ەكسپو-2017 جوبالارىن ىسكە اسىرۋ ماسەلەلەرى سوچيدە تالقىلاندى

استانا. 24 ماۋسىم. سوچيدە ەۋرازيالىق ەكونوميكالىق كوميسسيا وتىرىسى ءوتتى. وندا ەۋرازيالىق ەكونوميكالىق وداق تۋرالى كەلىسىم ەرەجەلەرىن جۇزەگە اسىرۋ ماسەلەلەرى تالقىلاندى. بۇل تۋرالى primeminister.kz حابارلادى. سوچيدەگى اتالعان باسقوسۋعا ۇكىمەت باسشىسىنىڭ ءبىرىنشى ورىنباسارى باقىتجان ساعىنتاەۆ قاتىستى. وتىرىستا ەۋرازيالىق ەكونوميكالىق وداق قۇرۋ تۋرالى كەلىسىمدى جۇزەگە اسىرۋ بويىنشا الداعى ۋاقىتتا اتقارىلۋى ءتيىس جۇمىستار كەڭىنەن ءسوز بولدى. سونداي-اق, ەۋرازيالىق ينتەگراتسيانى ودان ءارى دامىتۋدىڭ ەڭ باستى ماسەلەلەرى قارالدى. تارقاتا ايتار بولساق, ارمەنيانىڭ ەۋرازيالىق ەكونوميكالىق وداققا قوسىلۋى تۋرالى كەلىسىم جوباسى, ەۋرازيالىق ينتەگراتسيالىق جوباعا قاتىسۋى جونىندەگى قىرعىز ەلىنىڭ الداعى مىندەتتەرى تالقىعا ءتۇستى. بۇدان بولەك,  ەكسپو-2017 جوبالارىن ىسكە اسىرۋ ماسەلەلەرى دە وسى باسقوسۋدا كۇن تارتىبىنە قويىلدى. جيىندا قابىلدانعان شەشىمدەر ينتەگراتسيالىق بىرلەستىكتىڭ اشىقتىعىن ناقتىلادى. جولدىباي بازار. دەرەككوز: primeminister.kz. فوتو: Ortcom.kz.