ءىس-شارانى اشقان كىتاپحانا ديرەكتورى باقىتجان تەمىربولات ەلىمىز تاۋەلسىزدىك العان العاشقى كۇننەن باستاپ-اق ادامداردىڭ ۇلتتىق جانە ءدىني سەزىمدەرىنە قۇرمەتپەن قاراۋىن ناسيحاتتاعان «بىرلىگىمىز – ارالۋاندىلىقتا» قاعيداتىن بەرىك ۇستانعانىن اتاپ ءوتتى.
– قازاقستاندا تۇراتىن بارلىق ەتنوستىڭ مادەنيەتىن, ءتىلىن, ءداستۇرىن دامىتۋعا مول مۇمكىندىك جاسالعان. ولاردىڭ سانى 130-دان اسادى. ءبىز ەلدەگى كونفەسسياارالىق تاتۋلىقتى دا قامتاماسىز ەتتىك. ەلىمىزدە 40-تان استام ءتۇرلى كونفەسسيانىڭ وكىلدەرى ىرگەلەس تۇرىپ, وقىپ, جۇمىس ىستەپ, بالالارىن تاربيەلەپ جاتىر. بىراق ءبىزدىڭ ارتۇرلىلىگىمىز تەك ەتنوستىق جانە ءدىني ايىرماشىلىقتارمەن شەكتەلمەيدى. ءبىزدىڭ قوعامىمىز الۋان ءتۇرلى. دەگەنمەن ايىرماشىلىقتاردى قۇرمەتتەي وتىرىپ, شىن مانىندە, بىرەگەي مادەنيەتىمىزدى قالىپتاستىراتىن ورتاق قۇندىلىقتاردى ۇمىتپاعانىمىز ءجون. كەڭ جانە اشىق پىكىرتالاس نەگىزىندە ءارتۇرلى, كەيدە پوليارلىق پىكىرلەردى ورتاق تۇيىنگە جەتكىزۋگە مۇمكىندىك بەرەتىن ينستيتۋتسيونالدىق تەتىكتەر مەن ارنالاردىڭ ءتيىمدى جۇمىس ىستەۋى دە وتە ماڭىزدى. ونىڭ ۇستىنە, كونسەنسۋس نەگىزىندە قابىلدانعان شەشىمدەردى جۇزەگە اسىرۋ قاجەت. بۇگىنگى تاڭدا ادىلەتتى قازاقستان بوي كوتەرىپ جاتقاندا مۇنداي تەتىكتەر ەرەكشە وزەكتى بولىپ وتىر, – دەدى ب.تەمىربولات.
باسقوسۋدا سەنات دەپۋتاتى گەننادي شيپوۆسكيح ۇلتارالىق كەلىسىم – ءبىزدىڭ ورتاق قۇندىلىعىمىز ەكەنىن جانە جاھاندىق قاۋىپ-قاتەر جاعدايىندا ۇلتارالىق قارىم-قاتىناستى نىعايتۋدىڭ ەل ءۇشىن ماڭىزى زور ەكەنىن اتاپ ءوتتى. وسى ماقساتتا قۇرىلعان قازاقستان حالقى اسسامبلەياسى تابىستى جۇمىس ىستەپ كەلەدى, ال ونىڭ جانىنان جاساقتالعان قحا جاستار قاناتى بەلسەندى ۇيىمعا اينالدى.
اسسامبلەيانىڭ توپتاستىرۋشى رولىنە جان-جاقتى توقتالعان اقدم ەتنوسارالىق قاتىناستاردى دامىتۋ كوميتەتىنىڭ توراعاسى عالىم شويكين: «بۇل بىرەگەي ۇيىم ەتنومادەني بىرلەستىكتەردىڭ كۇش-جىگەرىن بىرىكتىرۋدى قامتاماسىز ەتەدى, قازاقستان حالقىنىڭ ۇلتتىق مادەنيەتتەرىن, تىلدەرى مەن داستۇرلەرىن جاڭعىرتۋعا, ساقتاۋعا جانە دامىتۋعا كومەكتەسەدى. بۇل ۇلتىنا قاراماستان ەلىمىزدىڭ بارلىق ازاماتتارىنىڭ قۇقىقتارى مەن بوستاندىقتارىن قورعاۋعا ىقپال ەتەدى. قحا «زامان كوشىنە ىلەسۋگە» تىرىسادى جانە ءوز قىزمەتىن ۇنەمى جەتىلدىرىپ وتىرادى. وتكەن جىلدىڭ كۇزىندە قوعامدىق كەلىسىم مەن جالپىۇلتتىق بىرلىكتى نىعايتۋدىڭ بارلىق وزەكتى ماسەلەسىن قامتيتىن قازاقستان حالقى اسسامبلەياسىن دامىتۋدىڭ 2022-2026 جىلدارعا ارنالعان جاڭا تۇجىرىمداماسى قابىلداندى», دەپ اتاپ ءوتتى.
ءسوز تىزگىنىن العان «قوعامدىق كەلiسiم» رمۋ ديرەكتورى ەلينا پاۋلي قوعامدى بىرىكتىرۋشى رولگە يە قازاق حالقى تۋرالى ايتا كەلە, ەل اۋماعىندا تۇراتىن ءتۇرلى ەتنوستاردىڭ مادەنيەت ەلەمەنتتەرiنiڭ بiر-بiرiنە قالاي ەنiپ جاتقانى, ناتيجەسىندە, بۇدان دا كوبىرەك جاقىنداسۋعا جانە ءوزارا بايىتۋعا جول اشىلاتىنى جونىندە ءوز ويىمەن ءبولىستى.
كەزدەسۋ بارىسىندا عىلىمي-ساراپتامالىق قوعامداستىق, قحا, «قوعامدىق كەلىسىم» رمۋ, ەتنومادەني بىرلەستىكتەر مەن جاستار ۇيىمدارىنىڭ وكىلدەرى بىرلىك ۇعىمدارىن قالىپتاستىرۋ مەن ناسيحاتتاۋدىڭ وزەكتى ماسەلەلەرىن جان-جاقتى تالقىلاپ, ەتنوسارالىق قاتىناستاردىڭ قازىرگى زامانعى ۇدەرىستەرىنە ءوز كوزقاراستارىن ءبىلدىردى.
