بۇۇ-نىڭ قارۋسىزدانۋ جونىندەگى كونفەرەنتسياسى جەنەۆادا ءوتتى. القالى جيىندا ءسوز العان سىرتقى ىستەر ءمينيسترى مۇحتار تىلەۋبەردى قازىرگى تاڭدا الەمدەگى قاۋىپسىزدىك تۇراقسىز بولا باستاعانىن, سوندىقتان يادرولىق دەرجاۆالار اراسىنداعى ديالوگتى جاڭارتۋ بۇرىن-سوڭدى بولماعانداي قاجەت ەكەنىن ايتتى.
ونلاين-فورماتتا وتكەن باسقوسۋ بارىسىندا قازاقستان ءسىم باسشىسى ەلىمىزدىڭ 2026 جىلدان كەيىن ستراتەگيالىق شابۋىل قارۋ-جاراقتارىن قىسقارتۋ مەن شەكتەۋ شارالارى تۋرالى شارت تۋرالى ماسەلەنى تالقىلاۋدى قاجەت دەپ سانايتىنىن جەتكىزدى. ول سونداي-اق بەس يادرولىق دەرجاۆا – اقش, قىتاي, رەسەي, ۇلىبريتانيا جانە فرانتسيانىڭ ءبىر جىل بۇرىن قابىلدانعان يادرولىق سوعىس پەن جاپپاي قارۋ شىعارۋعا جول بەرمەۋ جونىندە بىرلەسكەن مالىمدەمەگە ادالدىعىن راستاۋى ماڭىزدى ەكەنىن اتاپ ءوتتى.
«ۋكرايناداعى جانجال, وراسان زور يادرولىق ارسەنالدار, شيەلەنىسكەن يادرولىق ريتوريكا جانە ديالوگتىڭ بولماۋى الەمدى قاۋىپتى باعىتتا قاراي الىپ كەلە جاتىر. مۇنداي جاعدايدا يادرولىق دەرجاۆالار اراسىنداعى ديالوگتى جاڭارتۋ بۇرىن-سوڭدى بولماعانداي قاجەت. قازاقستان پرەزيدەنتى قاسىم-جومارت توقاەۆ بۇۇ قاۋىپسىزدىك كەڭەسىنىڭ الدىندا ەسەپ بەرەتىن ارنايى كوپجاقتى ورگان – بيولوگيالىق قاۋىپسىزدىك جونىندەگى حالىقارالىق اگەنتتىك قۇرۋدى ۇسىندى. اگەنتتىك تاجىريبە الماسۋعا, الەۋەتتى ارتتىرۋعا جانە بيوتەحنولوگيالاردى بەرۋگە ەرەكشە نازار اۋدارا الادى دەپ سەنەمىز», دەدى مۇحتار تىلەۋبەردى.
ء«بىز يادرولىق قارۋسىزدانۋ مەن تاراتپاۋداعى بىرقاتار قيىندىققا تاپ بولدىق, سوندىقتان بىزگە جاڭا يدەيالار قاجەت. قازاقستاننىڭ بيولوگيالىق قاۋىپسىزدىك اگەنتتىگىن قۇرۋ جونىندەگى باستاماسىندا بيولوگيالىق قارۋسىزدانۋدى ودان ءارى ىلگەرىلەتەتىن بىرقاتار يدەيا بار. ەندى ولاردى جەتىلدىرۋ جانە الەۋمەتتەندىرۋ قاجەت», دەدى كونفەرەنتسيادا بۇۇ-نىڭ عارىشتىق قاۋىپسىزدىك باعدارلاماسىنىڭ جەتەكشىسى دجەيمس رەۆيلل.
