسينالىق ساقتاندىرۋ ناقتى ءبىر ادامعا بايلانىپ, ول كەز كەلگەن ەمحانادا, قاجەتتى ۋاقىتتا كومەك الا الاتىن بولۋى كەرەك», دەدى بەرىك دۇيسەمبينوۆ.
اقجولدىقتار جينالعانداردىڭ سۇراقتارىنا جاۋاپ بەرىپ, سايلاۋشىلاردىڭ ۇسىنىستارىن نازارعا الدى. پارتيانىڭ سايلاۋالدى باعدارلاماسىمەن تانىستىرىپ, سايلاۋدا ەلدىڭ بولاشاعى ءۇشىن بەلسەندىلىك تانىتۋعا شاقىردى.
