اتىراۋداعى سايلاۋشىلارمەن العاشقى كەزدەسۋدە «Respublica» پارتياسىنىڭ تەڭ توراعاسى سىرىمبەك تاۋ جاستاردى قولداۋ ماسەلەسىن كوتەردى. ول بارلىق ۋاقىتتا اعا بۋىن وكىلدەرى جاڭا, جاس ۇرپاققا مورالدىق-ەتيكالىق تۇرعىدان كوڭىلدەرى تولماعانىن ايتتى. بىراق, ونىڭ ويىنشا, جاستار ءۇشىن ەشتەڭە ىستەلمەسە, مۇنداي سىننىڭ كۇمان تۋدىراتىنى انىق.
ء«بىر كەزدەرى اتالارىمىز اكەلەرىمىزگە: ء«بىزدىڭ جاستار بۇزىلدى» دەپ ايتقان. ال كەيىنىرەك اكەلەرىمىزدىڭ: «ۇرپاعىمىز وزگەرىپ بارادى, تاربيە دەگەن مۇلدە جوق» دەگەن سوزدەرىن ەستيتىن بولدىق. ال ءبىزدىڭ مىندەتىمىز – جاستارىمىز وسىنداي سىنعا نەگىز بولماس ءۇشىن جاعداي جاساۋ. جاستار ءۇشىن ءتيىمدى ەشنارسە ىستەمەسەك, وندا ولاردى بۇزىلدى دەۋگە حاقىمىز جوق», دەدى س.تاۋ.
ايتا كەتۋ كەرەك, «Respublica» پارتياسىنىڭ مۇشەلەرى ەلىمىز بويىنشا 30 مىڭ شاقىرىمنان استام جولدى ءجۇرىپ ءوتىپ, ناۋقاننىڭ 2 اپتاسىندا ۇگىت-ناسيحات جۇمىستارىمەن 1 ميلليون ادامدى قامتىدى. ەڭ باستىسى, پارتيا مۇشەلەرى كۇن سايىن ازاماتتاردىڭ ماسەلەلەرىن سارالاپ, پارلامەنت ماجىلىسىندە شەشۋدى كوزدەيدى. «Respublica» پارتياسىنىڭ تەڭ توراعاسى, پارلامەنت ءماجىلىسىنىڭ دەپۋتاتتىعىنا كانديدات رۋسلان بەردەنوۆ ءوز سوزىندە وسىعان نازار اۋداردى.
ء«بىز – ىسكەر ادامدارمىز. شەتەلگە شىعۋعا شامامىز جەتەدى. ماتەريالدىق بايلىعىمىز دا, ياعني قاجەتتىنىڭ ءبارى بىزدە بار. بىراق ەرتەڭ بىزدەن: «ەلىڭ ءۇشىن نە ىستەدىڭ؟» دەپ سۇرايدى. ءبىز پارتيا بولامىز با, جوق پا, ول ماڭىزدى ەمەس. الايدا ەل يگىلىگىنە قىزمەت ەتۋدى جالعاستىرا بەرەمىز. ال ازاماتتاردىڭ سان جىل بويى قوردالانعان پروبلەماسىن شەشۋ – ءبىزدىڭ العا قويعان باستى ماقساتتارىمىزدىڭ ءبىرى. ءبىزدىڭ ماقساتىمىز ايقىن جانە مىندەتىمىز اشىق, ءبىز پارلامەنتكە حالىقتىڭ ماسەلەسىن ايتىپ, شىنايى احۋالدى بيلىككە جەتكىزۋ ءۇشىن بارامىز. ءبىزدىڭ باستى ماقساتىمىز – ماجىلىستە ءبىز سياقتى ەل قامىن ويلايتىن ادال كاسىپكەرلەردىڭ قاتارىن كوبەيتۋ», دەدى ول.
